Жу, Асият ва Саният, лакрал машгьурсса чичу Зияуттин Айдамировлул душнил душру, ккалай буру Да­гъусттаннал университетраву, филологиялул факультетрал ниттил мазрал отделениялий.
ТIайланма учин, жун ляличIину ва факультетрайн буххан ччан бикIаврил хъунмур сававгу дархIуну дуссар тта­ттал цIаницIун.
Цанбакъарча, ванал чантI учин дурну дуну тIий жул дакIурдиву ниттил мазрахсса ччаву, ванал дирхьуну дуну тIий жул кIулшилуву Буттал кIанугу, ниттил мазгу хъамабивтсса инсан – му хIакьсса миллатрал инсаннан тачIавгу ккалли ан къабучIишиврул мяъна. 

ДакIния буккайссарив тачIав, мюрщисса чIумалва ттаттал жу буцайвав ахъу­вун, къурув, вацIлувун, неххайн. Гьарца бувцусса кIанттайгу жун бувчIин буллай, буслан икIайва лагмацири затирттая, мунан кIукъакIулссагу ба­къая. Яла, мукун дунияллийхгу бувккун, тIабиаьтрал чIюлушивурттугу ххал дурну махъ, ттаттал жу чичлачи байвав ла­кку мазрай жунна ххал хьумуниясса хъун бакъасса хавар. Му бакъассагу, шаймур байва жу назмурду ляхъан дуллали бангу. Ялув авцIуну, бувчIин буллан икIайва назмурдаву слогру низамрай бишайшиву, рифма, ритма хIасул дайшиву. ЧIумуя чIумуйн мюрщисса сочиненияртту чичин бувну, ттаттал ми яла ххал дайва, кка­ккан байва гъалатIру. Мунал тIимуних, бусласимуних жу гъирарай вичIигу дишайссия.
Ттатта ия узданну дин дувайсса, мунил ххуллу-хха буруччайсса инсангу, хIажливгу лавгссия. Жунгу лахьхьин бувна чак бан, кьулгьу-кьуран буккин. Ми гьарца затирттацIун ттатта ия медициналул кIулшивугу ларсун, хIакиннал пиша лавхьхьусса, му пишалий чIярусса шиннардий зийгу ивкIсса специалист. Му аралувугу жу мунаяту лавхьхьуссия чIявусса, мюнпат бусса затру.
Ххишала акъа ххиранугу икIайва жун ттатта. ХIакьинугу жун му иял хъанай акъар – дуккавривугу, оьрмулувугу. Жул дакIурдива му тачIав угу-къауккантIиссар.
Асият ва Саният

ХIакьсса зунтталчув

Зияуттин-хIажи Айдамировлущал кIул хьуну ттул кьунияхъайсса шинну хьуна. «Ччива хIакьсса инсанну» куну бур ванал цалла ца назмулуву. ХIакьсса инсан, хIакьсса зунттал чув игу-ия, му ия философгу, хIакингу, динчигу, кулпат­ран адаминагу, оьрчIан ппугу, шяраваллил жяматран бусравсса чувгу.
Мунал оьрчIшиврул ххуллу ссуссукьусса бивкIун бунугу, ванаву хIасул хьуну дия зунттал инсаннал ххуй-ххуйми лишанну. Дагъусттаннал сайки циняв миллатирттал, мукуна азирбижаннал, гуржиял бусравсса, миннал мазругу чанну-ххину кIулсса инсан ия. Зияуттин цува чун, ци шяравун гьарчангу, миннал багьу-бизулущал, аьдатирттащал, мазурдищал кIул хьуну, миннул цашиву ва тапаватшиву ххал дуллай, жулва зунттал миллат­ру ца мархлуя хьушиву чIалачIи буллай, буслай икIайва.
Зияуттиннул хъуннасса дард дия ниттил маз, лакку маз ябаврил ялувсса. «Ла­кку мазравун хIала бавкьуну бур бакъанугу баччибакъасса чIявусса туркнал, аьрабнал, оьруснал, азирбижаннал махъру», — тIийна икIайва му.
ХIасил, Зияуттин-хIажи ия хIакьсса патриотгу, гьунар бусса чичугу, мазурдил минахургу, цайминнан эбратрансса лаккучугу.
Зияуттиннулгу, ПатIиматлулгу къушлий тарбия хьусса душнил душру – Оьма­рова Саният ва Оьмарова Асият, Гъумук жул лицейгу мусил медаллай къуртал бувну, мукунма ххаллилну ккалай бур хIакьину Дагъусттаннал паччахIлугърал университетраву. Ттул щак бакъар гайннал ЯтIул дипломругу ласунтIишиврийн. Университетрал ХIурматрал улттуй жулва лакрал душварал цIарду ххал хьувкун, ттунгу пахру багьай.
Зияуттин Айдамировлул бусрав­сса аьпа личIантIиссар чIявуссаннал дакIурдиву.
МахIаммад Хъунбуттаев,
Гъумучиял лицейрал директор
Чаннайн дуккан дурну чарттаву щаргу…

