Республикалий гьашинусса 5 зурухлу тIювалул-коммунал хIаллихшиннахлусса багьри къатIайлану ккаккан бувну бивкIшиву тасттикь бувну бур ПаччахIлугърал тIювалул инспекциялул. 700 азаруннияр ххишаласса къурушру дагьайссаннуяр ххишала ккаккан дурну диркIссар га ведомствалул прессалул къуллугърал бувсмунийн бувну.
ХIасан Аьдилов
Шинал дайдихьулия шинмай Дагъусттаннал Госжилинспекциялийн бувкIун бур 150-нния ливчусса аьрзарду ЖКУ-лул хIаллихшиннахсса багьри хIучча бакъа ххишалану ккаккан бувну бушиврул хIакъираву. Миннувасса чIявуми аьрзарду бур къатри дакьин даврихлу, газрал щаллу баврихлу, токрал щаллу баврихлу ва цаймигу хIаллихшиннахлу багьри къатIайлану ласаврил хIакъираву. Ми аьрзардал хъирив бивзун ххал бувсса Дагъусттаннал Госжилинспекциялул чирчуну дур 82 предписание къатIайлану ккаккан бувсса ЖКХ-лул хIаллихшиннахсса багьри тIайла бацIан баврил хIакъираву. ХIучча бакъа къатIайлану ккаккан дурну диркIун дур 910 азарда къуруш. Миннувату хIакьинусса кьини тIайла дацIан дурну дур (перерасчет) 700 азарда къуруш, ми зана дурну дур муштаринахьхьун. Масалдаран, бувкIсса аьрзардавасса ца бур «Авангард» тIисса багъманчитурал товариществалуву Каспийскалий цалва къатраву ялапар хъанахъисса инсаннал аьрза «Газпром межрегионгаз Пятигорск» ООО-рал хIучча бакъа 524 азарда къуруш буржирал ккаккан дурну душиврул хIакъираву.
Му аьрзлул хъирив бивзун, Инспекциялул кIул бувну бур кIай къатри залуннал ларсун душиву 2013 шинал. Му чIумалнин хьусса бурж (сайки 384 азарда къуруш) газрал поставщикнал ласун аьркинссия хьхьичIма залунная.
Инспекциялул дурсса расчетрайну, абонентнал бурж 2013 шинал ноябрьдания 2016 шинал апрельданийннин хьуссар 88 азарда къуруш.
Мукунсса аьрзарду Госжилинспекциялийн бучIайссар муданма. Гайннул хъирив бивзун, къатравун лавгун, кIул байссар хIучча бакъа къатIайлану багьри ккаккан бувсса ишру.
