Оьрус мазрал ЕГЭ дуллунни

Щалвагу Аьрасатнаву кунма, Дагъусттаннай оьрус мазрал ЕГЭ чара бакъа дулун ккаккан дурсса экзамен дур, школа къуртал бувшиврул аттестат ласуншиврул дулун багьлагьисса.

Республикалий ЕГЭ-рду дулун ккаккан бувсса 87 пунктрай (миннуйн ППЭ учай) дуллунни май зурул зувинний ­оьрус мазрал ЕГЭ. КIива пункт: ца Каспийскалий, цагу- Къизлярдай, кьатIушав буккан къашай­сса оьрчIал дулуншиврул, миннал ичIува бивкIун бур. Экзаменну дуллалисса кIанттурдай «Ростелекомрал» видеонаблюдениялул система дия, му компаниялул директор ХIамзат ХIамзатовлул хьхьичIва баян бувна, ларгсса шиналгу, Минобразованиялущал кьутIи цIакь дурну, мура компаниялул дузал дурну диркIшиву циняв пунктирдай онлайн-видеонаблюдение, дукIусса опыт хIисавравун лавсун, гьашинумур даву хъиннура ххуйсса даражалий дувантIишиву. Буниялттунгу, кIицI ларгсса компаниялул даву сантирай дуршиву баян бунни Минобразованиялул. Оьрус мазрал ЕГЭ дулаврил тагьардания бусласисса пресс-конференция дунни кIулшиву дулаврил ва элмулул министрнал хъиривчу Ширали Аьлиевлул. Мунал бувсунни шпаргалкарду ишла дуллалисса 30 выпускник ирившиву, ми циняв экзамендалия буккан бувшиву, цIуницIа экзамен дулунсса ихтияргу миннахь дакъашиву. Аьмну Дагъус­ттаннай оьрус мазрал ЕГЭ дуллунни 18 азара выпускникнал, хIасиллу дувантIиссар июнь зурул 15-ннияр чIал къадурну.