Июньдалул 23-нний ДР-лул Миллатрал политикалул министерствалуву хьунни оьрус миллатрал инсантал даврил щаллу баврил масъаларттан хас дурсса батIаву. Ухссавнил региондалул Координациялул советрал ва оьрус миллатрал агьалинал ма­съалартталсса байсса ХIукуматрал комиссиялул цачIусса заседаниялий гьуртту хьунни муниципал сакиншиннардил бакIчиталгу.

Бадрижамал Аьлиева
Заседаниялий ххалбивгьунни ЗахIматрал ва соцразвитиялул министерство, цаппарасса ЦЗН (Центр занятости населения) зузаврил бущи, даража, мукунма Ухссавнил региондалийсса цаппарасса цаймигу масъалартту.
Ва батIаврий агьаммур къулагъасгу дия оьрус миллатрал инсантал республикалия бивзун нанаврилмур масъалалух, мунин­сса хъунмурчIинми сававрттугу дия республикалийсса тагьар, кулпатравусса хIал-тагьар, оьрус миллатрал инсантуран хьхьичIва цивппа ялапар хъанай бивкIсса кIанттайн зана хьун ва лахъсса харж бусса, сий дусса даву ля­къин ччай бушиву.
Заседание тIиртIунни ДР-лул миллатрал политикалул министр Татьяна Гамалейл. Мунил кIицI лавгунни оьрус миллатрал агьали давурттайн буххайсса чIумал чIявуну захIматсса тагьаруннивун багьлай бушиву.
— Дагъусттаннал хьхьичI бав­цIуну бур шайссаксса чIявусса ­оьрус миллатрал инсантал ухссавнил региондалий бацIан баврил масъала. Гьай-гьай, миллатрая хъар бакъа, Дагъусттаннал циняв инсантуран асар хьунни даву, лайкьсса даву лякъавриву хьунадакьлакьисса захIматшивуртту, дайшишру. Амма хIакьинусса батIаврий къулагъас оьрус миллатралми агьалинал масъалар­ттах дувансса хIукму буварду. Даву лякъавриву чIявуну кумаг шай гъан-маччаная, оьрус миллатрал инсантурачIарив му каши дакъар. Хасну мунийн бувнугу ми чIявуну багьай захIматсса тагьаруннивун. Жу тавакъю буллай буру районнал администрацияр­ттал ва агьали щаллу баврил центрдал каялувчитурахь му кIанугу хIисавравун ласаву, жун къаччай бур даву дакъашиврийн бувну оьруснал инсантурал Дагъусттан кьабитлай. Миннавасса чIявуми цивппагу бур шихва бувсса, хъуни хьусса, республикагу хъанай дур миннал тарихийсса ватанну, — увкунни Татьяна Владимировнал.
Оьрус миллатрал агьали давурттал щаллу бавриясса ихтилат гихунмай бачин бувну, ДР-лул захIматрал ва соцразвитиялул министрнал хъиривчу Зураб БахIаммадовлул бувсунни 2015-2016-ку шиннардий Бабаюртуллал, Къизлардал, Тарумовкаллал, Нугъайнал районнал ва шанма шагьрулул округрал агьали даврил щаллу баврил центрдайн даву лякъавривусса кумаграл хъирив увкшиву 1 азаллий 376 инсан, миннавагу 923 инсан ивкIшиву жагьилминнал категориялувун агьайсса. Даврил щаллу увну ур 997 инсан, миннаватугу 410 ур жагьилминнал категориялува­сса. Миннава 558 инсаннан даву ляркъуну дур работодательтурал дуллусса вакансиярттайн бувну, 158 инсан кIункIу увну ур жяматийсса давурттавун, чIумуйсса зузи кIанттурдайн тIайла увккун ур 17 инсан. Республикалул дазул кьатIув даву ляркъуну дур 58 инсаннан, дуккаврия тархъансса чIумал зунсса даврил щаллу увну ур балугъравун къаувхсса 202 оьрчI. Мукунма МахIачкъалалив ва Къизлардай даврил щаллу бувну бур цIуллу-сагъшиврул ссу­ссукьусса цаппара­сса инсанталгу. Мува бущилий гихунмайгу зун­сса ният душиву кIицI лавгунни З. БахIаммадовлул.
Тарумовкаллал ЦЗН-лул директор Любовь Петерслул бувсунни цилла каялувшиву дуллалисса идара уртакьну зий бушиву работодательтуращал, дуллай бушиву личIи-личIисса хьунабакьавуртту, вакансиярттал ярмаркартту. 2015 шинал ва Центрданийн увксса 542 инсаннава 123 ивкIун ур оьрус миллатрал, миннава 98 щаллу увну ур даврил. Мукунма бувсунни дуккаврия тархъансса чIумал чIава жагьилтал даврил щаллу бавриягу. Яла-яла цIурювкьумур масъалану му райондалий бусса бур хъами даврил щаллу баврилмур масъала, ЦЗН-ннайн бувксса инсантурал 65 % бусса бур хъаннил.
Ихтилатру ялагу бунни Тарумовкаллал райондалул бакIчи Александр Зиминнул, Къизлардал ЦЗН-лул директор Людмила Чудиновал, Дарбантуллал ЦЗН-лул директор Марат Буттаевлул, ДР-лул захIматрал министерствалучIасса «Успех» РМЦЗ-лул отделданул начальник Хадижат МахIаммадовал ва м.ц.. Миннал бусласимунихгу вичIидирхьуну, Татьяна Гамалейл чIурчIав дунни вай организациярттан аьркиншиврий, муниципал сакиншиннардищал архIал, лавайсса классирттал дук­лаки оьрчIащалсса даву щурущи дуван, школа къуртал бувну махъ чунчIав дуклан буххан къабювхъусса жагьилтураву цивппа щинчIав къааьркиншиврул пик­рирду хIасул къахьун, умуд бивхьунни Жагьилтурал министерствалулгу ва давриву кабакьу буван­ссар тIисса.
Ихтилат мукунма бунни Координациялул советрал секретарь Олег Артюховлулгу.