Ларгсса нюжмар жула республикалун аьмну ва мунил хъуншагьрулун дия культуралул аралуву хъанахъисса иширттал чулуха авадансса. Миннувасса ца хьунни июльданул 26-нний МахIачкъалалив Оьруснал драмалул театрданул хьхьичI – Дунияллул халкьуннал дянивсса «Горцы» фестивальданул II этапрал, Зунттал форумрал, ва мукунна Дунияллул халкьуннал дянивсса фольклорданул культуралул «Цамаури» V фестивальданул лагрулий дуллалисса гала-концерт, «Дагъусттан хъамал хьунабакьлай бур» цIанилусса.
Бадрижамал Аьлиева
БавтIминнал хьхьичIун бувккунни республикалул районнаясса ва шагьрурдаясса творчествалул коллективру. Миккун бавтIминнал хьхьичI махъ лахълай, Дагъусттаннал культуралул министр Зарема Буттаевал увкунни:
— Жу ча бувкру тIутIиссару жулва хъамаллурахь – Азирбижаннавасса, Къабардин-Балкьарнавасса, Ингушнавасса, Ухссавнил АьсатIин-Аланиянавасса, Ростовуллал областьраясса ва Ставрополлал крайраясса творчествалул ансамбльлахь ва 
коллективирттахь. Фестивальданул цалчинсса этапрай гьуртту хьунни Мексиканавасса, Шри-Ланкинавасса ва цаппарасса цаймигу чил билаятирттаясса коллективру.
Дунияллул халкьуннал дянивсса «Горцы» фестивальданул ккаккан дуллалиссар дагъусттаннал халкьуннал ранг-рангсса этнокультура, фольклор. ЦIакь дуллалиссар дусшиврул арарду, куннил кув авадан дуллалиссар личIи-личIисса культурарду, гьаз буллалиссар республикалул позитивсса имидж. Ва хъанахъиссар дунияллул чIяву миллатру, чIяру культурарду дусса халкьуннал байранну, шадлугъну, — увкунни Зарема Ажуевнал.
Фольклорданул коллективирттал ккаккан дунни концерт.
Гихуннай «Горцы» фестиваль лахъи ларгунни шагьрулул хъун майданнив, «Дагъусттаннал щаращив» цIанилу тIивтIусса миллатирттал культурардал майданнив.
Ва байрандалувух хьхьичIунсса гьурттушинна дунни Лакрал ва Ккуллал районнал цачIусса «Лакрал щаращулгу». Лакрал райондалул культуралул управлениялул хъунмур Лида Кьурбановал ва Ккуллал райондалул культуралул управлениялул хъунмур Марина Ибрагьимовал каялувшиндаралу дурну дия ххуйсса хIадуршинна, миллатирттал дукрарду, миллатрал канил пишарду, багьу-бизу ккаккан буллалисса матахI, ярагъ бивхьуну бия ккаккиялун. Балай-къавтIавуртту чан дакъая. «Лакку щаращучIа» аглан хъанай, миллатирттал дукрардал тIин-тIааьн ххал буллалимигу, суратру ришлашимигу чIявуя.
Республикалул хъун майданнив творчествалул коллективирттал ккаккан дунни республикалул авадансса культура.
