Июньдалул 8-нний Дагъусттаннал БакIчи Рамазан АьбдуллатIипов хьунаавкьунни Федерал ххуллул агентствалул каялувчи Роман Старовойтовлущал. Р. Старовойтов республикалийн увкIун ур къуллугърал аьрххилий. Ххал бигьлай бия республикалийсса федерал ххуллурду бакьин баврил масъалартту.

«Махъсса шиннардий зу таман­сса давуртту дурну дур щалва Ух­ссавнил Ккавкказнаву. ЖучIа ва хъинну зий бур республикалул Ххуллул агентствагу. Аьмну лавсун Дагъусттаннай ххуллурду ххуйсса даражалий бур, амма цаппара кIанттурдай ххуллурду бакьин бан аьркинну бур — ми бур МахIачкъалаллал, Хасавюртуллал лагма буккайсса, МахIачкъала-Манас бутIуйсса ххуллурду.
Зунттал районнайнсса ххуллурду оьккисса бакъар, амма 4 райондалийн асфальт бивхьусса ххуллу бан аьркинни. Микку давуртту дуллай бур», — увкунни ДР-лул БакIчинал.
Рамазан АьбдуллатIиповлул бувсъсса куццуй, цаймигу ххуллурду аьркинну бур бакьин бан. Миннувух бур Р-215 «Астрахань-Кочубей», «Кизляр-Махачкала», Рубас не­ххайх ламу баву ва цаймигу.
Росавтодорданул каялувчинал бувсунни Дагъусттаннал ххуллул зузалт ххуйну зий бушиву. Ганал мукъурттийн бувну, ми хIакьину зий бур республикалийгу, цайми регионнайгу, цIусса технологияр­ттугу ишла дуллай. ХIакьину хъуннасса даву дуллай бур щалва «Кавказ» ххуллий, му ххуллул цачIун буллай бур СКФО-рал регионну. Гьай-гьай, бизнесрахун багьминнал, шяраваллил хозяйствалул бакIлахъиялуха зузиминнал мурад бур му федерал ххуллу ххуй­сса ва мюхчансса бушаву. Мунияту га ххуллу бакьин бансса харжлугъ гьарза дуллай бур 1 млрд. къуруширттайн диянцIа. Шяраваллал ххуллурдал хIакъираву тIурча, апрельданул 21-нний Аьрасатнал ХIукуматрал хIукму бувну бур сайки 93 млн. къуруширттал личIи дан Дагъусттаннан, шяраваллавунсса ххуллурду баву мурадрай.
Хьунабакьаврий ххал бивгьунни мукунма ххуллурдал хIакъиравусса цаймигу масъалартту.
ХIадур бувссар
ХI. Аьдиловлул