Июньдалул 7-нний хьунни Аьрасатнал Ухссавнил Ккавкказуллал иширттал министерствалул коллегиялул цалчинмур заседание. Ганий гьуртту хьунни Дагъусттаннал БакIчи Рамазан АьбдуллатIипов. Ти­кку ихтилат байбихьлай, АьФ-лул Ухссавнил Ккавкказуллал иширттал министр Лев Кузнецовлул бувсунни регионнал каялувчитал, Федерациялул Советрал, исполнительный властьрал органнал вакилтал хьунабакьаврил мурад хъанай бушиву 2015 шинал хIасиллу даву ва гьашинумур шинал масъалартту ххал бигьаву.

Аьрасатнал ХIукуматрал Председательнал хъиривчу Александр Хлопониннул бувсунни ва мероприятие СКФО-рал аьрщарай даву тIайласса за бушиву.
Александр Хлопониннул бувс­мунийн бувну, 2015 шинал хIасиллан хасну промышленностьрал производство лахъ хьуну дур 102,3 процентрал, аграрий комплексралсса – 103,2 процентрал, Ккавкказуллал округрал регионнайн бучIайсса туристал ххи хьуну бур шамлий, дукIу бувкIун бия 2,7 млн. инсантурал. Ганал хъунмасса кьимат бивщунни Дарбантуллан 2000 шин шаврил шадлугъру даврин.
2015 шинал дурсса давурттал хIасиллая ва щаллу бан аьркинми масъаларттая бувсунни Лев Кузнецовлул. Ганал мукъурттийн бувну, яла хьхьичIунми ккаккияртту хьун дурну дур обрабатывающие производстварттал (104,1%), электроэнергия лядуккан даврил, газрал, щинал производстварттал (102,1%).
«Ларайсса ккаккияртту хьуну дур СКФО-рал регионнай строительствалул бутIувугу. 2015 шинал СКФО-рай строительствалул давуртту дурну дур 250 млрд. къуруширттансса», — увкунни министр­нал.
Министрнал мукъурттийн бувну, «Юг России» программа бартдигьаврил цалчинмур шачIанттуй бювхъунни тамансса чан бан 3-мур сменалий дуклакисса оьрчIру, миннавух бур Дагъусттан Республикалулссагу. Ва министерствалуща 2 шинал мутталий бювхъуну бур давудакъашиврул даража чан бан ва промышленностьрал производство лядуккан дуван.
Тамансса лябукку хьуну бур мукунма шяраваллил хозяйствалул бутIувугу.
ХIакьину министерствалул давурттал хъунмур ишан хъанай дур «2025 шинайннин Ухссавнил Ккавкказ хьхьичIунмай баврил паччахIлугърал программа». Му программа бартлагаврийну бю­хъан тIий бур щаллу бан макрорегиондалул циняв задачартту.
Дагъусттаннал БакIчи Рамазан АьбдуллатIиповлул бувсунни рес­публикалий хьусса хъинчулийсса да­хханашивурттая. Ганал мукъурттийн бувну, Дагъусттаннай бювхъуну бур агьалинал маэшат ххуй бан ва давудакъашиву чан дан.
«Ххуйсса бущилий хьхьичIуннай хъанай дур промышленностьрал производство, амма утти жун аьркинни продукциялул лагругу гьарза дуллан. Жугу хъунмасса умуд бихьлай буру импортозамещениялул программалийн, амма та аьркин­ссаксса арцул щаллу къадуварча, муния мюнпат ласун къахьунссар. Производство лядуккан даншиврул арцу аьркинни», — увкунни ганал.
СКФО-рал циняв субъектирдал бакIчитурал цIанияту Рамазан АьбдуллатIиповлул Александр Хлопониннухь тавакъю бунни АьФ-лул паччахIлугърал отраслирдал программарттава дуркьун диркIсса объектру цIунилгу сияхIрайн ласун.
Ххалбигьлагьисса масъалалул хIакъираву ихтилат бунни ПаччахIлугърал Думалул депутат ХIажимет Ссапараьлиевлулгу.
Масъала ххал бигьаврил хIасиллу дуллай, Александр Хлопониннул бувсунни аьркинну бушиву федерал бюджетравату итадакьлакьисса субсидияртту тIайлану, цила ххуллий ишла дуллан, мукун ишла къадурми махъуннай тIалав дуллан тIий бушивугу хIисавравун лавсун. МуницIун бавхIуну вице-премьернал субъектирдал бакIчитуран маслихIатну ккавккунни хIала-гьурттуну зун Ухссавнил Ккавкказуллал ишир­ттал министерствалущал.
Коллегиялул хIасиллан хасну Лев Кузнецовлул ва Рамазан АьбдуллатIиповлул жавабру дуллунни журналистурал суалла­хьхьун.
«Дагестанская правдалия» таржума ХI. Аьдиловлул