Хъун мизитравату чакурдия зана хьуну, Зайду цала дус Мяммащал увкIун ур Ма­къихъаннийн. ЩябивкIун бур ВацIилуйннай дирхьусса Ма­къил Мяммахъал чIири ларзулу. ХьхьичI бивхьусса чIиви столданийсса цIай-цIай тIий ссуку дурсса дукнилул самоварданул макьан дурцуну диркIун дур.КIийннай чIамуй дирхьусса пар-пар тIисса пюрундалущалсса лампалул чани дахьа-махьа биллай бивкIун бур ссупралийсса хъахъи ккунук ялтту бувксса хамил ччатIул лиссурттайн, чIири бушкъаправусса ­яттил нисирал чIутIлийн, лагаврил цулхълуйн.

ХIарчIния, дуркуния тIий, ялун кьус диркIсса АтIа цIу­рукьин дуллай диркIун дур я цила арснал, я ганал уссу куна­сса дус Зайдилавл хьхьичI бивхьусса кьисматрайн бисмиллагь къабуллалаврил. Циривав хьу­сса? Цаннивав симанну гъав ларгсса? АтIал тинмай чIирацIсса мутакилданийн чул бувну, чIюн кIунттивун лавсуна. Душру къат­рай бивтуна. АтIа оьрму щалава ва арснаву – ванан бан­сса кулпатравух, ваная бизан­сса оьрчIавухсса хияллай бия. Шинну най дия. Жагьилгу игу ивну, цахъи кIихунайгу хьуну ия. ЧIунни, чIунни! Ччяни ташулул хьумагу, ччяни дурку­сса кIюрххилссаннуягу пашман къашайссархха!
— Вагу бикIайссарив, уссу Зай­дий!
— Яржамур мегъайн та биян­ссарив, – арснал ссихI кIуну бивгьусса хIисав хьуна.
— Жуйнма яржа бияннин ялугьлангу къабучIирхха, — хъиннура лагьсса Зайдилавл жаваб, — аьркинни тай мюталимтал царив, цирив кIул бан!
— Мяммай, уссу, ачу та жува цакьнива тIийкун баннуча – лагьсса чIу.
Цири вай цакьнива тIий бивкIсса? Цири бан нани­сса? Арснал циятува цичIав кьюлтI къабайссияхха. Самоварданул чIу хъиннува гьаз хьуну бур. Макъил АтIан баллай бунугу, арснал ва ганал дуснал му­къурттил мяъна дурчIлай диркIун дакъар. ХьхьичIва цила арсгу, Зайдилавгу цачIун багьний куннахьку шеърирду ккалан бикIайссия. Гьархьхьунурив ихтилат шеърирдая бакъаяча, цирив цавай мегърая бия. Ци мегърир? Ци ссавурди? Циванни арснал симан гъав ларг­сса? Я чIавану буттал къатлуву, я ласкъатлуву чиваркIуннал ихтилат­равух хIала духлан цинма къааьркиншиву кIулссия. ТачIав хIалагу къадуххайссия. Амма ихтилатрал бакI-магъ дукъарчIлай тIий духьунссия ниттил хханххиравух тIааьн бакъасса ххурххулул асар ццихьливух личлачисса. Цири цакьнива тIийкун байсса?
ХIусман-кьадинан бувмур лялияннин, вана хIакьину цичIав тахсир бакъасса ХIуснил Муса бивтун утан багьарчан? Цирив къакIулсса хъяшхъар кьункри багьана бувну!
ХIусман-кьади ивкIун ур шайкун тIайлану аьдлулий диван байсса инсан. Диван байни ХIусман-кьадинал хьхьичIун дяъвикарнал я хъус, я кьини къадагьайсса диркIун дур. Агълардухьгу итта-иттав бумунин бур, бакъамунин бакъар учайсса бивкIун бур. Мунилгу ХIусман-кьади халкьунначIа сийлий, хIурмат лавайну ивкIнугу, Агълардуннив салихIну ивкIун ­акъар. ХIусман-кьади халкьунначIа сийлуву, хIурматраву ушавугу Агълардун цува ялавай авуну чIалай ивкIун ур. Пикрилуву луг­лайгу ивкIун ур ХIусман-кьади гъагъан анмуних.
