Таможнялул союзрал техникалул регламентрал тIалавшиннарду (2015 шинал январь зуруй цIакь дурсса) хьхьичIра-хьхьичI асар хьунни пассажиртал бувцуну заназиминнан. Утти ихтияр дуллалисса документру бакъанува газрал балон дирхьусса маршруткарттал заллухърунная 500 къуруш аькIлул ласаврицIун, транспортгу сияхIрая дукьан дуллалиссар.
АькIригу дирхьуну, газрал балон дишин ихтияр дуллалисса документругу тIалав буллай бухьувкун маршруткарттал шупIиртурая, (мугу укра дайсса даву дакъар), къагьаз хьунтIиссарив маршруткарттал багьри тIий, гьалак буллай бур агьали.

А. Аьбдуллаева
ДР-лул транспортрал, энергетикалул ва дахIавурттал министерствалул бусласимунийн бувну, газрал балон дишин ихтияр дуллалисса документру цал бувну къуртал шайсса бухьувкун, муницIун бавхIуну маршруткарттал багьри гьаз хьунссар тIисса буруккин бикIан къааьркинссар.
Министерствалул вакилнал бувсунни кIицI ларгсса тIалав­шиннарду ноябрь зуруя шихуннай (2015 ш.) зун диркIшиву.
— Кьай духхайсса ва куклу машинарттал заллухърунначIа чIун диркIссар цIусса тIалавшиннарду щаллу дансса. ГИБДД-лул управлениялул каялувчитурал ка бавкьуссар миннан му даву дан, харжлугърал ва чагъардацIун бавхIусса къайгъурдал шупIиртал гьалак буккан къабуллан, — тIий буслай ур ГИБДД-лул управлениялул вакил.
Аьркинсса документру щаллу бан кIива барз ялагу ххи бувну махъ, Госавтоинспекциялул рейдру дурну, ялун ливчунни цIусса тIалавшиннардащал рязи бакъасса ва ихтияр къаларсна газрал балонну дирхьуну заназисса шупIиртал. Госавтоинспекциялул зузалтрал миннай аькIри дирхьунни, 300 шупIирнаща зевххунни номерду.
Газрал балонну дишаврил хIакъиравусса тIалавшиннарду шупIиртал ва пассажиртал бала-апатIрая мюхчан баву мурадрай­сса душиву буслай бур пишакартал.
— Республикалий чIяру хьунни пассажиртал бувцуну заназисса транспорт хIаласса ДТП-тту. Мунияту Госавтоинспекциялул зузалт­рая кьянкьасса тIалавшинна дуллай бур кIицI лавгсса масъалалул ялув бацIан.
АьчIа дишаву цалва машинарттаву газрал балонну дирхьуминнал жаваблувшинна ххи даву мурадрайсса чаранни, — тIий ур ГИБДД-лул вакил.
МахIачкъалалив агьаммур транспорт маршруткартту бур. ХIакьинусса кьини МахIачкъалалив 2 азаллий 130 маршрутка бур официальныйну кIулсса.
ГИБДД-лул управлениялул бусласимунийн бувну, газрал балонну дишаврицIун бавхIусса масъаларттаха багьлух зузи­сса, лицензия дусса кIира идара дуссар МахIачкъалалив. Газрал балон дишаву утти маршруткалул конструкция даххана даврин ккалли дуллалиссар. Му даву дан утти машиналул залуннан 10 азарунния 18 азаруннийн дияннинсса арцу харж дан багьантIиссар.
Мунияту вай давуртту хъин­ссар лицензия дусса центрдай дурну. ГАИ-лул управлениялул къат­равун буххайсса кIанттурдай лархъун дур дахханашивуртту дурсса маршруткартту сияхIрай бишиншиврул аьркин багьлагьисса документирттал сияхI.
ГАИ-лул хъуниминнал тапшур бунни инспектортурайн ва масъалалул хIакъираву куклу машинарттал шупIиртурангу бувчIинбавуртту дан.
Газрал балон дишиншиврул машина ххал бан аьркинссар му дишиннин ва дирхьуну махъ.
Му бакъассагу, шупIирнал цала машиналул экспертиза дан аьркинссар хасъсса идаралий. Яла мунил хIасиллайн бувну газрал балон дишинсса ихтияр ласун аьркинссар ГИБДД-лий. Балонну дирхьуну, аьркинсса сертификат ларсун махъ ххал дайссар балон дишаврия нигьачIаву дусса-дакъасса. Яла шупIирнахьхьун булайссар газрал балон дишаврия нигьачIаву дакъашиву мяйжан буллалисса чагъар. Му чагъар шупIирнал булайссар ГИБДД-лийн машиналул документирттаву аьркинсса да­хханашивуртту дан.