Чансса бакъар жула дянив личIи- личIисса жаваблувсса давурттай эбратранну зий бивкIссагу, зузиссагу. Цаппара мукунминнал давриятугу иширттаятугу лагма- ялттунан кIулну бикIай, цаппараннаяту тIурчан, цичIаввагу кIулну къабикIай. Хаснува ми хIукуматрал мюхчаншиву дуручлачисса органнал зузалт бухьурчан. Миннал давугу, оьрмугу лагма- ялттуминнал итталун къабагьну лагай. Мукунминнавасса ца хъанай ур Хъусращиял шяравасса Гъургъаев Исякь Сулайманнул арс, цал оьрчIшивугу, жагьилшивугу бигьа дакъасса, ларгсса ттуршукулул 40-50-ку шиннардийн дагьлагьисса.

Гъургъаев Исякь увну ур 1926-ку шинал Хъусращиял шяраву захIматчинал кулпатраву. Циняв га заманнайсса никирал оьрчIан кунма, Исякьлунгу ккаши-мякьгу ккавккун бур, захIмат бувну лявкъусса ччатIул кьадругу бувчIуну бур. Яла-яла, оьрмулуву агьаммур кIану кIулшиврул бугьлай бушиву бувчIуну бур. Мунияту бу­сса хIарачат дуккавриву бивхьуну бур. Шяравусса школа къуртал байхту, дуклан увххун ур Гъумуксса педучилищалийн. Мугу къуртал бувну, 1950-ку шинал Гъургъаев зана хьуну ур цала шяравун, зун ивкIун ур муаьллимну школалий. Цалла давриву жаваблувшиву дусса, кIулшиврийн хъита тIисса, школалул коллективраву бусравшиву ялу- ялун ххи хъанахъисса Исякь итталун агьну ур райондалул партиялул иширтталсса буллалиминнан ва, ца шин муаьллимну зий дайхтува, увцуну ур Ккуллал ВЛКСМ-рал пионертуращалсса ва школьниктуращалсса даврил отделданул хъунаману. Шикку зий 2 шинал мутталий цува хъинчулий ккаккан увсса Исякь, райком комсомолданул рекомендациялийн бувну, лавгун ур та чIумалсса цал МГБ-лул, яла КГБ-лул органнаву зун. Ми органнавун агьангу та чIумал бигьасса иш къабивкIссар, цанчирчан мивун кьамул байсса бивкIссар яла хьхьичIунми, царагу чулуха оьрмулуву, давриву, хасиятраву щилтагъшиву дакъами.
1952-1955-ку шиннардий МГБ-лул школагу къуртал бувну, Исякь зун ивкIун ур Дагъусттаннал рес­публикалул КГБ-лий 7-мур отделданул оператив зузалану. Цалнияр цал даврил сантгу лахьлай, кIулшивугу ларай дуллай, Исякь цалва къуллугърал шачIанттайх лахълай ивкIун ур. Оператив зузалаяту оперуполномоченный, яла старший оперуполномоченный, яла тIурчан, отделданул хъунаманал хъиривчугу хьуну ур. Мунищала архIал кIулшивугу лахъ дуллай ивкIун ур. 1964-ку шинал къуртал бувну бур КГБ-лул Лахъсса школа, цимилгу бувккуну бур пишалул кIулшиву лахъ дайсса курсру.
1966-ку шинал ивтун ур Къизлардал шагьрулул КГБ-лул отделданул чIумуйсса начальникну, яла тIурчан, начальникну. Ва даврий итаврил ккаккан буллай бур Исякь ляличIисса, цайнува цува жаваб дулун бюхъайсса даврий зун лайкь хьусса зузала ивкIшиву.
1978-ку шинал ва зун ивкIун ур Хасавюртуллал шагьрулул КГБ-лул отделданул хъунаману. Къуллугърал хъуниминнал дуллусса характеристикалийн бувну бакъассагу, архIал зий бивкIминнал бусласаврийн бувнугу, Исякь гьарца ишираву вихшала дишинсса, цайва бивхьусса бурж дакIнийхтуну биттур байсса ивкIун ур.
КГБ-лул органнал подполковник Гъургъаев Исякьлул къуллугъ кьабивтун бур 1984-ку шинал, цIуллу-сагъшиврул тагьарданийн бувну. Запасрайн увккун махъ кулпатращал архIал Хасаврайва ялапар хъанай авцIуну ур. Чув унугу, Исякь, цала даврийсса гьалмахтураву акъассагу, лагмасса жяматравугу, кIулминнавугу, кулпатравугу бусраврайсса инсан ивкIун ур. Цалва кулпат Минажатлущал тарбиягу бувну хъуни бувну бур арс ва душ. Арс Батирдулгу, ирсирай кунма, язи бувгьуну бур ФСБ-лул органнавусса къуллугъ.
КГБ-лул органнаву зий 32-хъул шиннардий Исякь лайкь хьуну ур чIярусса бахшиширттан. Ванан дуллуну дур шанмагу шачIанттул «За безупречную службу» тIисса медаль. Цалва къуллугърал бурж бакъассагу, бартбигьлай ивкIун ур жяматийсса къуллугърал буржругу. Хъусращатусса Сулайманнул арс Исякь жуятува лавгун ххюра-ряхра шин хьунни. Вай аьрапалул гьант­рай, бусраврай аьпалувух кIицI ан ччай бур, дакI марцIну, къуллугърай захIматгу бувну, узданну оьр­мугу бувтсса инсан.
С. Чугуев