Июнь зурул 1-нний 100 шин там хъанахъиссар захIматсса дяъвилул шиннардий Ккуллал райондалул КIулшиву дулаврил отделданул каялувчину, дяъвилул махъсса шиннардий райкомрал цалчинма секретарьну зий ивкIсса Загълиев ХIасан Исмяиллул арс дунияллийн увккун. Юбилейрал гьантрай бишлай буру му кIулну ивкIминнал дакIнийнбичавуртту.
Ишла дурссар лакрал чичу ва шаэр Хизри Илиясовлул «Гасан Заглиев. Дагестан. Время и судьбы» луттиравасса материаллугу.

Бусалардавун агьсса каялувчи

— Щалла республикалий сийгу бюхттулну, агьалинал маэшатгу лавайну Ккуллал район диркIссар Загълиев ХIасан каялувшиву дуллалисса ппурттуву. Сайки гьарца шинал цалчинмур кIану бугьлай диркIссар район социалист бяст-ччалливу.
ТачIав бакъачIин гьавас буну зий бивкIун бур захIматкаш тай шиннардий, цанчирча даврил сант кIулсса, бюхъу бусса заллу ушивруцIун, ХIасан Исмяилович инсантуран кIулшиву дулаврил цIанихсса пишакаргу ивкIун тIий. Халкьуннаву ганайн учай­сса бивкIун бур «лакрал Макаренко» куну.
Га ивкIун ур аькьилсса мукъуйну халкь цала хъирив буцин бю­хъайсса даражалул усттар. Ванал хIарачатрайнур райондалий шяраваллил хозяйствалул аралуву цалчинсса пишакартал (механизатортал, гъаттарал хIакинтал, агрономтал) бувксса.
Бюхъу бусса оьрчIан га тIитIлай ивкIссар оьрмулувунсса ххуллу, ми Дагъусттаннал паччахIлугърал шяраваллил хозяйствалул институтравун дуклан тIайла буклай. Халкьуннайн дакI тIайласса ХIасан Исмяиловичлуща бювхъуссар райондалул жяматгу ца закканттувун бавтIун, шяраваллил хозяйствалул мурадру хьхьичIунну биттур буллан — тай кьянатсса, дяъвилия махъсса шиннардий ххяллавусса зунттал район накI ттизавриву, дикI ва ппал ласавриву арнил кIанттайсса районнаяргума цукссагу хьхьичIун дурк­ссар. ЩищачIав бувчIин бювхъуну бакъар ХIасан Исмяиловичлул тIайлабацIулул тIилисин ссаву бивкIссарив. Я ганайн бияннин, я ганая мукьах щищачIав къархьуссар Ккуллал райондалий гукун бюхттулсса ккаккияртту хьун дан.
Му бакъассагу, дипломатичныйсса, маз лякъин кIулсса ХIасан Загълиевлуща ялагу бювхъуссар зунттал халкьуннан оьрмулун хъуннасса агьамшиву дусса ца цамургу бигьа бакъасса мурад щаллу бан – республикалул бакI дургьуми бакIрай бацIан бувссар Бабаюртуллал райондалий ризкьилул кIи рутлансса аьрщив райондалухьхьун дулун. Ми аьрщирдая хIакьинугу райондалул агьали хайр ласлайнма буссар. Райондалул агьалинал цIаний ХIасан Загълиевлул хъунмасса захIмат бивхьуссар, мунин­сса барчаллагьран Райондалул депутатътурал собраниялул хIукмулийн бувну, райондалул администрациялул чIирай лархъссар ванал аьпалул ула.
Сяид Сулайманов,
Ккуллал райондалул
администрациялул бакIчи

