ХьхьичIа-хьхьичI му ивунни Яруннил микрохирургиялул Дагъусттаннал центрданийн. Микку ларгсса шинал обследование дурну дур 120 азара пациентнал, хьхьичIунсса технологияртту ишла дурну бувну бур личIи-личIисса 23 675 операция.
Центрданул директор Аьбдул-ХIамид Аьлиевлул бувсунни цачIара центрданий ттизаманнул яла хьхьичIунмур оборудование душиву, щалвагу Ухссавнил Ккавкказуллал республикалия бакъагу, Аьрасатнал цайми регионнаясса пациентъталгу бучIайшиву цачIанма, лавайсса даражалул офтальмологтал зий бушиву ва ми бусравну бушиву. Республикалул хъунаманал диагностикалул отделениялий ххал бунни сетчаткалул ва ангиографиялул компьютерная томографиялул кабинет, операциярду бай блок, кIицI лавгунни яруннил хIакиннал пиша личIинура тIалавшинна дусса бушиву, барчаллагь увкунни цайрасса жаваблувшинна кIулну бюхъу-хIарачатрай зузисса хIакинтурахь. Та центрданийсса иш-тагьар ххал дурну махъ Рамазан ХIажимурадович бакIчисса делегация бивунни Каспийскаллал шагьрулул азарханалийнгу. Каспийскаллал центральный азарханалий травматологиялул отделениялий республикалул хъунаманал миккусса пациентътурахь цIувххунни ми медперсоналданул даврия рязийну буссарив, медикаментирттал дузалшинна ци даражалийсса дуссарив. Тапшур бунни азарханалул ремонтгу дурну, лагма-ялттусса территориягу лазилакьи дурну, марцI дурну дакьин дуван.
Лажин хIадур дурссар
П. Рамазановал
