Июньдалул 17-нний Дагъусттаннал БакIчи Рамазан АьбдуллатIипов гьуртту хьунни Петербургуллал дунияллул халкьуннал экономикалул форумрал аьмсса заседаниялий. Тикку ихтилат бунни Аьрасатнал Президент Владимир Путиннул.
Ганал барчаллагь увкунни Аьрасатнал оьвкуну форумрайн бувкIсса дунияллул халкьуннал организациярдал каялувчитурахь, паччахIлугъирттал бакIчитурахь, политикийсса ишккаккултрахь, бизнесрал вакилтурахь. В. Путиннул увкунни: «Ттун дакIний бур укунсса форумру дайдихьлахьисса чIун. Гания махъ ларгунни 20-нния лирчусса шинну. Га дайдирхьуссия региондалул форум кунна, хIакьину ва дур агьамсса масъалартту ххал бигьлагьисса хъуннасса площадка. Ва куццуйсса хьунабакьавуртту хIакьину чара бакъа аьркинни, дунияллий тамансса дахханашивуртту хъанайгу духьувкун».
ПаччахIлугърал бакIчинал бувсунни даххана хъанахъисса дунияллий Аьрасатнал бугьлагьисса кIанттул хIакъираву ва экономикалул системарттал проблемарттаяту, ми циняв паччахIлугъирттан аьмсса бухьувкун.
Мунищала архIал, ганал бувсунни хъунмасса ялун бучIанмур бушиву Евразиянал экономикалул союзрал цайми билаятирттащалсса ва цачIуншивурттащалсса уртакьшиврул. «Евразиянал экономикалул союзращалсса илкинсса машлул зона дузал дансса гъира бушиву бувсунни 40-яр ххишаласса паччахIлугъирттал ва дунияллул халкьуннал организациярдал. Жулгу, жулва уртакьтуралгу пикрилий, Евразиянал экономикалул союз хьун бюхъайссар гьартасса интеграциялул контур дузал бансса ца центрну. Мукунсса контурданул хахливу жущава бюхъантIиссар щаллу бан хъунисса технологиялул задачартту, миккун кIункIу буван цаймигу гьуртту хьун ччими. Жу уттигъанну Астаналий ххал бигьарду ми масъалартту, пикри бан аьркинни Евразиянал Экономикалул Союзгу хIаласса хъуннасса Евразиянал партнерство сакин даврил хIакъираву», — увкунни Владимир Путиннул.
Аьмсса заседание къуртал хьувкун Рамазан АьбдуллатIиповлул бувчIин бунни паччахIлугърал бакIчинал ихтилатравасса цаппара кIанттурду.