ЗахIматсса шартIирдаву зий ивкIссар

— Райондалул кIулшиву дулаврил отделданул каялувчину итайхтува ХIасан Загълиев айивхьуна бухсса бакьин буллай, цIусса школартту тIитIлай. Школартту наглядный пособиярттал, инвентарьданул дузал буллай. Шяраваллаву тIивтIуссар бугьарасса инсантурансса хьхьувайсса школарттугу.
Дяъви байбишайхту га увцуна къинттуллухсса захIматрал комиссарну зун. Зугу зий, каялувшиву дуллай уссия Ленин­ккантлив окопру дуклакисса давурттал. Зун багьссар захIматсса шартIирдаву. Дукра диял къахъанай, инсантал ккашикал хъанай, цIуцIавурттал бугьлай бивкIссар. Зунттава чунчIав къабувксса хъами-душру арнил кIанттайн бизавривун моляриялул ливтIуссар. Мукун захIматсса шартIирдаву ПаччахIлугърал Обороналул комитетрал тIалавшиннарду биттур дуллалаврищал архIала ХIасан Загълиевлун багьссар цайнма тапшур був­сса инсантурал оьрмурду ххассал баврилссагу буллан.
Ухссавнил Ккавкказнава душман лихъа уккан айхту, къинттуллух зий бивкIми шаппа-шаппай итабавкьуссар. ХIасан Загълиевгу зана хьуссар цалла даврийн.
ХIасан Исмяилович хъуннасса къулагъас дуллай ия шяраваллал педагогический кадрарду хIадур баврих. ХьхьичIунну дуклаки­сса оьрчIру-душру тIайла буккайва Гъумучиял педучилищалуву дуклан. Гихунайгу гайннал дуккаврил, оьрмулул шартIирдал ялув авцIуну икIайва.
Аькьилсса каялувчинан чIалан бикIайва жагьилтал шяраваллава бизлантIишиву, мунияту райондалул бакIчинал къуллугърай зузи­сса чIумал жагьилтал шяраву байгьинсса чаранну ляхълай ия, ми лавайсса дуккаврил идарарттавун дук­лан буххан кумаг буллай, дуклакисса чIумал чIарав ацIлай, дурккуну къуртал хьувкун шяраваллавунмай кIункIу буллай, миннан зунсса кIанттурду хIадур буллай.
Га акъая кабинетравугу щяив­кIун так амрурду буллалисса каялувчи. ЗахIматрал фронтрал коми­ссарну зузисса чIумал зузалтращал архIал окопру дуклай, райондалул бакIчину зузисса чIумал оьллал фермардал ялтту уккан занай, къурувгу, ххалавгу, зузалтращал зий. Ванал кулпат ХIуриягу бикIайссия колхозницахъащал хъуру ттихIлай, ххулув буллай.
Гьарун Багъдуев,
профессор

Нартнал хасият сававну къуллугърацIа хьуссар

— ХIасан Исмяиловичлул бусайва Бабаюртуллал ва Бакрес-Бажиганнал кIанттайсса аьрщив тIалав дан цанма цуксса захIмат хьуссарив, циксса къуллугъчитурал кабинетирттавунсса хьулурду ба­ттан багьссарив.
Танисса шяраваллил хозяйствалул министр ХIусайн Абуевлун бувчIин бувну бур тIабиаьтрал шартIру кьянатсса зунттаву, ххяллаву дирхьусса Ккуллал райондалул агьалинал ахIвал лап лащин­сса бушиву. ХьхьичIва хIалтIилухун занай бивкIхьурча, цIанакул му сянатгу кьариртун душиву. Миннал маэшат лавай бансса чаранну къалякъирча, зунттал агьлу ватандалия бизлай, лакрал щархъурду кIачIа дуккантIишиву. ЗахIмат ххирасса зунттал халкьуннан зунсса аьрщи дулурча, муния щалла республикалун мюнпат хьунтIишиву.
Бусанна ХIасан Загълиев халкьуннайн дакI тIайласса, хIакьсса патриот ивкIшиву исват буллалисса ишираягу. Сяид Габиев Ттуплислия увкIун, Данияловлущалсса хьунабакьаврий буслай ивкIун ур граждан дяъвилул чIумалсса диялдакъашивурттая. Ванал бусласимур танан тIааьн къабивзун бур. Саэд Габиев Лакрал ва Ккуллал районнал агьалинащал хьунаакьин гьан дакIнийну ушиву цанма баяйхту, кIирагу райондалул каялувчитурачIан оьвкуну, амру бувну бур, му официальныйну, хъунисса хIурматру буллай кьамул маару тIий. Амма ХIасан Загълиев ия ттухь: «Ттуща бю­хъайссияв миллатрал пахрулунсса арс кьамул къауван. Му зунтталчунал яхIлин лайкьсса иш бакъаяхха», — тIий. Райондалул аппаратравуцири инсантуращал тIутIал кацIругу лавсун, самолетрал хьхьичIун лавгун, багьайсса даражалий хъамалугу увну, хъинсса ссайгъатирттащал тIайла увккун ур.
Муния махъ байбивхьуну бур райондалий диялдакъашивуртту ляхълай, укьан ансса хIуччарду ялув бихьлай. Обкомрал зузалтравасса цанналгума увкуну бур, лахьхьу-цархьхьу жува ваная бюхттулсса цIарду дуллай, цайминнан эбрат­ран ихьлай, хIакьину тIурча аьй-бювкьурду ляхълай буру, му цукун бувчIин аьркинссар, куну. Му сававрайри ХIасан Загълиев райондалул каялувчинал къуллугърая лавгсса.
Сулайман АхIмадов,
профессор