Вил кьалан къащилай, аьтIий бур таптар.
Вил шаттирах мякьну – оьвтIий Хьураар.
Чаннайн дуккан дурну чарттаву щаргу,
Лавгссарав, кьадиртун ДучIив щащаргу?

Инсан дакIнил ласаву, ягу ят шаву хьхьичIва-хьхьичIсса хьунабакьавриятура, ккаккавриятура дайдишай. Дайдишай га цалчинсса дакI-аьмал бувчIаврияту, цанначIан ца кIункIу тIутIавугу, дусшивугу, миннул даражагу.
Чичултрал къатраву батIаву дуну, М.-З. АминовлучIа студентну дуклакисса нагу агьра лакрал машгьурсса чичултрал ккурандалувун. БачIвасса кIану хьунни Зияуттин Айдамировлул чIарав. Ка дугьан лагмагу увккун, щяивкIра нагу. Ттул никирай кагу дирхьуну, цумурдив мазрай цаппара махъру увкунни Зияуттиннул.
— Вин бувчIурив на ци увкуссарив?
— КъабувчIунни, — учав.
— «Цукун ура, уссил арс», — тIутIиссар турк мазрай…
Укун чичул ттущала бувсса буттауссушиврийсса, учиннуча, дакI хъун къадур­сса ихтилатрал цукуннив на кIункIу хъанахъи увра Зияуттин АйдамировлучIан. Хьунаакьлай, ккаклай тамансса шинну чIарах дуккайхту, хавар бувккунни Аьйдахъал Зияуттин Лаккуйн излай усса ур тIутIисса.
ЧIумул щавурду, цалва оьрмулул ххуллурду аьлтту буллалисса кьиссарду, роман чичаву, чичул пагьму тасттикь хъанахъаву дур. Мунищала Зияуттиннул виричушивуну, мунан цала буттал улча бунияланугу ххирашиврул барашиннанугу хьуна цала ливчIмур оьрму буттал шяраву бутан, чичу ДучIив изаву. Шагьругу кьабивтун, чани бакъасса, сант щаллу къархьусса кIанайн ивзун, цала буттал шяравалу цIудуккан даву – му бакъарив инсаннал яхIгу, къириятгу, Ватандалух­сса куртIсса ччавугу. Мяйжаннугу, цалла хъирив кьадиртсса чумартшивуну хъанай дур Аьйдахъал Зияуттин-хIажинал ДучIиннал шяравун бувцусса чанигу, цувагу кIиккусса буттахъал хIатталлив уччара, куну, бувсса аманатгу. Му бакъарив машгьурсса лакрал чичул бувсса хIажгу, дурсса къучагъшивугу, абадлий кьадирт­сса чаннасса, бусравсса цIагу.
Ттулгу чан-кьанну бунугу аьрххи багьай ДучIиннал шяравун. Аьйдахъал Зияуттиннул лавхъун кьабивтсса чирахърах чаннайн уккара навагу. Хьхьувай ДучIив лавхъсса чирахъру ккаккайхту, дакIнийн агьай марцI-кIяласса чIиригу, лахъи-хъаласса чурхгу, ссуникIурттул кьяпагу, цала къатлуву чIирай лавхъсса кIяла варсигу, кIанийсса ххаржангу, луттирдал дурцIусса тахчагу…
ДакI цIийна икIайва, аьпабиву, ниттил мазрал бучIантIимуний, лакрал адабият цIу дуклай дакъашиврий, жула бучIантIисса тарихрай.
Ларгунни мадарасса чIун Аьйдахъал Зияуттин жучIава акъа. Амма лакку дунияллий яхьуну личIантIиссар гьунар ххи­сса чичул бусравсса цIагу, дакI авадан­сса инсаннал сипатгу, кьаландалула дурксса чичрурдугу.
Барчаллагьрай ура кьадарданийн, тукун аькьилсса зунттал чувнал, пагьму бу­сса чичул, ляличIисса инсаннал оьрмулул ххуллийн ттуламур оьрмулул ххуллугу, чансса хIаллай бунугу, тIайла бавцIуну бивкIун тIий.
Аьвдулмажид Исмяилов,
ш. КIулушацIи