Кьинирдал ца кьини Агълардул нукар гьан увну ивкIун ур ХIусман-кьадинахъаннийн Маммийн оьвчин. Агълардул арснайн оьвтIаврил ХIусман-кьадинал дакI ццихь учин дурну дур. «Циванни оьрмулий акъачIин арснайн Агълар оьвтIисса? Манарда! Нава лавгун кIул анна циван оьвтIиссарив. Шава акъая учин анна нукар». Буттах арснал вичIи дирхьуну дакъар.
Агълар-ханнал бивкIун бур ттигу хьхьурттарал къабувсса, хансса айгъур. Жагьилнайн ханнал амру бувну бур:
— Буртти икIуча, Ччярав ияннин ххяххан ба! – куну.
ЛулттулахIинну чIуен дан ччай, Мамми чал тамур чулухун увксса хIисав хьуну, Агълардул хъяхъавривух:
— Ярч, жагьил акъарав, нигьаувсун урав? Буртти икIу, ххя­ххан ба!
Намус личIлулшивруяр ххув хьуну, Мамми буртти ивкIун ур. Мархь лавай гьаз баннинма айгъур ссукIа ххявххун бур. КIуруннахух хьуну, чIаттирацIун ияннин али-кIилттаращал цувагу лякьлулун лавгун, хансса чал Мамми ппив увну ур.
Шава ХIусман-кьадинал буллай айивхьусса чаклил ца зачат дутансса иш хьуну бакъар ца акъа-акъасса арснал нурчIи ялун дирну. Муна му къумашиврул дягъуву бивкIун бур ХIусман-кьадинахъал тухумрал къярт­ри диллалисса цуму уздантал – МахIаттахъул, ХIамидхъул, Аьвдухъул, Къячахъул.
Хъун мизитраву ХIусман-кьадинал нязаннив язугъну ивкIусса арснахсса зикрилия зана хьусса Зайдилав ва Мямма цала чIунархIал дуснал бивкIулул цIуницIа дард цIу лаган дурну бивкIун бур.
— Цуксса хIаллайру, уссу Зайдилав, бухIлантIиссавагу!
КIия цIанихсса шаэр, кIия дус Макъил Мяммахъал ларзулу, чIиви чирахърая липI-липI тIисса чанналу, миллатрал ялун бивмур итталух нани буллай, кьабагьну бур. КIинналагу пик­ри хьумунива хьунмуничIан букIлай бивкIун бур. ЦIурттавух цIансса ссавнийх гьузузисса зурул ххяччагу гьам лухIи ттуруллал дугьавай, гьамгу итххярххун, чаннацIурттавух хIала духхавай диркIун дур. КIукунма кIиягу дуснал пикрирдугу цIансса захIматшиврувун лагавай, умуд­рал чанна бавай бивкIун бур.
— Ци тахсиръя ХIуснил Мусай? Нукарнахь бивтун утан увсса?
— ВицIхъири душварал бив­кIу?
— Пагьламанналмур бивкIу?
Ва ишгу хьуна дукIу гъин­ттул.
Шагьрулувуцириннал буллалисса тамашалувух ханнал бикагу бивкIун бур чIавахьулттивух тамаша буллай. Цинявннавух бикагу хIайран хьухьувияв пагьламаннал сисаврий. Ганал хьхьу­ттайх лавхъун най унува, ссукIа къутта дурсса ишираву га мискин агьну бат шавай урхха тIий, биканавату вев ливчуну бивкIун бур. Пагьламан лахъай къази­хъирттай бавхIусса хьхьа гьунттий пагьламан лахълахъиний, цакуну бувцун бур. Мискинсса пагьламангу, урундалул тIурщи лирчуну гьан дайсса кунна, ливчуну кIива кIихунай, гъюжу увккун ур. Ца ххалуй кунма бавцIусса га хьхьа, пагьламан лавхъун, хьхьуттал дянив ияйхту, ливчуну лавгун ур. Га хьхьа чIиллух кьувкьуну бивкIсса цинявннан аьлттугу хьуну бивкIун бур. Шагьрулуву га Агълардул даву душиврийн щаклийгу цукIуй ивкIун акъар.
