Нюжмар кьини Республикалул экономикалул министерствалий хьунни Зунттал щархъал форумрайнсса хIадуршиннардал масъалартту ххал бигьлагьисса батIаву.
И. Саидова
Совещание хьунни Республикалул экономикалул ва территориал хьхьичIуннайшиврул министр Муслим Мажидовлул каялувшиндаралу.
Совещаниялул даву дайдихьлай, Муслим Мажидовлул бувсунни форумрайсса мукьвагу личIи-личIисса территориал площадкарттай хьунтIисса мероприятияртту мюнпат буну дачин даншиврул, хIукму бувну бушиву гьарица дуллалисса даву хасъсса специалистътурайн тапшур дансса. Ва хIукмулийн бувну ххал дигьин бюхълай бур министерстварттал ва ведомстварттал дурсса давурттив.
Совещаниялий кIицI лавгунни Зунттал щархъал форумрай хъуннасса агьамшиву дусса иш хъананишиву июль зурул 27-нний МахIачкъалалий хьунтIисса «Эффективное развитие горных территорий России» тIисса элмийсса практикалул конференция. Ва конференциялул даву наниссаксса хIаллай тIивтIуну бикIантIиссар Дагъусттаннал миллатирттал художествалул промыслирдал усттартурал каруннал дурсса давурттал чIюлу бувсса майданну.
— Гьашину Зунттал шин кIицI лаглагисса давурттал лагрулуву хъанахъисса Зунттал щархъал форум хъанахъиссар республикалул правительствалул дуллалисса хъуннасса агьамшиву дусса давуну. Форумрай гьурттушинна дантIиссар 300-нная ливчусса инсантурал, миннавух бур Аьрасатнал Федерациялул 16 субъектраясса делегация ва чил билаятирттал хIукуматирттаясса вакилтал. Мунийн бувну цайнна тапшур дурсса мероприятияртту лавайсса даражалий тIайла дуккан хIарачат бан аьркинссар цинявппа пишакартурал. Форумрая рязийну личIан аьркинссар республикалийн бувкIсса хъамал, — увкунни Муслим Мажидовлул.
Зунттал щархъал форум хьунтIиссар июль зурул 26-29-нний. Зунттал щархъал форумрал даву най дикIантIиссар МахIачкъалалив, Ахттиял райондалийсса Ахттиял шяраву, Хъунзахъуллал райондалийсса Хъунзахъиял шяраву ва ТIиляратIиял райондалийсса «Цамаури» тIисса кIанттай.
Форумрал даврил лагрулуву хьунтIиссар конференцияртту, ккуркки столлу. Му бакъассагу, Дагъусттан Республикалул ХIукуматрал чичинтIиссар «Русское географическое общество» тIисса Щалагу Аьрасатнал жяматийсса идаралущалсса кьутIи.
