Жула буттал аьрщарайн немецнал чапхунчитал ххявхния шиннай ларгунни 76 шин. Къув-аьслил бущилий чIарах дурккунни чIун. Ккурккуллал шяраву дяъвилул паранну къавщусса цавагу къатта бакъар. БакI ккал дурну хIисав ласурча, ва дуниял мукIрусса Ххувшавриву ккуркличуналгу хъунмасса бутIа буссар. Ххувшаврил байрангу Ккурклив ляличIину бусравну кIицI лагайссар. Дяъвилул ахир цамур куццуй щинчIаврагу чIалай къадиркIун дур.
Ккурккуллал дянивмур даражалул школалул директор Магьдиев Данияллул 1983 шиная шихунмай шяраву аьдатравун руртунни му байран лахъа-хъунну кIицI даву. Ганиннингу кIицI лагайссия, амма тания шихунмай му байрандалий гьуртту шай хъунимигу, хъунив хьумигу, мюрщимигу, му кIицI лагавривугу ххуйсса дахханашивуртту хьунни. Дяъвилий гьуртту хьусса циняв вирттаврал суратру, хъунигу дурну, хахливу дирхьунни, цанна-цанналу ХIурматрал ултти дурсса куннасса къулагъас хьунни гьарцаннан. 2013 шиная шихунмай тIивтIунни миннан хас бувсса Аьпалул музей. Ххувшаву ларсун 65 шин кIицI лаглагисса шинал Сулайманов Сулайманнул, цалва гужрай, цалва хушрай, гай вирттавран дацIан дунни цIусса мармарчарил гьайкал, аьркинсса къалипрал хIарпирдай цIардугу чирчуну.
Магьдиев Аьвдуссаланнул итабавкьунни «Ккурккул буттал кIанттул цIанийсса дяъвилуву» тIисса лу. Му лугу, Магьдиев Данияллул «Ниттил чагъар» тIисса лугу буссар гьарица ккуркличунал къатлуву.
Дахьва оь ливчусса щавуйн цIу кунма, ттунгу асар хьунни дяъвилул къия. Гай вирттаврая аьпа цукун учин хъинавав тIий, нагу сакин бувссия «Виричушиву абадссар» тIисса лу, гай циняв аьрайн лавгминнал виричушивуртту шеърирдай ашкара дуллай. АцIра шин хьуссар ттул ва лу салкьи буллай. ХьхьичIва-хьхьичI ихтилат бувссия ттунагу маччасса, ххирасса, немецначIан ясирну агьсса, дужагь ккавксса ХIажиев Пагьабуттащал. Ганал чурххайсса щаву ккарккукун, хъювуссул бувккунав…
Гания махъ ихтилатру бав сагъну ливчIминнащал, гайннал ичIуссаннащал. Му бакъассагу, ссят хьхьунил шамунний лавгра га цIусса гьайкал дацIан дурсса БакIулалу тIисса кIанттайн, ккалай буссияв гай гьурттучитурал цIарду. Лавгра хьхьуниву АрнибакIуйн. АрнибакIу буссар жул шяраваллил къинттуллух, ТтурчIайнна зунттуйн тIайлану. ЧIивисса чIумала ккаркссия кIа АрнибакIуй мукьмурцIусса хандакьру аьрщараву дурккун. КIай диркIун дур саллатI яъанан дурсса къатрал аьшру. Душман ДагъусттанначIан гъан хъанан ивкIукун, кIикку саллатIнал пост бивкIун бур.
Ми циняв асардугу бавтIун чивчуссар на ттулва лу. Байрандалул кьини на ми луттирду бачIав ккурчIав шяраваллил жяматрайх. Ттун къакIулссия ттула луттирал гаксса кьадру бантIишиву. Жагьилсса инсантурал луттирах гакссара къулагъас дикIантIишиву, бусраврай буруглантIишиву. Дяъвилийн лавгун ивкIсса гьарица чувнал оьрчIан булав на га лу. Ялагу гъан-маччами цIухлай занай бия. Хъунмасса барчаллагь му бусраврай кьамул бувну тIий. Ттунма луттирал цIаний ккавксса захIмат хъамабивтунни. АцIра шинал кIушиву хъачIунттая экьи лирчусса кунна хьунни.
Цал ттигу барчаллагь Ккурккуллал агьалинайн.
Ханича Аьлиева
