Хъунмасса Буттал кIанттул цIанийсса дяъвилий ливтIуминнан хасъсса Щалвагу Аьрасатнал хъама къабитаврил ва хажалатрал кьини МахIачкъалалив Дагъусттаннал БакIчи Рамазан АьбдуллатIиповлул тIутIал шалкка бивхьунни Аьраличу-тархъан бувул гьайкалданучIа ва тIутIив дирхьунни ливтIусса саллатIнал мемориалданучIа.
ХIасан Аьдилов
Му мероприятиялий Лениннул комсомолданул паркираву гьуртту хьунни мукунма ДР-лул Халкьуннал Мажлисрал Председательнал 1-ма хъиривчу Юрий Левицкий, ДР-лул БакIчинал ва ХIукуматрал Администрациялул каялувчи Исмяил Апанниев, ХIукуматрал Председательнал 1-ма хъиривчу Анатолий Карибов, МахIачкъалаллал бакIчи Муса Мусаев ва цаймигу.
Тикку ихтилат буллай, Рамазан АьбдуллатIиповлул бувсунни ва тарихрал мяъналия, мунил агьамшиврия, билаятрал тархъаншиврул цIанийсса талатавриву оьруснал миллатрал кьимат бищун къашайсса гьунардания.
«Оьруснал миллатрал ва Совет Союзрал циняв халкьуннал ккаккан бувссар цащава бюхъайсса бушиву душман ялун ххявхсса чIумал Ватандалухлу буккан. Гьаман муна му бюхттулсса биялалийн бувнур миллатрая нация шайсса, граждантурая паччахIлугъ шайсса. Га бияла къабивкIссания, ва Бюхттулсса Ххувшавугу къадикIанссия. ХIакьину жунма аьркинссар цIакь дуван жулла паччахIлугъ, билаятрал лидернал лагма лаган», — увкунни Республикалул каялувчинал.
Генерал-майор Оьмар Муртузялиевлул мукъурттийн бувну, Бюхттулсса Ххувшавриву дагъусттанлувтурал бивхьусса захIматрал кьимат бищун къашайссар. 90 азарунная ливчусса аьраличутал ливтIуссар Хъун дяъвилул фронтирттай. Гьарца аьраличунал цIа ларсун дуссар республикалий буккан буллалисса луттирдайн. Мукунсса луттирдал бур цинявппагу 26 том.
Рамазан АьбдуллатIиповлул увкусса куццуй, дагъусттанлувтураща шайссар цалва вирттаврая пахрулий бикIан.
