1917 шинал Гьарун Саэдовлул хIарачатрайну итабакьлай бивкIсса «Илчи» кказит цIуницIакул дунияллийн буклай байбивхьуну хъанай дур 25 шин. Инсаннал чурх зузи буллалисса оьттул туннурду кунма, миллатрал кказитгу хIисав хъанай бур лакрал багьу-бизулия, лахьхьусса ва хIакьинусса кьинилия бусласисса информациялул щаращину.
Му щаращи, бацIаву дакъа, зий хьунни 25 шин. Щалагу билаятрайх кIама бивщусса лакрачIан бучIай «Илчи» чIа увкусса ссайгъатну, буттал кIанттуятусса личIи-личIисса хаварду лавсун.
Жугу, Гь. Саэдовлул цIанийсса фондрал лагма лавгсса вакилтал, Ваччиял жямат, барчаллагьрай буру «Илчи» кказитрайн, мунил жула чулухуннайсса аякьалухлу. Жул фондрал ттинин дурсса агьамсса давурттив кьадрулий цимилгу кIицI ларгунни «Илчилул». Жугу жула чулуха бюхъайссаксса хIарачат буллай буссару, ттигу буллантIиссару, кказитрал подпискалуцIун кабакьаврил ххуллий. Жу мудангу буссару вил чIарав!
ДакIнийхтуну барча дуллай буру вил юбилей, чIа тIий буру тIайлабацIу. Жулва миллат вийну мудангу цачIун хъананнав!
Гь. Саэдовлул
цIанийсса фондрал
вакилтал,
Ваччиял жямат
