КЪУНЖУХЪАЛ МАХIАММАД-РАСУЛЛУЛ АРС ИБРАГЬИМ-ХАЛИЛ
Августрал 18-нний оьсса бала-апатI багьана хьуну, оьрмулул 63 шинаву жуятува лавгунни Ххюлуссуннал шяраватусса ххаллилсса лаккучу, гьарцагу ишираву, ххари-хъиншивурттай чIарав ацIан анавар уккайсса, кумаг буван хьхьичIунсса, даврийсса гьалмахтуран бусравсса чув Ибрагьим-Халил.
Увссар Ибрагьим-Халил 1952-ку шинал, хъудугьул кулпатраву. Хъунмасса кулпат бухьувкун, нитти-буттан кумаг хьуншиврул, дуклан увхссар Торгово-кулинарный училищалувун 1969 шинал. 1971 шинал зун увхссар цIигьурну (повар) «Волна» ресторандалувун. Цикссагу шиннардий зий ивкIссар му пишалий. Махъсса шиннардий Ибрагьим-Халил зий уссия кондитерский цехрал хъунаману.
Заочнайну дуклай, 1992 шинал къуртал бувссар Ростовуллал муххал ххуллул техникум, увхссар бригадирну ччуччия итадакьайсса базалийн. 1995 шинал цIакь увссар му базалул (Гортопливо) начальникну, 24 шинай зий ивкIссар му даврий, цукунчIавсса аьй дакъа, марцIну.
Цува кулпатращал шагьрулий ялапар хъанай ухьурчагу, буттал шяравалу хъамакъаритайссия Ибрагьим-Халиллун.
Ванан ххирая мюрщи оьрчIру, хъуниминнал хIурматгу ваначIа лавайсса бия, цанма жяматгу, жяматран цувагу ххирая.
ДакIнийхтунусса кьурчIишиву кIидачIлай, жижара буллай бур Ххюлуссуннал жямат, дакI тIайласса дустал, Ибрагьим-Халиллущал зий бивкIсса гьалмахтал, ванал кулпатрахь, арснахь, душваврахь, уссихь, ссурваврахь. Ибрагьим-Халиллун бакъасса оьрму махъминнан булуннав.
Ванал рухI алжаннул ххари дуваннав, бунагьирттал аьпа баннав.
Ххюлуссуннал жяматрал цIания Раппани
МАХIАММАЛУЛ АРС МАХIАММАДОВ ЗАКИР
Къашавай хъунма хIалгу къабувну, аьпалул хьунни Хъусращиял шяраватусса Махlаммалул ва Патlиматлул арс Махlаммадов Закир.
Увну ур Закир Хъусращиял шяраву 1957 шинал. Ванал хъунмур оьрму лавгссар Ваччав ялапар хъанай нитти-буттащал. ЧIяв 11 классгу бувккуну,2 шинай аьрали къуллугъ лавхъссар. Хъирив къуртал бувссар Ростовуллал строительствалул институт. Аьпалул хьуннин цала сянатрай зий ивкIссар Ваччав, МахIачкъалалив, Харьковрай, Рязаннай, Москавлив.
Цибанссар, жуятува ччяни лавгунни ххаллилсса нитти-буттал арс, уссу, лас, ппу, маччачу, дус.
Хъуннасса кьурчIишиву духIансса ссавур Аллагьнал дулуннав тIий, жижара буллай буру ванал кулпат Светланахь, арс Артурдухь, душру Гуларахь ва ПатIиматлухь, уссурваврахь, ссихь, агьлу-авладрахь.
Закирдул бунагьирттал аьпа баннав, рухI хъинний дишиннав.
Хъусращиял, Ваччиял,
Ккуллал жямат
АЬБДУЛЛАЕВА ЖАМИСАТ АЬБДУРАХIИННУЛ ДУШ
Август зурул байбихьулий дунияллия лавгунни хъинну иминсса хасиятрал инсан, хIакьсса педагог, яхI-къириятрал бувцIусса, гьарца кIулначIа цил хIурмат лавайсса хъамитайпа, шама арснал нину, Вираттиял шяраватусса Аьбдуллаева Жамисат АьбдурахIиннул душ.
