МахIачкъалаллал аэропортрал хъунама директор Арсен ПирмахIаммадов июнь зурул 28-нний хьунаавкьунни республикалул СМИ-рдал журналистуращал. Ва хьунабакьаву хас дурну дия Москавлия МахIачкъалалийнсса авиабилетирттал багьри гьаз шаврил багьана-сававртту циван хъанахъиссарив бувчIин баврин.
И. Саидова
Аэропортрал директорнал бакIрайва бувсунни соц. сетирдай ва цаппара СМИ-рдаву баллай бушиву самолетирттал билетрал багьри гьаз бавриву аэропортрал каялувчиталгу хIала-гьурттуну буссар тIисса информация.
— На бувчIин бан ччай ура самолетирттал рейсирдайнсса билетру баххавривух МахIачкъалаллал аэропортрал цукунчIавсса гьурттушинна дакъашиву ва миннуйнсса билетру баххавриха зузиссар так агьалий ххилаххисса авиакомпанияртту. Июнь зурул 15-нния 2015 шиная шихунмай жул предприятиялул аэропортрай дуллалисса давурттахлу цурда ца кIапIикIрал багьа гьаз къабувссар. Ялунгума жу 10% кьюкьин бувссар авиациялул керосиндалул багьа.
Экспертътурал хIисаврайн бувну авиакомпаниялул харж дуллалимунил так 7 – 15 % хъанахъисса аэропортирдал ласласисса хIакь. Ванийн бувну, аэропортрал дуллалисса давурттахлу авиакомпаниярдал бишайсса харжлугърая билетрал багьа лахъ шаврийн хIисав хьунсса бияла бакъассар.
2015 шинал Федерал тарифирдал къуллугърал ккаккан дурсса тарифру хIакьинусса кьининин дусса куццуй даххана къархьунна дуссар. Мунийн бувну махъсса ппурттуву самолетирттайнсса билетирттал багьри гьаз шавриву МахIачкъала аэропортрал цукунчIавсса гьурттушинна дакъассар.
Федерал антимонопольный службалул хIукму бувну, ихтияр дуллуну дур Москавуллал авиациялул узеллал аэропортирдахьхьун цачIара дуллалисса давурттах багьри гьаз буллансса.
Мукун, аэропорт «Домодедовалий» 2016 шинал март зуруй самолетру щядикIаврихлу ва леххаврихлу 15 % багьа гьаз бунни, авиациялул мюхчаншиву дуруччаврихлугу 26 %-рал, март зурул 30-нний 27% багьа гьаз бунни дунияллул халкьуннал авиалиниярттал аэровокзал ишла баврихлу ва 43% гьаз бунни аьрасатналми авиалиниярттал аэровокзал ишла баврихлу. Мунийн бувну «Домодедово» аэропортрайнсса билетирттал багьри аьмну 20% гьаз хьунни. Гьаз бувсса багьри асар хьунни авиакомпаниялул экономикалун ва пассажиртуран, — увкунни МахIачкъалаллал аэропортрал хъунаманал.
Арсен ПирмахIаммадовлул мукунма бувсунни авиаперевозчиктурал кассардай бахлахисса билетру сайтирдай бахлахиминначIанияр кьювкьуну бацIлацIишиву.
— ЧIявуми билетру бахлахисса компаниярттал ва Зумадугьаврил зуруй, Дагъусттаннайн чIявусса агьалий бачайшиву кIулнугу, билетру ххира буллай байбишай. Ва барз къуртал хьуну, пассажиртал чан шайхтугу билетирттал багьри биялну кьюкьлай бачинтIиссар, — увкунни аэропортрал хъунама директорнал.
Мукунма ва батIаврий Арсен ПирмахIаммадовлул бувсунни цинярдагу компаниярттал авиаперевозчиктуран къулайсса шартIру щаллу даву мурадрай цIусса рейсру тIитIлатIисса авиакомпаниярттан аэропортрал хIаллихшиннардал багьа 40% кьюкьин бан.
— Ва давугу дуллай буру жу дагъусттаннал аэропортрайн цIу –цIусса авиаперевозчиктал букIлай, цIу- цIусса рейсру гьарзану тIитIланшиврул, — увкунни Арсен ПирмахIаммадовлул.
Аэропортрал финансирттал директор Юлия Щербаковал бувсунни ФАС-раща къабюхъайшиву авиаперевозкарттал аралувусса тарифру ххал дуллан ва миннул багьри цалийн бутлан.
Журналистурал цIухху-бусу бунни Ухссавнил Ккавкказнавусса хъунисса аэропортирттай вай масъаларттал хIакъираву цукунсса тагьар дуссарив.
Арсен ПирмахIаммадовлул бувчIин бунни вай аэропортирдая Москавлив 1-2 азарда къурушрал билетру кьювкьуну бацIлай бухьурчангу, махъунмаймур билетрал багьа ххирану бацIлацIишиву.
Пресс-конференциялий мукунма бувсунни аэропортрай дуллантIисса цIушиннардая.
