Учала бур, гьантта лаглай, чIун лаглай, аьрщи лаллай, оьрму цIу буклай, оьшиврул ялун ххуйшивуртту диллай, инсаннал дакI паракьат шайссар тIисса. Мяйжаннугу, аьпалухьхьун лавгминнах кьулгьу-алхIам ккалайна бунагу, маоь бувкIминнал ужа­гъирттаву хъатIи-хъиншивуртту хьунни, янна лирккун уттукъабихьлай бивкIсса, хъян хъамабивтсса халкь ххуйсса оьрмулуха зий бур.

Амма 71-гу шинай дяъвилул чIурду ва бивкIулул асарду баллай бур дунияллул дя­къурату. КIулсса куццуй, дунияллийсса паччахIлугъру ца даражалул да­къар. Вайгу дур цаннищал ца дяъвилий. ЧIирал кьатIату бурувгнан кув тIайлану, кув къатIайлану чIалай дур, кув паччахIлугъирттал цала вив, цащала цалагу шай чIявуну дяъви.
ЧIярусса хъунисса, мюрщисса хIукуматру дур цIана АмерикIанал мукъула, биялдарала дуккан къахъана­хъисса. Дяъвилия махъсса вайксса шиннардий цайнна мютIи къахъанахъими паччахIлугъру мютIи дан АмерикIанал я па­ччахIлугърал вивсса цала чулий бацIлацIиминначIа бавцIуну, гай мютIи къахъанахъиминнащал дяъвилий буккан бай, ягу цайнна мютIимур паччахIлугъран кумаг бувну, къамютIимунищал дяъвилий дуккан дай.
АмерикIа жулва билаят­рал лагма ттуршвахъул аьра­ли базарду бувну, чIаххувсса хIукуматирттай ПРО-рал бару буллай, жувунна нигь рутан­сса кьасттирай бур, дунияллий цалла дуллалимунийн яру лакьин бан.
Дунияллул тагьар укунсса дуни, жуйнма къаршицириннал хьхьичI бацIанссагу, жущала дусшиврий­сса хIалашиву думиннал чIарав бацIанссагу гуж Аьра­сатналгу бушиву ккаккан бан багьлай бур жула паччахIлугърал бакI дургьуминнан.
Майрал 9-нний аьралу­ннал парадру къадуллайна, Ххувшаврил кьини кIицI дуллали­сса, дяъвилий ливтIуминнал аьпал­унсса, бивкIу чIарах бувккун бувкIминнал хIурматрансса демонстрацияртту дантIиссия, дунияллий ялув кIицI лаглагисса куццуйсса цIакьшиву чIалачIи дуллалисса дяъвирду буллайна къабивкIссания, Аьра­сатнал лагма рургьуну, цаламур ка ххув хьунсса сантру дутлай къабивкIссания.
Жува къаччиминнан ччикун­сса даражалийн Аьрасат тачIав къабагьайшиву чIалачIи бунни гьашинусса майрал 9-ннийсса аьралуннал парадралгу, мюрщи щархъайн бияннинсса циняв халкь кьатIув бувксса, дяъви хьун къабитанну, хьурча, душманнал тур гъагъанну тIисса пик­рилийсса демонстрациярдал.
Дагъусттаннай 300 азара мюрщисса, хъунив хьусса, дяъвилий бивкIсса, захIматрал фронтрай бивкIсса инсантал бувккун бур демонстрациялийн, чIявуссаннал кIунттихь дяъвилий жагьилсса жанну дуллуминнал суратру дия, дяъви къаччишиву бусласисса, дуниял паракьатну дитияра тIисса плакатру дия. ЧIявуссаннал бунни дакьаву чIа тIисса ихтилатру.
Дагъусттаннал шагьрурдай, райцентрдай хьусса «БивкIу ба­къасса полкирал» демонстрациярду телевидениялувух кка­ккан дунни, кказитирттай рирщунни.
Ккаркминнуяр оьккисса къархьунни Ккурккуллал шяраву хьусса Ххувшаврил кьинилун хасъсса кьатIув буккавугу. Ккурккуллал хъун ккурчIа бувцIуну бия, шяраву кьатIув ­уккан бюхъайма увкIун. ЧIявусса бия шагьрурдая бувкIсса. Вай гьарца шинал батIай ккурчIайн. Кув кьабивкIун, пахъ багьаврил минутI дуллалисса кунма бикIай, кув дунияллул тагьар далглай бикIай. Лагма бавцIусса халкьуннал хьхьичIух бивхьуну бур 62 кIану. КIанттай 62-гу фронтрая зана къабивкIминнал автобиография, дяъвилул ххуллуя чивчусса, суратирттащал­сса альбомру бия. ОьрчIру кьабивтун фронтрайн лавгминнал оьрчIал суратругу дия альбомирттаву. Трибуналийн лавхъун, чIявуссаннал иттав макь дучIан дурсса Ххувшаврил кьинилун хасъсса махъ лавхъунни вай альбомру щаллу бувсса, шяраву Ххувшаврил кьини сакин дур­сса школалул директор Даниял Магьдиевлул. Махъру лавхъунни фронтрай ливчIминнал гъанчунал, шяравуссагу, шагьрулия бувкIссанналгу.
