Р. ХIамзатовлул цIанийсса республикалул Хъунмур библиотекалуву хьунни «О контрактной системе в сфере закупок товаров, работ, услуг для обеспечения государственных и муниципальных нужд» тIисса федерал закон ишла даврил масъалар­ттал хIакъиравусса семинар.

ХIасан Аьдилов
Семинар бачин бувну ия ДР-лул паччахIлугърал хъус ласаврил комитетрал председатель Мурад ТIалхIатов. Семинарданий гьуртту хьунни респуб­ликалул министерстварттал, ведомстварттал паччахIлугърал учреждениярттал ва организациярдал контрактрал системалуха зузисса пишакартал.
Семинарданий хъунмур ихтилат бунни «Академия контрактных управляющих» ООО-рал гендиректор Александр Ивановлул, ихтилатру бунни мукунма паччахIлугърал властьрал органнащалсса давурттал департаментрал каялувчи Мурат Закаевлул, Аьрасатнал антимонополиялул къуллугърал управлениялул правалул отделданул хъунама ­Аьрип Мамеднабиевлул ва цайминналгу. Александр Ивановлул бувсунни контрактрал система ишла даврицIун бавхIусса агьамсса масъаларттая. Ихтилатчинал тамансса маслихIатру бунни контрольданул органнащал хIала-гьурттуну зузаврил хIакъираву. Ганал мукунма бувсунни 2016 шинал билаятрай закупкардал (хъус ласаврил) иширттал хIакъиравусса АьФ-лул ХIукуматрал нормативсса ва правалул документирттая.
Аьрасатнал УФАС-рал вакил Аьрип Мамеднабиевлул ва паччахIлугърал финансирттал контрольданул къуллугърал вакил Руслан Агъаевлул бувсунни госзаказрал бутIуву заказ дуллалиминнал ва заказ щаллу дуллалиминнал чулухасса диялдакъашивурттал иширттая.
Семинардал ахирданий вичIи дишин бувкIминнал суалла­хьхьун дуллунни балжисса жаваб­ру.