Кьабагьсса кIиягу яхIлунан тамансса ялагу зулмулул ишру дакIнин багьну бур. Гай дакIнин бичавурттал дакIурдива къювулущал ялун личин буллай бивкIун бур циявсса ца ццахлищалсса пикри: «Зулму бухIлан къабучIиссар. Ци-бунугу бан аьркинни», — тIисса.
Бюхъай кIай дакIнийн бичавурттал чIявуссаннавух вайнналгу дакIурдивун, цаппара шиннардил танияр махъ хьунтIисса бунтлинсса гьукIан бувтун бикIангу. Ялагу ихтилат кIайва зулмулухьхьун биривминнайнма кIура бавуна:
— Цуксса хIаллайру бухI­лантIисса? – ялагу Мяммал кIава суал.
— Цакьнива жува щавшсса куццуй, ачу ШамиллучIан! Ххал банну тийхгу ци иш-тагьар дурив.
— Мюридталну?
— Мюридталну.
Та хьхьу ларгун дур тихун гьансса куццул, цащала ласунмунил пикри буллай.
— КIул бан аьркинни тай мюридтал цала оь ссахлу экьибутIлай буссарив. Аьркин хъанай бухьурчан, жувагу жула халкьуннахлу оьгу экьибутIинну, зулмугу яла гьан банну. Бусила, уссу Зайдилав, винма кIулхьурчан, тай мюталимтурал талатаврил мурад ци буссарив?
— Мюридтурал чай тIар, бусурманчу тачIав, чувчIав лагьну икIан къабюхъайссар. Чув ухьурчангу бусурманчу тархъанссар. Бусурманчунал щилчIав бувсса зулмугу къабухIайссар.
— Гьаннайсса, уссу, ина тIий­кун бухьурчан, мюридтал цала тархъаншиврухлу…
— Дакъар жучIара бусурманнан му тархъаншиву. Мюридтал гъазаватрай бувккун бур цайра ххяппа дизан нанисса оьрус паччахIнащал. Жущава шикку му гъазаватрай буккан бюхълай бакъар.
— Цанни?
— Ургу ина та Ярттакъалаливсса оьруснал аьралуннах! Тайннал хIаписартурах! Тайннал ттупах! Тайннал ярагъуннил къярзлих!Тайнна тайннайн чул бивщунурхха Агълар жула халкьуннай бурттигу ивкIун, гайннал вичIая ччармузивгу дуллалисса.
Та хьхьуну кIиягу шаэрнал, кIиягу дуснал, кIиягу цала халкьуннал цIаний оь экьибутIин хIадурсса яхIлунал пикри цанин бувкIун бур. ХIаллицIух, щинчIав хавар къахьунну, ШамиллучIан гьан.

***
Бачлансса сант дутлай гъигу ларгун дур. Дайдирхьуну дур ссутгу. Гьунттий ххуллийн буккан гьархьхьунусса хьхьу кIиягу дуснал дуртун дур, чин щак къабагьан, Гьухъаллал ччувччу мизитраву.
