Машгьурсса Чаринхъал МухIуттин дунияллийн увккун 100 шин шаврил шадлугъ Гъумук, Культуралул къатлуву, аргъирай нанисса ппурттуву, залданул нузавугу бавцIуну, жагь сценалийн, жагьгу залданувун буруглай, ттухьва нава буссияв: «МухIуттиннул кьимат бищун бюхъайми, га цува кунма репрессиярттахьхьун лавгун, бакъа-къатIа бувну бунуккар», тIий. Чув бур лак, чув бур миллат?!!!

Укун учинсса ливккунни дакIнийн, ца цамургу сурат ккарккукун. Вечерданийгу, гания махъ сакин дурсса банкет­райгу низам цара ца дия: балайрду ва къавтIавуртту, миннул лях – махъ лахъаву. Ккуллал райондалул художественный самодеятельностьрал лавсун бувкIун бия, цала ляхъан барду тIий, «Чаринхъал МухIуттиннун хьуссания ттуршра шин» тIисса балай. Му увкуна вечерданийгу, учин бувна цIунил банкетрайгу. Ххуйя балайчиталгу, ххуйя балайчитурал чIурдугу, ххуйя махъругу. МухIуттин 100 шин хьуннин ивтун ивкIссания, цикссагу шеърирду ляхъан банссия, амма оьсса бивкIулул аьличIан унни, тIисса. Бакъаривла вай махъру зумараха лавхьхьусса? Амма зун ккаккан хъина ва балай, циваннив къакIулли, ца шадсса къавтIаврил макьандалий тIий артистал бувккукун, вайннаяргу шадну, тяхъану, дирину ва балайлухун лак­рал интеллигенция, лакрал чичулт ва шаэртал, лакрал аьлимтал, райондалул бакI дургьуми къавтIутIисса куц! Кьакьар­ттуй дарцIусса къурхъ кьюлтI учин къархьуна, кьатIув бувккун бюхттулсса Гъази-Гъумучиял шагьрулувух къабувкссаксса, ахттакьун чIумалсса нахIусса гьавагу бюкьлай.
Хъирив кьини ХьурукIрав тIивтIуна Ш. Бюрниевлул бувсса бюст. Ганий «увссар-ивкIуссар» тIисса чичру дур ­оьрус мазрай. Мугума гьич, жула ­оьрус мазрай къачирчусса ци дурча. Амма вакссава укунгу къабучIия: бюстрал лагма дирхьуну дия МухIуттиннул творчествалун хас дурсса выставка. Ганий бия МухIуттиннул шеърирдавасса ххару, амма ми циняв – оьрус мазрай. Чаринхъал МухIуттиннун оьрус маз жунма щинчIавнияргу ххуйну кIулну бивкIшивугу, оьрус мазрай гъалгъа тIун бикIу, чичлан бикIу оьрус­наяр махъун къаагьанну хъанай бивкIшиву ххуйну кIулссар, оьрус мазрай ганал чирчумур канил дургьунан. КIулли ттунгу. Мунихлуну на бура, ганан гай цалва шеърирду цала буттал билаятрай цала миллатрал чил мазрай ккалай ччай ивкIссания, чичланхьувияв гай оьрус мазрай, лакку мазгу цуппа бивтун, тIий.
ПатIимат Бариева,
«Илчи», 1993 ш. август