Июль зурул 27-нния шинмай ДПС-лул личIисса батальондалул зузалтрал МахIачкъалалив байбивхьунни «Ремень» цIанилусса профилактикалул операция. Ва рейдрал мурад бур шупIиртал ва пассажиртал хIаласса ДТП-тту чан даву, ххуллийн бувкминнал ххуллул низам дуруччаврил ялув бацIаву. Гьарца шинах жула республикалий ДТП-луву чIявусса инсантуран бала-апатIру хъанай бур, биялсса инсантал оьрмурдацIа хъанай бур. Мунийн бувну, республикалул ГИБДД-лул зузалтрал ччя-ччяни бувай «Маршрутка», «Ремень», «Пешеход» цIанилусса операцияртту.
А. Аьбдуллаева
Ва цIана нанисса «Ремень» цIанилусса рейдрай ГИБДД-лул зузалтрал ашкара буллантIиссар мюхчан байсса мухIлу къадархIуну нанисса ва мукунсса пассажир бувцуну заназисса шупIиртал. Ялув бацIантIиссар шупIиртурал пассажиртал бувцуну наниминнаясса тIалавшиннарду дуруччин, мюрщисса оьрчIру хасъсса мухIулттив ва креслорду бакъана бувцуну къазанан.
БацIан буллантIиссар мукунма хьхьичIсса чIавахьултту цIан бувсса, пардавртту дархIусса, цинявппа чIавахьулттай трафаретру ларчIсса, хIасил, 30 %-рал хьхьичIсса ягу чулухсса пюрунтру бащан бувсса шупIиртал.
МахIачкъалалив 7 зурул дянив сияхIрайн ларсун дур балугъравун къабивсса оьрчIру гьурттусса 9 ДТП. МахIачкъалаливсса иширтталсса байсса ОГИБДД-лул (УМВД) пропагандалул инспектор, полициялул майор Мурад ЖахIпаровлул оьвчаву дунни шагьрулул агьалинайн: «Шагьрулувух машинарттай заназиминнахь тавакъю буллай ура, чунмай, ци чIумал аьрххилий буккарчагу, зуйрагу, архIал нанисса оьрчIайгу дахIияра мюхчан байсса мухIулттив».
ДПС-лул личIисса батальондалул зузалт мукунма дюъ дихьлай бур шагьрулул агьалинай личIлулну бикIияра, машинартту бири-биривний кьамабитларду тIий, цанчирча МахIачкъалалив чIяву хьуну бур авто ва мототранспорт дарцусса ишру.
