Дагъусттаннал Миллатирттал политикалул цалчинма министр МахIаммадсалихI Гусаев дакIнийн утлатисса митинг хьунни МахIачкъалалив, ванал цIанийсса кIичIираву, хъинсса цIа кьариртсса политикнал барельеф дусса кIанай. Вай гьантрай Гусаевлун 65 шин хьунтIиссия. Ва дакIнийн утан бавтIунни архIал зий бивкIми, журналистал, гъан-маччами, министерствардал ва ведомствардал къуллугъчитал.

П. Рамазанова
Митинг тIитIлай, Дагъус­ттаннал миллатирттал политикалул министр Татьяна Гамалейл бувсунни 2003 шинал август зурул 27-нний оьрмулуцIа увсса МахIаммадсалихI Гусаев респуб­ликалун хайр-мюнпатрансса хъунисса давурттив дурсса инсан ушиву, ванал цIа абад дуллалисса давурттив дуллантIишиву. ДНЦ РАН-далул этнополитикалул хъиривлаявурттал центрданул директор Низами Казиевлул бувсуна цува МахIаммадсалихI МахIаммадовичлущал зий ивкIсса къабигьасса чIуннардия, бувсуна та тIайлашиву ххирасса, тIайламунил цIаний талайнува­сса политик ивкIшиву. ДРО «Аьра­сатнал халкьуннал Ассамблеялул» региондалул отделениялул хъунама Зикрулла Илиясовлулгу цалва ихтилатраву кIицI лавгунни Гусаев республикалийцири миллатирттал дянив дакьаву, нахIушиву дуруччаву мурадрай чIярусса давурттив дур­сса инсан ушиву, танан Дагъусттан гужну ххирану бивкIшиву. Дагъус­ттаннал Журналистурал союзрал председатель Аьли Камаловлул бувсуна МахIаммадсалихI Гусаевлул дагъусттаннал СМИ-рдал даву гьаз дуллайгу хъунмасса захIмат бивхьушиву, чIярусса, ххуй-ххуйсса давур­ттив дуван ниятрай ивкIшиву. Митинг къуртал дуллалисса ихтилат буллай, МахIаммадсалихI МахIаммадовичлул уссил, ХIамид Гусаевлул хъунма­сса барчаллагь увкунни уссил цIанил хIурмат буну, та хъамакъаитлатиминнахь, Миллатирттал политикалул министерствалухь.