Июнь зурул 30-нний Республикалул БакIчи Рамазан АьбдуллатIиповлул каялувшиврийну хьунни террорданийн къаршийсса комиссиялул заседание. Микку ихтилат бия ПаччахIлугърал Думалувунсса бувчIавуртту нанисса ппурттуву мюхчаншиву дуруччаврия.

«ХIакьину власть ва низам дуруччай структурарду кьянкьану ялув бавцIуну буссар, мюхчаншиврул къаралданий буссар, амма нигьачIаву дурар ттигу ялату гьан, ихтиярду дуруччай органнал сот­рудниктал оьрмурдацIа буллай бур, экстремистътал оьнма ба­къар, мунияту бувчIавуртту нани­сса ппурттуву мюхчаншиву гужлан дан багьлай бур. Агьамсса ва бигьа дакъасса бувчIавуртту дур хьхьичI. ДукIусса бувчIавурттал ккаккан бунни жува демократ журалий бувчIавуртту дайсса даражалийн гьаз хьуну бушиву. Ялун нанисса бувчIавурттай цIакьну дуруччин аьркинссар властьрал авторитетгу, мюхчаншивугу», — увкунни Республикалул БакIчинал.
Республикалул избиркомрал председатель МахIаммад Дибировлул бувсунни бувчIавурттайнсса хIадуршинна цукун най дуссарив, кIицI лавгунни бувчIавурттал участокру, агьалинал мюхчаншиву дуруччаву мурадрай, металлодетекторду дирхьуну дузал дувантIишиву, цимурца хIисавравун лавсун зунтIишиву комиссияртту. МВД-лул бакIчи Аьбдурашид МахIаммадовлул бувсунни мюхчаншиву дуруччаврил даву ци даражалий дурив ххал дуван МВД-лул подразделениярттал хъуними кIани-кIанттурдайн биянтIишиву, нигьачIакIул буллай агьали, чIурду булун буккан къабитлатисса ишру къахъананшиврул ялув бавцIуну бушиву. Культуралул министр Зарема Буттаевал бувсунни патриот асарду цIакь буллалисса цуку-цукунсса давурттив дуллай буссарив культуралуву, бувсунни хIакьинусса кьини республикалий бушиву Аьрасатнал аслийсса культуралул 263 центр. КIулшиву дулаврил ва элмулул министр Ш. Шагьовлулгу бувсунни дуккаврил учреждениярттаву дуллалисса терроризмалийн къарший­сса давурттая.