Олимпиадалул тIуркIурдал 5-мур кьининийн Аьрасатнал цачIун дур командалул ларсунни
шаннагу даражалул медаллу: 4 мусил, 7 арцул ва 4 чарвитул. Миннува 2 мусил медаль ларсунни
жула чIаххувсса республикарттаясса спортсментурал: Кабардин-Балкьарнавасса
Беслан Мудрановлул
ва Ингушнавасса ХIасан Халмурзаевлул. КIинналагу дзюдолул журалуву.
Мусил медаль. КIуну бувтун полуфиналданий хьунабавкьуссар Аьрасатнал 2 душ: Аида Шанаева ва Инна Дериглазова. Миннувату тIайлабацIу хьуну бур Дериглазован. Финалданийгу Инна ххув хьуну бур. Шанаева тIурча 3-мур кIанттул цIанийсса бяст-ччалливу бух хьуну, медаль дакъа ливчIун бур.
Арцул медаль. Аьрасатнал цачIун дур командалувун мусил медаль ларсунни 2012 шинал Олимпиадалул тIуркIурдай кIира чарвитул медаль ларсъсса Ольга Забелинскаял. Ганихьхьун Рио-де-Жанейролийсса Олимпиадалул тIуркIурдавух гьуртту хьун ихтияр дуллуссар гай байбишин цаппара гьантри ливчIсса чIумал. ЛесапIетрай бигьавриву. Ольга бух хьуссар так Американал Армстронг Кристиннуяр анжагъ 6 секундрал. Забелинскаял умуд бур 2020 шинал Токиолий мусил медаль духхин.
Чарвитул медаль. Рио-де-Жанейролий чарвитул медаль ларсъссар Аьрасатнал ца яла жагьилма гьузузала Антон Чупковлул. Аьрасатнал гьузузалтрал 200 метралийсса манзилданий брассрай гьузуй медаллу къадурххуссар 1996 шинал Атланталий хьусса Олимпиадалул тIуркIурдая шиннай. Та шинал чарвитул медаль дурххуну диркIссар Андрей Корнеевлул.
Аьрасатнал цIачIун дур команда 6-мур кIанай дур.
Аьрасатнал цачIун дур команда Олимпиадалул тIуркIурдал къаофициальсса командарттал медаллан хасъсса зачетрай бяст-ччаллал 5-мур кьинилия махъ 5-мур кIанавату 6-мур кIанайн дурчIунни. Аьрасатнал спортсментурал дур цинярдагу 15 медаль – 4 мусил, 7 арцул ва 4 чарвитулсса. Къаофициальсса командарттал зачетрал таблицалий 1-мур кIанай дур США-нал цачIун дур команда (11 мусил, 11 арцул ва 10 чарвитул медаль); 2-мур кIанай дур Китайнал команда (10-5-8); 3-мур кIанай – Японналсса (6-1-11).
ХIасан Аьдилов