Къакъулай бивзхьунссия вайннан мюридтурал оьрму. КIиягу зана хьуну бур шаппа-шаппай. Цайнна хаиншиву дурну, ШамиллучIан ливхъшиву хьхьичIва хавар хьусса Агълардул, бувгьуну личIи-личIину кIаланнувун бавкьунугу бур…

***
Арснал дардирдал къазразан дурсса АтIа – Макъил Мяммал нину – занай диркIун дур махъ наницириннацIух кумаг бара, ххассал увара цила арс, цила ца акъа-акъу тIий, ханнахь рахIму бува учара цила арснай, тIий. Ханналгу цачIана увкI-увкIманахь чайсса бивкIун бур:
— Ттуйн хаин хьуми абадлий кIаланнувату къабуккантIиссар, — куну.
Яла букIлакIими чIяву хъанан бивкIукун:
— Агана ина Макъил Мяммалгу, Ккурккуллал Зайдилгу цIаний гъалгъа бан ччай ухьурчан, му цуппа бити. На муних вичIи къадишинтIиссар, — чай­сса бивкIун бур Агълардул.
Макъил АтIаннив я уттудирхьусса шаний шану бивкIун бакъар. Хьхьу гьайсса диркIун дур кIа хъунасса заннайн ле­ххаву тIий:
— Хъунасса Аллагь! Лухччи-ссав ляхъан дурма! Вин кIулли инсапрал ххуллу! Ххассал ува ттул чара бакъасса арс! Ма­махIрум бара ссурвалгу, хъуннар хьусса нинугу! Ххассал ува залимнал зулмулуща!
Аллагь! Инава ялув ура­хха! Вин чIалачIиссархха! Къадурссар ттул арснал инсаннал намусрацIун дакъаркьусса къел! ЦIими биша, Зал, рахIму бува, Зал!
КIукун бан-битан бухлавгсса АтIахь кьинирдал ца кьини щиллив маслихIат бувну бур:
— Бюхъай кIанал ХIусман-кьадинах вичIи дишин, — куну.
Амма гиккува: — Танахь ханнал хьхьичI ацIу чин щища хьуви! – куну, жагьжилну зумух лавсун бур.
АтIал цимигу гьан­тта хьу­ну бур цила къума­сса дакI­нищал ХIусман-кьади­нахъал дарвазалучIан дучIавай, да­цIавай, духхан сикъарсуну, зана шавай. Ахиргу: «КIюрх инсаннал дакI марцIсса чIуннихха», — куну, ХIусман-кьадинахъал хъун дарвазалул дукнилул куянттуйн кьюч бивгьуну бур. БухкIуллийх захIматну ша лавсун бур. ХIусман-кьадинал щар­сса Акъа хъюву бухкIуллийсса самоварданувун щин дутIлай дия тIар. Танил бакIрая ччаннайн дияннинсса лухIилулгу цила бан нанисса миннатрал хьхьичIалу кьукьин ца чансса иш ливчIун бур. Амма арснах­сса ччаву намусраяр ялтту дур­ккун, къамахъуннай ларгун дур. Багьай­сса сурагъгу бувну, кIийн лархъун дур. ХIусман-кьадий усса къатлул нуз тIитIин сикъаслайгу аглан хьуну, ват-ват тIисса дакIнищал куянттуйн ка гьан дурну дур.
ХIусман-кьади ивкIун ур авлул чаклилунссаннуй, нур­пахIливу Кьурандалул лугу бивхьуну, ккалай.
— Агь, АтIай, дуркIрав, гъарин? Ча дуркра! – кьурандалул лу ва канил хъаралу бивхьуну, нурпахIгу тамур каних лавкьуну, АтIал лувату лавай ивзун ур.
— Духху, АтIай, щядикIу!
АтIа нузахра дарцIуну, лухIи-цIансса лачакрал ланттулувун лажингу ларкьуну, аьтIун диркIун дур.
— Духху, гъарин АтIай! Ссавур вихьхьун заннал дулуннавча!
— Вилмур балаллул хьхьичI аьтIунсса кIану ттул чув бу­ссар, ХIусман-кьадий! Бунагу, макь дугьлай дугьан хъанай дакъара.
