«Ххяххабургъил гъили къаувма, лагабургъил гъиливагу къаайссар».
Ва учала цимилагу тикрал бувна, ихтилатраву Ккуллал шяравасса Шиханова ПатIу Ибрагьимлул душнил. Ванил бувтсса оьрмулул ххуллу хIисавравун лавсукун, ттун бувчIуна, ва учалалул махъру ванил дакIнил куртIнива нанисса, цила дакIнивусса къумашиву ашкара дуллалисса махъру бушиву.

ПатIу бувну бур 1925 шинал мискинсса кулпатраву. Ва ниттил бан кIива зурул хьхьичI, «баргъ лавчIун» къашай хьуну, яла лавгун ур бутта. Дунияллийн букканнинма ятиншиврул дагъ рирщусса ПатIун циярва кIира шинал хъунмасса ссищал багьну бур ккашигу, мякьгу бухIлай хъуни хъанан, чIивину бунува захIматрахун багьан.
Шяраваллил школалий арулва классгу къуртал бувну, ПатIу зун бивкIун бур хъуни хъаннищал хъар дархIуну, къурнил давурттай, къатлул ахIвал чансса бунугу ххуйшаву мурадрай.
1941 шинал, шяраваллил чиваркI дяъвилийн лавгукун, ванингу багьну бур цайми душру-хъаннищал архIал хъурссул кIамайму бугьангу, хьхьурду хIала дуллай мирхь ва чIиникI зузи бангу. ЗахIмат бишавриву хIарачат бусса ПатIу 1942 шинал гьан бувну бур Бартнеххалусса колхозрал ттизай оьллал фермалийн дояркану. Тикку зий цаппара барзру лавгукун, тIайла бувккун бур захIматрал фронтрайн Къумтуркъалаллайн къанаврду дуклан. Мукьва зурул мутталий зий бивкIун бур оьрмулул ацIния арулла шиннарагу хьун дурасса ПатIу, кулунграх аьрщи дихлай.
ЗахIматрал фронтрая зана хьуну, колхозраву къурнил давурттай зий хъунма хIал къавхьуну ПатIу цIунилгу тIайла бувккун бур цамур захIматрал фронтрайн. Къаякантливсса «Исси-ссу» тIисса батагъалийн балугъру бугьлан, ми дяъвилийсса талаталтран тIайла буклан. «Жу батагъалия зана хьуннин, жул шяравасса чIявусса кулпатру чачаннал аьрщарайн бизан бувну лявкъуна. Жул дакIурдивусса къумашивурттал ялун ва къумашивугу дируна», — тIий буслай бур ПатIу.
1944 шинал ва тIайла був­ккун бур Бакрис-Бажиганнайсса кIинтнил минардайн куч буллалисса колхозрал яттил ца бригадалущал аьравачину-дукра дувуну. 1945 шинал ятту зунттавунмай куч буллай нанисса ххуллий бавну бур вайннан дяъви къуртал хьусса ххарисса хавар.
Ятту Лаккуйн куч бувну кIира нюжмардагу хьуннин ПатIу цIунилгу тIайла був­ккун бур Бакрислив ххулу хIадур буллан, артезианначIа бувгьу­сса шагьнал лачIал оьрчил­тту ритлан. Ятту кIинтнил минардайн зана хьуннин даэв ремонт дансса къамуш ттихIлан. Та чIумал цинна хьунадаркьусса захIматшивурттая ПатIу укун буслай бур: «ЧиваркIуннал дайсса давурттугу дан багьлай, жуйн гуж багьлай бия. Дунияллул щаллушиву дакъанугу, зунмур багьлай бия. Дякъил бувгьуну къашай хьуну, ттул тамансса гьантри лавгуна, ттух ургъил бансса цучIав акъая, азархана гикку бакъая, цIуллу-сагъшиврул хъирив буккансса улахъ бакъая. ИвкIума ивчIан, увкма уккан гьарца инсан цала-цаласса буллай ия. На кунма къашай хьуну, ттущал зузисса жагьилсса душ Камилова Маржанат бивкIуна. Та чIумал нава сагъну личIаврий на хIакьинусса кьинигу махIатталнува бура. Аллагьнал ттуй рахIму бувхьунссия. Лаккуя ятту куч бувну цIунилгу кIинтнил минардайн бучIаннин жу Бакрисливва ливчIунав. Чан-кьансса хIал чурххайн бувкIсса на гьан бунна Къаяев Рамазаннул бригадиршиву дуллалисса къушлийн «ссубану» (ххункIчину)».
1946 шинал гъинттул ятту кIинтнил минардая Лаккуйн куч бувну зана хьуну махъ, ПатIу цIунилгу тIайла бувккун бур «Бартнеххалу» фермалийн дояркану. ЗахIматшивурттал кьянкьа-кьурчIи бувсса ПатIул шикку цила давриву хьун дурну дур цайминнан эбратран­сса ккаккияртту. Пландалий ца оьлища ттизин ккаккан дурсса 700-800 килограммран кIанай, ва ттизлан бивкIун бур 1600-1700 килограммрайн дияннинсса накI. НакI ттизавриву хьун дурсса хьхьичIуннайшивурттахлу ПатIу 1950 шинал кьамул бувну бур партиялул членну. (МукьцIалла шинай дурну дур ванил партиялул членшиву). Вара шинал ванин дуллуну дур «ЗахIматрал ЯтIул ттугълил» орден. Ва хъанай бур Ккуллал райондалий хьхьичIра-хьхьичI укунсса бюх­ттулсса орден дулун лайкь хьу­сса захIматчи-хъамитайпа.
ХьхьичIунсса захIматчи бу­шиврухлу ва 1952 шинал бувчIуну бур цалчинсса Да­гъусттаннал Избербашлив хьу­сса окружной партийный конференциялул делегатну. Тания шихунмайгу ва цимилагу гьуртту хьуну бур райондалул ва областной партконференциярттай, цимилагу бувчIуну бур шяраваллил ва райондалул советир­ттал депутатну, КПСС-рал райкомрал, колхозрал правлениялул членну.
ПатIу щар хьуну бур оьрмулул 35 шин хьуну махъ. Ванил ва ванил ласнал Халиллул дянив оьрчI-душ хьуну бакъар. «Къакьисмат бунни жун лякьлул оьрчI, му дур жул талихI бакъашиву», — тIий, буслай бур ва цила дакIниву куртIну ядуллалисса къумашиврия:
«Ххяххабургъил гъили къаувма, лагабургъил гъиливагу къаайсса ивкIун ур».
Чанкура
КьурбанмахIаммадов
1999 ш.