Майрал 24-нний ДР-лийн къуллугърал аьрххилий увкIун ивкIсса АьФ-лул захIматрал ва социал иширттал министр Максим Топилин ДР-лул БакIчи Рамазан АьбдуллатIиповлущал архIал ивунни цаппара социал объектирдайн.

БакIрай ми бувкIунни МахIач­къалаллал Лениннул райондалийсса МФЦ-лущал кIул хьун. Га идаралул директор ХIусман ХIасбулатовлул бувсунни идаралул хIаллихшинну даврил хIакъираву. МФЦ-лул пишакартуращал ихтилат бувну, Аьрасатнал захIматрал ва социал иширттал министрнал хъинчулий ккарккунни га идаралул дуллалисса даву.
Яла хъамал лавгунни Аьли Аьлиев­лул цIанийсса Спортрал къатравун. Тикку Максим Топилиннухь бувсунни га Спортрал къат­ри СКФО-рай яла хъуними хъанай душиву. Ганил дур 17000 квадрат метра, гивун цал архIал лагайссар 5000 инсан.
Тичча Максим Топилин ва Рамазан АьбдуллатIипов бувкIунни ДР-лул ХIукуматрал къатравун, тикку ххал бунни цIуну буллалисса мизит ва ххачпараснал ахIрам. Официалсса хьунабакьаврий Рамазан АьбдуллатIиповлул ва Максим Топилиннул ххал бивгьунни цачIусса давурттал агьамсса ххуллурду. Да­гъусттаннал БакIчинал федерал министрнахь барчаллагь увкунни Дагъусттаннайн учIаврихлу. «Жун кIулли жул республикалущал вил ара ххуйсса душиву, мунияту жу вийн барчаллагьрай буссару Да­гъусттаннал проблемартту щаллу бавриву гьуртту шаврихлу», — увкунни Р. АьбдуллатIиповлул.
Ихтилатраву ххал бивгьунни республикалий социал программартту бартдигьаврил масъалартту.
«Жу дузрайн дуккан дуллали­сса «Человеческий капитал» тIисса приоритетсса проект хас дурну дур агьалинал социал хIаллихшиннал даража лавай бан. Ва проектрал Дагъусттаннал сурат цIудуккан дантIиссар, республика марцI ду­ккан дантIиссар, — увкунни Рамазан АьбдуллатIиповлул.
Максим Топилиннул дакIнийн бувтунни хъуннасса мяъна душиву дуккаврил, цIуллушиву дуруччаврил, культуралул бутIраву дуллали­сса давурттал.
Дусшиврул къатраву АьФ-лул захIматрал ва социал ишир­ттал министр Максим Топилиннул ва ДР-лул БакIчи Рамазан АьбдуллатIиповлул дунни социал хIаллихшинну дуллалисса организациярдал давурттан кьимат бищаврил хIакъиравусса совещание.
Рамазан АьбдуллатIиповлул бувсъсса куццуй, цIанасса ппурттуву Дагъусттаннай зий бур 57 МФЦ ва 345 архсса кIанттурдайсса миннул офисру. Ми циняв ххуйну зийгу бур.
Ганал мукунма бувсунни республикалий агьалинан зузи кIанттурду щаллу баврин ва налогирттал база гьарта баврин хасъсса давурттугу дуллай бушиву.
Максим Топилиннул бувсунни федерал даражалий дуллай бушиву СКФО-рал субъектирдал социал хIаллихшинну дуллалисса организациярдал давурттан кьимат бищай­сса контрольданул давуртту.
Журналистътуращалсса ихтилатраву Максим Топилиннул бувсунни, лавай кIицI дурсса закондалул задача хъанахъишиву социал хIаллихшинну дайсса организациярдал даву хъин чулиннай да­ххана даву.
Рамазан АьбдуллатIиповлул бувсъсса куццуй, махъсса 3 шинал мутталий Дагъусттаннал социал бутIул тагьар цIусса даражалийн лархъун дур.
Яла Максим Топилин Рамазан АьбдуллатIиповлущал архIал бивунни Аьрасатнал Халкьуннал дусшиврул музейравун. Тикку ккаккан буллай бия табасараннал бартбисуртту, бархъаллал тIахIунтту, унцIукIуллал тIаннуя дурсса затру, къизлардал чIиллу, ххаржантру, оьргърал арцул чIюлушинну, мукунна Да­гъусттаннал художниктурал сурат­ру, луттирду, нукIузаманнул дув­ссилул тIахIунтту.
Федерал министерствалул каялувчинал лавайсса кьимат бивщунни республикалул культуралул объектирдан.
Яла Максим Топилин ивунни МахIачкъалаллал «Забота» тIисса интернатрал къатравун. Ганал мукъурттийн бувну, укунсса интернатирттавун зун буцин аьркинни лавайсса даражалул пишакартал, ттизаманнул реабилитациялул давур­тту канилух дурксса.