Ттигъанну Дагъусттаннал Национальный библиотекалуву хьунни Аьжа АькIиевал ва Марат Рамазановлул цачIу итабавкьусса «Происхождение слов в языке. Единый язык человечества» тIисса сериялувасса «Язык как фактор выражения духовной сути человека» тIисса луттирал презентациялул хьхьичIсса пресс-конференция.

Зулайхат Тахакьаева
Мунийн бувкIун бия журналистал, шаэртал ва чичулт, автортурал мачча-гъанми, дус-ихтивартал. Аьжа АькIиевал ттининнингу итабавкьуссар языкознаниялул, этнографиялул ва мифологиялул суаллу ахттар буллалисса статьярду. Шиннардил хьхьичI бувкссар «Происхождение слов в языке. Единый язык человечества» тIисса луттирал цалчинмур том.
Марат Рамазанов ур ингилис ва лакку мазурдил гъаншиву ххал дигьлагьисса ахттарчи.
Дачин дурну бия предпрезентация шаэр, таржумачи, Аьрасатнал чичултрал союзрал член Миясат Муслимова.
Ванил кIицI лавгуна тема ахттар дуллай автортурал сайки кьура шинайсса захIмат бувшиву, элму ахттар дайсса институтрал щаллусса коллективрал шиннардий дансса даву кIия инсаннал так цалалу дузрайн ду­ккан дурну душиву.
Лакрал ва ингилис мазру ах­ттар буллай автортуран ляркъуну дур чIярусса лащавуртту. Масалдаран, лакку мазравусса «илчи» (вестник) лавхьхьусса бур ингилис мазравусса «elchee» (посол) тIисса мукъуха.
Лакку мазраву яла чIявусса хьунабакьлай бур «бивкIусса» санскрит мазравусса мукъур­ттищал маччашиву дусса махъру. Масалдаран, «kun» (санскрит) — мучить, «къунча тIун» (ла­кку) — толкать; «kiel» (санскрит) – «игра», «шутка», «къеллу-къутри» (лакку) – «игра», «шутка».
ЧIявусса хьунабакьлай бур дагъусттаннал мазурдищал ма­ччашиву дусса махъру Азиянал ва Европанал мазурдивугу.
Цила давурттаву Аьжа АькIие­­ва тас­ттикь ду­ллай бур хьхьичI­ва ду­нияллий бивкIшиву ща­лла инсаниятран аьмсса ца маз, му мазрая хьушиву цинявппа дунияллийсса мазру.
«Ттул чIярусса шинну хьунни 150 мазрал словарьдаха зий. Цумур-бунугу миллатрал мазрая чичланнин аьркинссар, му миллатрал халкьуннал лавгмур кIулну бикIан. Лавгмур къакIулну, цIанасса мазрая гъалгъа тIун къашайссар. ЦIубутIуй ттун ламус хъанай бия ухссавнил ккавкказуллал мазурдил цайми мазурдищалсса гъаншиврия гъалгъа тIун. Академик Старостиннул давурттаву индоевропеский мазурдиву ухссавнил ккавкказнал мазурдил лугъат дуссар тIий буккайхту, нагу сивсуну байбивхьура, ттунма хIисав хьусса мисаллу буцлай,» — тIий бур автор.
Ванил мукунма кIицI лавгунни архIалва зий бушиву вава журалул цаймигу луттирдаха.
Автортал дакI дарцIуну бур ва луттирах лингвистурал ва тарихрал языкознаниелуха зузисса пишакартурал дакъасса, укунма мазурдихух, мифологиялух, тарихрахух, этнографиялухух лавгсса инсантуралгу къулагъас данссар. «Происхождение слов и языка. Единый язык человечества» сериялувасса луттирдугу мудан тIалавну бикIанссар тIий.