Июль зурул 6-нний МахIачкъалаллал Хъунмизитраву Эдрал чаклийн бавтIцириннавух бия Республикалул БакIчи Рамазан АьбдуллатIипов хIаласса хIукуматрал къуллугъчитурал делегациягу.
Байрандалул чак буллан хьхьичI республикалул хъунаманал, агьали барча буллай, увкунни: « Дин — паччахIлугърал рувхIанийсса чул бищай ттарцIри. Дагъусттаннал рувхIанийсса чул бищай ттарцIри ислам. Жува циняв бусурманталлу. ХIукуматрал къуллугъирттай зузимигу. Мунияту жулва цинявннал аьмсса мурадгу – республикалий, билаятрай оьрму хьхьичIунмай шавур. Зунгу аьркинссару му мурадрай. Жува имандалий, адаврай къуццу тIурча, жулва уммалувугу низам дикIантIиссар».
Рамазан ХIажимурадовичлул кIицI лавгунни, власть ва исламрал духовенство экстремизм ва терроризм бирибат даву мурадрай дуллалисса давурттаву цану бикIан аьркиншиву, хIакьину республикалий 10 азаруннияр ххишаласса инсантал бушиву бяйкьу ххуллийн бувксса, хIукуматрал ва диндалул ми бакIрай бацIан бувансса хIарачат бикIан аьркиншиву, цачIу, мазгу, дакIругу цану зун аьркиншиву ми иширттаха.