Жамисат бувну бур Вираттиял шяраву АьбдурахIиннул ва Издаглул кулпатраву 1939 шинал. Школагу къуртал бувну, бувххун бур дуклан пединститутравун. Дуккавриву итххявхсса Жамисатлул язи бувгьуну бур хIисаврттал дарсру дишайсса учительнал пиша. Хаингу къавхьуну бур му пишалийн, цинна чув мина дуллан багьарчагу. Зий бивкIун бур Къизлардал школалий, ласгу хирургну гихун тIайла увксса шиннардий. МахIачкъалалив бивзун махъ зий буссия шагьрулул 29-мур школалий математикалул дарсру дихьлай. Жамисат бия «АьФ-лул халкьуннал кIулшиву дулаврил отличник».
Чув, цумур коллективраву бухьурчагу, Жамисат бия хIалимсса, цинмагу халкь ххирасса, цуппагу миннан ххирасса хъамитайпа, шама арснан, арснал оьрчIан ххаллилсса нину, хъуннабава.
Цибанссар, оьрмулул 77 шинаву аьпалухьхьун лавгунни зирангнувасса, зий-заназисса инсан, оьцIуцIаврил хъапа бивщуну.
Дуссия Жамисатлул диялсса хIурматрал лишаннугу, ласайссия багьлул ларайсса бахшишругу, цила бихьлахьисса захIмат хъуниминнан чIагу-чIалай, бугу-бувчIлай бушиврийн бувну. ХIурматрайгу буссия миннал коллективирттаву, шяраваллил агьулдануву.
Жамисатлул бивкIулул кьурчIишивугу кIидачIлай, жижара буллай буру арсурваврахь, миннал оьрчIахь, ссил оьрчIахь, ласнауссурваврахь, ссурахъаврахь, щалвагу агьлу-авладрахь. Ванин къабуллумур оьрмулул бутIа оьрчIан, оьрчIая бивзминнан булуннав. Жамисатлул рухI алжаннул ххари даннав, гьав нурданул дуцIиннав. Амин!
Вираттиял жямат, Къизлардай архIал зий бивкIми, МахIачкъалалив Редукторный поселокрайсса 29-мур школалул учительтал
Зул ялун хархавар бакъа дирсса духIан захIматсса кьурчIишивугу кIидачIлай, жижара буллай буру, жулва дянивгу хIурмат лавайну бивкIсса
Сакинат
аьпалувух бишаврийн бувну, ниттихь Сарижатлухь, ласнахь Мурадлухь, арсурваврахь, ссурваврахь, махъсса агьлу-авладрахь.
Сакинатлун бакъасса оьрмулул бутIа мунил оьрчIан, му ххирану бивкIнан булуннав. РухI алжаннул ххари даннав, гьав нурданул дуцIиннав. Амин!
ГьунчIукьатIрал школалучIасса «Дараччи» клубрал коллектив
Хъуннасса кьурчIишиву кIидачIлай, жижара буллай буру гьарца аьркинний, захIматний жула чIарав бацIан хIадурсса, кумаграл ка кIидахIайсса, хIурмат лавайсса жулва шяравудуш, «Дараччи» клубрал президент Илиясова Мариян ЧIибил душнихь, ванил ххирасса ссил душ
Сакинат,
жагьилсса оьрмулий апатI нясив бувну, аьпалувух бишаврийн бувну.
Махънал оьрмурду лахъи баннав, Сакинатлул рухI пирдавс-алжаннул ххари даннав, гьав нурданул дуцIиннав. Му духIан захIматсса дард куклу дансса ххаришивуртту Заннал ялун диян даннав.
ГьунчIукьатIрал школалучIасса «Дараччи» клубрал коллектив
Вай гьантрай ГьунчIукьатрал шяраваллил жяматрал ялун дирунни кьурчIисса кьинирду. Цаннил хъирив ца хьунни жагьилсса бивкIурду. Уттиния тихунмай ххарисса бакъа къабаяваннав тIий,
Аьбидатлул
бивкIулул кьурчIишивугу кIидачIлай, жижара буллай буру арснахь, душнихь, уссур-ссуннахь, щалвагу агьлу-авладрахь.
Бусайсса мукъуй цIу бусса, ихтилат тIааьнсса Аьбидатлул хIурмат хъунмассия жучIа. Ци банссар, кьадарданул хьхьичI баруну бацIан къашай. Заннал чичрулун чаран бакъар. Аьбидатлул рухI алжаннул ххари даннав, гьав нурданул дуцIиннав. Амин!
ГьунчIукьатIрал школалучIасса «Дараччи» клубрал коллектив