АтIа ялагу щякъадиркIун дур. Цукунни цала арс ивкIу душманначIан насу учинтIисса? Ци мукъурттири ва хъунбигар бишинтIисса? Арс ивкIуну махъ ХIусман-кьади ханнащал ххав­ххун ивкIун ур. Тания махъ ларг­сса щаллусса шинай ХIусман-кьадинан хан янин ккавккун ивкIун акъар. АтIа цаннинна дучIаврил мурад бувчIуну, пашмансса чIуний хIаллих куну бур:
— АтIай, чIалай дура циван дуркIссарав. Ххал банна гьан шайрив, — кIукунма лагьну, пашманну куну бур ХIусман-кьадинал.
Чурттурдайх яларай хъювсулну дурчIун нанисса АтIа хIисав хьуну, Акъал куну бур:
— Аман, АтIай, на ка шюршуну, мин найявхха дусса. ХIусман-кьадинал къаччан бикIанвагу къабуврив, ссу?
— Къабунни, ссу, барчаллагь, Акъай.
АтIа шардай ларгун дур.
Цала байсса чакгу бувну, буккайсса кьулгьу-кьурангу бувккуну, ттиркьюкьал ранг­сса чалмагу бакIрай дархIуну, щюлли авагу ялтту ларххун, ХIусман-кьади кьатIув увккун ур. Авчунугу ур ханначIан.
КIуруннахух лавай най, ХIус­ман-кьади ххал хьуну ур ханнал нукартуран.
— ХIусман-кьади най! ХIус­ман-кьади най ур, — куну бур.
Агълар, тIанкI куну, ивзун, нузачIан ххявххун ур, танал хьунин уккан. Ялагу, зана ивкIун, щяивкIун ур. Цахъи хIаллава ялагу лавай тIанкI куну ивзун, нузачIангу ивну, махъунай щяивкIун ур.
ХIусман-кьадинал нуз тIи­тIайхту, лувату, тIанкI куну ивзун:
— ХIусман-кьади! Къарабуз! – куну, ка тIиртIуну дур. Дургьуну дур танал ка.
— ХIусман-кьади, щяикIу!
— ЩяикIан къаувкIра, — кIава цала лагьсса, пашмансса, бю­ххансса чIуний куну бур.
— ХIусман-кьади, бувчIлай бур ина циван увкIссарав. Ма­къил АтIал я щархъай, я шагьрулуву ттучIан гьан укъавсса къаивтунни.
— Гьу, туну? – суал итта-иттав бивхьуну бур ХIусман-кьадинал.
— ЩинчIав мютIий къавхьуссияв, ХIусман-кьадий. Ина увкумунивату ттуща уккан къахьунссар.
ХIусман-кьади та нузахатува никъурай зана хьуну, шавай лавгун ур.
Гьунттихавай ханнал амру бувну бур дуснакь кIаланнувату буккан бан.
Та кьини кIаланнувату кьа­тIув бувккукун, мурчIину цичIар чIалай дакъая тIар. Нукартурал чIирачIанмай бувну, цахъи хIаллава яру тIитIара куну бур. Тинай мурцIув Ругъу ия тIар щяивкIун, чIатуллува кьяртив дурккун, мицIру бусса, дюрчIусса, сакку ххалаххив уксса, тIантту дуллай.
Ва чIумал увккун ур ларзулун Агълар-хан. Амругу бувну бур гилун хъювун:
— Зайдилавл мицIмазрайн кьутIара! Ккурклив ияннин цала дарвазалух дакъа дугу мадуккари, — куну бур.
Га тIаннул ххалаххи нукарнал кьувтIуну бур Зайди­лавл мицIмазрайн. Ганал кьацI­ливатугу чап-чап тIий нанисса оьтту ккурттулийх ялавай экьилавгун бур.
Макъил Мямма танмихI къа­бувну итаавкьуссия тIар. ХIусман-кьадинал арснан цала бувмургу кIулну, цачIана миннатрай увкIсса ганал лажингу Агълардул хьхьичI дарцIухьунссия.
Курзи Къажлаева