Дагъусттаннал УФСИН-лул спецназрал отделданул базалий хьунни машгьурсса Дагъусттаннал спортсментуращалсса хьунабакьаву.
Микку гьуртту хьунни: карунних бияврил дунияллул чемпион, СКФО-лул хIала-ккаласса бияврил искусствалул федерациялул президент, Дагъусттаннал сборнаялул панкратиондалул хъунама тренер Аьбдулкарин Айгунов; Аьрасатнал лайкь хьусса спортрал мастер, Аьрасатнал чемпион, Гран-при Иван Ярыгин турнирданий ххув хьума, лачIун буккаврил Олимпий чемпион Ширвани Мурадов; кикбоксинграл Аьрасатнал чемпион, карунних бияврил Дагъусттаннал мяйла чемпион, джиу-джитсулул Европанал чемпион, УКАДО-лул дунияллул чемпион, КЭМПО-лул дунияллул чемпион, ММА-лул кIийла дунияллул чемпион, хIала-ккаласса единоборстварттал США-нал чемпион, каратэлул Аьрасатнал чемпион, ММА-лул Азиянал чемпион, К-1-лул Германнал чемпион, ушу-саньдалул Дагъусттаннал чемпион, боевой самболул Санкт-Петербургуллал чемпион Артур ХIусайнов.
— УИС-рал зузалтращал тарбиялул давуртту даву мурадрай, жу мудан оьвчайссар жула зузалтращал хьунабакьин машгьурсса спортсментурайн, творчествалул интеллигенциялул вакилтурайн.
МукIрура вай хьунабакьавурттая жула зузалтран мюнпат хьуншиврий, шикку хьусса ихтилатирттал ми ххуймунийн кIункIу баншиврий, миннал жаваблувшинна ххишала даншиврий, — увкунни ва хьунабакьаврийсса цала ихтилатраву Дагъусттаннал УФСИН-лул хъунама, виваллил службалул генерал-майор Муслим Даххаевлул.
Ва кьини спецназрал отделданул зузалтрал ва спортсментурал дянив аьчухсса ихтилатру хьунни. Спортсментурал бувсунни цала оьрмулия ва спортравусса хьхьичIуннайшивурттая, бувсунни цала мурад-хияллайн биян цуксса захIмат бишин багьлай буссарив. Шикку зузиминналгу бусравсса хъамаллуран ккаккан бунни цала ярагъ ва спецтехника. Спецназрал зузалтрал ккаккан бунни спортсментуран цалами гьунардугу – лачIун буккаврил приемру, дайшишру лахъан кIулшиву ва м.ц.
Ахирданий, Дагъусттаннай спорт хьхьичIунмай бавриву, ялун нанисса ник тIайлану тарбия давриву хъунмасса захIмат бихьлай тIий ва ларайсса пишакаршиврухлу Муслим Даххаевлул дуллунни хъамаллуран цала идаралул чулухасса бахшишру.
Дагъусттаннал УФСИН-лул пресс-служба
ХIадур бувссар
А. Аьбдуллаевал
