Ларгсса нюжмардий гъараллу лар­чIун, хъунисса микIру бивчуну, ттининнин тарихраву къабивкIсса, хъинну тIааьн ба­къасса иш хьуну, тIабиаьтрая хъунмасса бала-апатI бивунни Лакрал райондалийсса ца­ппара щархъайн. Масалдаран, ххишала дакъа къия дирунни КIямашрал, ГьунчIукьатIрал, Карашрал ва цаппара ялагу шяраваллавун.

Оькки­сса микIирал мугьали бувккун бур Мияйннал чулуха шихунмай. Лавгун бур ва щатIи Уручуллал чулухунмай. Цайми щархъайнгу бивну бур зараллу, хаснува вай шяраваллан бивну бур хъиннува гужну. Хъинну хъуни­сса зараллу хьунни шиферданул магъив ду­сса инсантурал къатран, мурхьру къяртрацIа хьуну, багъирдаву, ахъаву дургьумур щях дирхьуну дур. Гъавгъун бур хIатта машинарттал пюрунтругума. Интернетраву, социал сетирдаву Лаккуй хьумунил суратру, видеорду ххал хьувкунма чIалай бия цукун­сса ци аьламат­рал микI бивчуссарив кIийн. КкутIа-вярчIари хьусса магъула къатравун щинну най дуну, халкьуннал бузри-кьузри зия хьуну бур. Магъуя нанисса гъарал щинал чIиртту атил бувну, магъулух даркьу­сса тахта-тIама атилшиврул пурш ла­хъан дурну дур. Бичлачисса микIирал хъунишиврул кьатIув бувксса инсантурангу цIунцIияртту хьуну, бакIру бувцсса, ка-ччаннай оьттубацIуртту хьусса ишру хьуну бур.
Хъирив кьини Лакрал райондалул администрациялиясса инсан, МЧС-рал зузала ва щархъал администрациярттал хъуними ялтту бувккун, чув-ци хьуну бурив ххал бувну, хьусса зараллу хIисав бувну бур. Укунмагу маэшатрал кьянатсса, чIявучин давуртту дакъасса зунттал кIанттай чIявусса оьрчIру бу­сса кулпатирттан, мушакъатминнан къабигьану бикIанссар му балаллува цайнува цивппа буккан, хIукуматрал чIарахбацIаву къадурну, ссуттилнин магъулун къатри лакьин. Умуд бишинну кьини дурксса халкьуннал чIарав бацIантIишиврийн республикалул хъунимигу.
Загьрани Аьбдуллаева