ДР-лул Шяраваллил хозяйствалул министерствалул бувсъсса куццуй, республикалул циняв хозяйстварттаву чялишну хIадур дуллай бур хъала лазуни. Махъсса ккаккиярттайн чул бивщуну, Дагъусттаннай хIадур дурну дур 326 азаллий 212 тонна лазундарал, дукIуминних бурувгун, 18 азаллий 645 тонна ххишалану.

ХIасан Аьдилов
Республикалул хъузалтрал кIинтнийнсса луртан дурну дур 307 азаллий 567 тонна ххалал, 18 азаллий 645 тонна сенажрал. Миннуяр ххишала 1 азаллий 500 тонна силосралгу хIадур дурну дур.
ХIакьину лазуни хIадур давриву хьхьичIунсса кIану бугьлай бур Къизлардал райондалул (49-нния лирчусса тоннарду), Хасавюртуллал райондалул (38 азарда тонна), Бабаюртуллал райондалул (34 азарда тонна), Табасараннал райондалул (30 азарда тонна).
Министерствалул бувсъсса ку­ццуй, кIи ххуйсса тагьарданий рутаншиврул республикалул хIадур дан аьркинссар 1 млн. ва 400 азарда тонна лазундарал. ДукIу хъузалтрал хIадур дурну диркIссар 1 млн. ва 478 азарда тонна лазундарал луртандалул, миннувату 1 млн. ва 345 азарда тонна ххалал, 38 азаллий 404 тонна сенажрал, 95 азаллий 203 тонна нухьхьал ва 15 азарда тонна силосрал. Пишакартурал пик­рилий, гьашину лазуни хIадур дан тIий бур дукIумур шинал даражалийсса, амма хъинну хIарачат барча, бюхъайссар ххишаласса луртан лазундарал хIадур дан.