Майрал 31-нний Дагъусттаннал печатьрал ва информациялул министр Бурлият Токболатовал журналистурал суаллахьхьун жавабру дуллунни «ТIиртIусса власть» проектран хасну. Суаллу бия СМИ-рдал оптимизациялул, Дагъусттаннал журналистурал профессионал даражалул,
миллатирттал кказитирттал ялун бучIантIимунил, мукъул тархъаншиврул хIакъиравусса.

ХIасан Аьдилов
Бурлият Токболатовал бувсмунийн бувну, Роскомнадзорданул Дагъусттаннайсса управлениялул республикалий сияхIрайн лавсун бур гьашину январьданул 1-нин 341 бищайсса (печатные) ва электроннал СМИ: паччахIлугъралсса бур 29, муниципал даражалулсса – 82, учредительтуралсса – 230. Миннувату 183 – бищайсса, 158 электрон журалий буккайсса СМИ. Токболатовал бувсунни СМИ-рдал оптимизация хьун тIий душиву. Бюхъайссар 5 ягу 7 паччахIлугърал СМИ хIала хьун мува журалийсса цайми СМИ-рдащал, мунийну махъун дагьсса арцу итадакьинтIиссар республикалул агьамми информациярттал луртаннан: «Дагестан» РГВК-лун, «Дагестан» РИА-лун, «Дагестанская правда» ва «Молодежь Дагестана» кказитирттан. Амма оптимизациялувун цуми кказитру багьантIиссар, кусса журналистурал суаллахьхьун ганил жаваб къадуллунни, мунил хIакъираву аьркин бакъасса гъалгъарду хIасул къахьуншиврул.
«ЧIявусса СМИ-рдал конкуренция дуллай бур. Микку гьаз хъанай бур мюнпат бушиврул масъала. ЖучIава чIявусса кказитру бур, миннун къабагьавай чIярусса арцу итадакьлай буру, амма миннуя мюнпат чансса бакъа бакъар. Цаппара кказитру буклан бивкIуна 60-ку шиннардий, муния махъ миннул буккулт чан хьуну бур ягу бакъар бувагу, амма кказитру (журналлу) буклайнма бур, шинай тамансса арцугу харж дуллай», — увкунни ганил.
Министрнал бувсунни журналистурал профессионал даражалиятугу. Миллатирттал прессалул хIакъираву Б. Токболатовал увку­сса куццуй, журналистнан цуксса ххуйну цалва ниттил маз кIулну бурив, мукунссар кказитрал кьадаргу бикIантIисса. Миллатирттал кказитру тIалав буллалими чансса бур, мунияту чIал къавхьуну ми кказитру къаличIантIиссар, тIисса хаварду нахIакьданссар. Ми кказитирттал ва журналлал цалва буккултгу бур, тIалавшингу дур. Ихтилат бикIан аьркинни миллатрал цалва мазрах аякьа къадуллалаврия, гъалгъа тIутIими чан хъанахъаврия.
«На хъунмасса хIурмат бара жулва журналистикалул ветерантурал, на миннаяту пахрулийгума бура, цанчирча ми зий бивкIун тIий захIматсса чIумал ва циняв респуб­ликалул кказитру сийлийгу бивкIун буну тIий. Амма бувчIин аьркинни хIакьинусса чIумул тIалавшиннугу. БувчIин аьркинни, инсан хъунав хьувкун ганал аькьлугу, кIулшивугу гара куццуй яшайссарча, амма ганан бувчIлан къабикIайссар чIумун лавхьхьуну буниялагу хъанахъи­сса цаппара ишру. Му чIумал аьркинссар я чIумун лавхьхьуну къу­ццу тIун, ягу цалва кIану булун жагьилсса даврил уртакьтурахьхьун», — увкунни Б. Токболатовал.
Ихтилат хьунни кказитирттал электрон версиярттаятугу, тиражирттаятугу. Министрнал мукъур­ттийн бувну, кказитирттал тиражру чан хъанай душаврил жаваблувшиву цайра редакциярттай дуссар, кказитру чичаврил компаниялий аьркинссар муниха зун, буккултрал кказитирттащалсса ва журналлащалсса арарду даххана дуван.