Жулла хIукуматрай агьалинал цивппа рязину дактилоскопия дайсса закон зий 17 шин хьуну дур. Амма жулва халкь анавар буклай бакъар цала кIиссурттал аьшру полициялул сияхIрай кьаритан, му криминалдануцIун бавхIусса иш кунма бизлай.

\Амма му мукун бакъар. Цаппара иширттаву жулва кIиссурттал аьшру полициялул сияхIрай душиву жунна дучIи лякъин бюхъай­ссар. МиннуйхчIин иш багьсса чIумал инсан цу уссарив кIул ан бигьану бикIантIиссар. Ца къахьунмур хьусса, цIу ларчIсса, аьрщи сукку хьусса, авария хьу­сса чIумал, инсаннал бакIрачIан бала бувкIсса, цичIав дакIний бакъасса ягу кIулшилия лавгун азарханалийн агьсса чIумал, полициялул зузалтраща ччясса чIумул мутталий му цу уссарив кIул бувну, гъан-маччанайн баян бан хьунтIиссар.
Жува рязину дактилоскопия давриву ца цамургу къулайшинна дур. Инсаннаща паспорт бакъа хьусса чIумал, му цу уссарив кIул бан бигьану бур кIиссурттал аьщурдайн бувну. Му къулайшинна хъинну дучIи ляхълай дур инсан чил шагьрулий усса чIумал. Цумацагу инсаннаща жипливун бу­ххултрал документ буккан бю­хъай. Документ бакъа шаврия баян бан аьркинссар полициялийн. Амма инсан цу уссарив кIул буллай чIун гьантIиссар. Полициялул зузалт­рал документ бакъа хьума ялапар хъанахъисса шагьрулийн цалва коллегахъачIан запрос гьан дурну, мунин жаваб дучIаннин ялугьлан багьантIиссар. Дактилоскопия дусса чIумал документ ччяни цIубуккан бан хьунтIиссар.
Цува рязину дактилоскопия дан хьунтIиссар гьарица инсаннаща, му хIаллихшинна укра­ссар. Инсаннал цува ялапар хъанахъи­сса кIанттурдайсса полициялул отделениялийн чичин аьркинссар аьрза ягу дуцIин дан аьркинссар хасъсса форма паччахIлугърал ва муниципал хIаллихшиннардал цасса порталданий. Дактилоскопия даншиврул чивчусса аьрзиращал архIал аьркинссар паспорт, 14 шин къархьусса оьрчIан бакIрал чагъар . Балики аьрза буллай ухьурча оьрчI цалашиврий бивхьусса ягу му цала аякьалулун лавсъсса инсан, му иш та­с­ттикь буллалисса документ бикIан аьркинссар.
Дактилоскопия дуллали­сса чIумал кIиссурттай ягу витIян­хъирттай щавурду, ххарцив дикIан къабучIиссар.
Инсаннан цалва кIиссурттал аьшру кьаритаврия нигь дикIан къааьркинссар. Цаппара полициялул зузалтраща бакъа ми ххал дан щищакIуй къашай­ссар. Балики зува рязину кьариртсса кIиссурттал аьшру дукьан дан ччай бухьурча, му дангу цичIав захIматшиву дакъа­ссар. Чичин аьркинссар аьрза, зул кIиссурттал аьшру дакъа дантIиссар.
ДР-лул МВД-лул
пресс-служба
ХIадур дурссар
А. Аьбдуллаевал