Июль зурул 20-нния 24-ннийн Ахъушиял райондалий ХIинтIиял шяраву хьунни щалагу Аьрасатнал жагьилсса лидертурал форум «Чиндирчеро — 2016». Мунил сакиншинначитал бур республикалул жагьилтурал иширттал министерство, Дагъусттаннал паччахIлугърал университет, Ахъушиял райондалул администрация. Муний гьуртту хьуну ур 14-30 шинал оьрмулувусса 105 инсан, так ца Дагъусттанная бакъассагу, Аьрасатнал цайми регионнаяссагу: Москавлия, Санкт-Петербурграя, Крымнава.

Зулайхат Тахакьаева
«Форум дуллиссар жагьилтураву лидершиврул хасият, сакиншинначинал ва каялувчинал бюхъурду вардиш бансса, Аьрасатнал халкьуннал дянив дусшиву цIакь дан­сса мурадрай. Жулва билаятран аьркинну бур лидертал. Гьамин, «Чиндирчеролул» даражалийсса форумирттал кабакьу буллалиссар ми хIадур бан. Форум къуртал хьуну махъгу жу зунтIиссару муний гьуртту хьуминнащал, миннал форумрай бивхьусса проектру дузрайн буккан буллай. Ттигу жулла хьхьичI дуссар цамургу ххаллилсса форум «Ицари — 2016», му хьунтIиссар Дахадаевуллал райондалий», — увкунни жагьилтурал иширттал министр Арсен ХIажиевлул.
«Дагъусттаннай буссар цал лахъшиву мукьазарда метралуяр ххишасса дусса 14 зунтту. Кьиблалул Дагъусттаннай дирхьуну дуссар ляличIисса зунттул ссирт. Гьашину жучIанма бувкIун буссия Германнавасса, Американавасса, Азирбижаннавасса ва цаймигу билаятирттаясса хъамал. Дагъусттаннал магьирлугърал ирс бур лап авадансса. Му ирс жущава ишла бан бюхъан тIий бур жучIара этнокультурный­сса, научно-познавательныйсса туризм хьхьичIуннай дан. Дагъусттаннай дуссар сайки 6500-ннийн дирсса тарихрал ва магьирлугърал гьайкаллу, миннува 1960 дур федерал агьамшиву дусса,» — увкунни Дагъус­ттаннал туризмалул ва халкьуннал сянатирттал министерствалул туристско-рекреационныйсса комплексрал каялувчи Муслимат Халимбаговал.
ДР-лул миллатирттал иширттал министр Татьяна Гамалейл форумрал гьурттучитурахь бувсунни министерствалул даврия ва зузи бу­ллалисса проектирдая.
«Дагъусттаннал Конституция кьамул бувссар 2003 шинал. ЧIявусса статьярду буссар Аьрасатнал Конституциялува лавсъсса, амма буссар статьярду так жунма хасъссагу. Ми статъярду буссар миллатирттал дянивсса арардайн багьайсса. Жул министерствалул даврил ца агьамсса ххуллуну ккакла­ккиссар дагъусттаннал миллатирттал мазурдихсса аякьа,» — увкунни Татьяна Гамалейл.
Форум лакьаврил шадлугъ дайдирхьуна Аьрасатнал Федерациялул, Дагъусттан Республикалул ва Ахъушиял райондалул гимнру руцаврийну.
Шадлугърай гьуртту хьунни Ахъушиял райондалул администрациялул бакIчи АхIмад МахIарамов, ДР-лул жагьилтурал иширттал министр Арсен ХIажиев, ДГУ-рал профсоюзрал организациялул хъунаманал хъиривчу МахIаммад Кьурбанов, форумрал директор ХIасан МахIаммадов.
Форумрай гьуртту хьуминнан дуллунни сертификатру. Райондалул бакIчи АхIмад МахIарамовлул барчаллагь увкунни форумрал сакиншинначитурахь ва муний гьуртту хьуминнахь. Форум лакьаврил шадлугъ къуртал дуруна Дагъусттаннал эстрадалул балайчитурал концертрайну.