Махъру лавхъун махъ, ккур­чIай буцири кIанттайсса аль­бомирттачIан гъан хьуну, ми ххал буллан бивкIунни.
Итабавкьунни дяъвилул шиннардийсса балайрду. ХъатIайсса балайлух, къавтIаврих циняв вичIилий къабикIай. Вай балайрдах циняв вичIилий бия пахъ багьну. Махъру къабувчIайссагу цаягу акъая, музыка якьама къабивзссагу акъая. Цаппара хIал хьуну итабавкьунни «Священная война», «Артиллеристы», Расул ХIамзатовлул «Журавли» тIисса балайрду. Вайннухун кьюкьа дурну школалия ккурчIайн бувккунни циняв дук­лаки оьрчIру. Вайннал чIарах най бия учительталгу. Шамила дурккунни кьюкьа ккурчIнил лагма бавцIусса халкьуннал хьхьичIух. ХьхьичI ттугъгу бувгьуну, строевой шаттирай най ия лахъсса, аьра­ли формалуву­сса, 11-мур классрал оьрчI. Га ия Гъужиев Минкаил. Ганал хъуннасса авур дучIан дунни кьюкьлул. ДакIнийн бивчунни фронтовиктал. Хъирив 62-гу виричунал сурат канил дургьуну най бия дуклаки оьрчIру. Вайннал хъирив мюрщисса ттугъру кIунттихьну наниссагу бия.
КкурчIайсса лахъурттай щя­бивкIсса бугьарами цайнува цивппа лавай бивзунни кьюкьа цала хьхьичIух наниний.
Шамила лагмагу дурккун, дарцIунни кьюкьа, кьабагьунни музыкагу. Дяъвилийн лавгминнан дацIан дурсса гьайкалданул хьхьичI бавцIуну, ца душнил циняв аьрая кIура къабавминнал цIарду ккалай бия, перекличка дуллай, цIа увкукун сурат кIунттихьманал жаваб дуллунни «Нара» куну. Ва кIанугу халкьуннал дакIурдивун хъинну бювххунни, чIявусса хъювусул бувккунни. «Бессмертный полк» тIисса чIурчIав хIукуматрал чулуха гьашинунин къархьунни, Данияллул 30 шин хьунни укун­сса полк щарнил хьхьичIун бу­ккан буллай, дяъвилия кIура къабавмигу буттал шяраваллил халкьуннащал архIал нани буллай.
Ца чIумуцIун, кIанттуцIун даркьусса даву укунссагу хьунни. Аьли­ева Ханичал цила чивчусса «Виричушиву абадссар» тIисса, фронтрая кIура къабавминнаха бувсса назмурдал луттирду бавчIунни гъанчунайх ва цайминнайх.
БатIаврил ахир дунни Каспийск шагьрулиясса Республикалул инженерный колледжрал хIадур дурсса концертрал. Ва концертрал хъинну чIюлу дунни школалул дурсса хъунна­сса даву. Вайннал чIалачIи бунни Аьрасатнал халкьуннан дунияллий дакьаву ччай душиву, къавтIисса, балай тIисса оьрму ччай бушиву.
Цинна щарнил ххирашиву, дакьаву чIа тIишиву чIалачIи бунни, щилчIав заказ къабувна, хьунадакьлакьисса хъуннасса кьини барча дан, укунсса коллективгу бувцуну бувкIсса Абачараева Анжеликал. Ванищал бия колледжрал зузалт Асият ва Сабина Закировнахъулгу. Ккурккуллал жяматрал чулуха хъунмасса барчаллагь тIиссару вай душварахь, концерт дуллуминнахь.
Майрал 9-мур кьинисса демонстрация Ккурккуллал дянивмур даражалул школалул гьарца шинах укунна асар хьунну хьунадакьай. Ва даврил бакI дургьума, режиссер ур Даниял Магьдиев. Ванал лагма лагай циняв учительталгу. Ва даву кьунуцIун диян дурсса душиву чIалай бур ванихсса райондалул къулагъа­с­рал. Ххувшаврил кьини Ккурк­лив хьхьичIмур кьини хьунадаркьуну, майрал 9-нний Гъумук дуллалисса райондалул демонстрациялийнгу оьвчай ванайн, администрациялул тавакъю бувну. Ва кIанттулгу бишлай бур Данияллул даврин кьимат.
Халкьуннал цIаний шагьид хьуми тачIав хъама­къаби­тантIиссар. Демонстрациярду хъананнав ярагъ бакъасса, цIакьшиву ккаккан къадуллай, дусшиву чIалачIи дуллалисса.
Ккурккуллал жяматрал цIания
Аьвдуссалан Магьдиев