Га акъая
хъуслил инсан

— Ттун хъунмасса бахтти хьу­ссар ХIасан Загълиевлущал зун нясив хьуну. На Хъусращиял школалул директорну зузисса ппурттуву, га завучну зий уссия. Га ия ухха­ву къакIулсса инсан. Практикалул опыт авадансса педагогная ттун хъунмасса кумаг бия. Га акъая тамахIкарсса хъуслил инсан. Ттул яла хъунмур аваданшиву ттулва ряхвагу оьрчIан ларайсса кIулшиву дулавур, минная паччахIлугърангу, жяматрангу мюнпатсса инсантал буккавур учайва аьпабивул. Цайминнан эбратранну хъунигу бувну, дуккингу бувна, хъуна-хъунаманая чIана-чIивиманайн бияннин. ХIакьину ми бур республикалий чIявучин лажин-цIа кIулсса бусравсса инсантал. Ганал оьрчIава шамуннахь нагу дарс дирхьуссар: Изумрудлухь, Мусахь ва Исмяиллухь.
НахIакь къаучайхьунссар, инсаннал хIал кIул шайсса ганахьхьун власть дирияйхтур, куну. ХIасан Загълиевлуннив власть, цува хъун хьунсса мурад бакъаяча, халкьуннаха къуллугъ буллансса кIусса гьиву дия.
ХIасан АхIмадов,
РСФСР-данул халкьуннал учитель

——————————————-

ХIасан Загълиев увну ур 1916 шинал Хъусращиял шяраву. 1938 шинал Гъумучиял педучилище къуртал бувну, зий айивхьуну ур Хъусращиял байбихьулул школалул учительну, яла директорну, гихунай — Ккуллал дянивмур даражалул школалул директорну. ЧIал къавхьуну ивтун ур Ккуллал райондалул кIулшиву дулаврил отделданул хъунаману. Ва каялувшиву дуллалисса шиннардий Ккуллал райондалул халкьуннал кIулшиву дулаврил отдел лайкь хьуссар ДАССР-данул ва РСФСР-данул КIулшиву дулаврил министерствалул чулухасса Занази ЯтIул Ттугълин. Арцуйнусса премия дуллуссар ппухълу дяъвилий талатисса оьрчIан кумагран.
Хушрай дяъвилий талан гьан ччишиву бувсукун, райондалул хъуниминнал: «Ина къинттуллух ххишалану учIи лякъинссара» — куну, захIматрал фронтрал комиссарну ивтун ур. Ванал каялувшиннаралу Ленинкантлив Ккуллал райондалул агьали буллай бивкIун бур мюхчан бай сооруженияртту. Па­ччагълугърал обороналун тIайла бувк­сса кумаграхлу билаятрал бакIчи И. Сталиннуя дуркIун дур ХIасан Загълиевлухь барчаллагь тIутIисса ХIукуматрал телеграмма.
1951 шинал тIалав увну ур партийныйсса даврийн. ХьхьичI зий ивкIун ур райкомрал кIилчинма секретарьну, яла цалчинма секретарьну. Ва райондалул бакIчисса шиннардий район диркIун дур рес­публикалул ХIурматрал ул­ттуй, цимиллагу лайкь хьуну дур Обкомрал чулухасса Занази ЯтIул Ттугълин.
ХIасан Загълиев цувагу лайкь хьуну ур ХIукуматрал чулухасса чIярусса орденнан ва медаллан.
ХIасан Загълиевлул оьрчIру-душру ва минная бивзсса наслугу бувккунни ванал цIа лайкьну дуруччинсса, паччахIлугъран ва жяматран бучIи лякъинсса, республикалий бусрав­сса инсантал. Сажид Загълиев – респуб­ликалий хьхьичIунсса кардиолог, медициналул элмурдал кандидат. Рая (аьпабиву) – 25 шинай республикалий ца яла хьхьичIунсса детсадрай каялувшиву дурсса ДР-лул бусравсса педагог. Изумруд — ДР-лул лайкь хьусса хIакин. Исмяил ва Муса физикалул элмурдал кандидатътал, Исмяил ялапар хъанай уссар Алма-Аталий, Муса зий ур Каспийскалийсса Да­гъусттаннал энергетический колледжраву. МахIаммад (оьрмулул аргъираву жуятува лавгсса) зий ивкIссар Тарумовкаллал райондалий рыбинспекторну. Душнил арс Станислав МахIаммадов уссия Аьрасатнал ПаччахIлугърал Думалул депутатну. Душнил душ Белла -ДР-лул бусравсса педагог, зий бур МахIачкъала шагьрулул ца яла хьхьичIунсса детсадрал хъунмурну. Арснал душ Салимат – медициналул элмурдал кандидат, кардиолог.