Апрельданул 27-нний Дагъусттаннал паччахIлугърал медакадемиялий хьунни Аьлимтурал советрал гьартасса заседание. Тикку Аьрасатнал цIуллушиву дуруччаврил министерствалул дуккаврил ва кадрардал политикалул департаментрал каялувчинал хъиривчу Артем Тарасенкол ДГМА-лул зузалтран ккаккан унни цIусса ректор – Сулайман Маммаев.

ХIасан Аьдилов
Тарасенкол дакIнийн бувтунни, ванияр 3 зурул хьхьичI, январьданул 27-нний, ДГМА-лул дурну душиву цалла бувчIаву: шама лайкьсса кандидатнавату увчIуссар яла лайкьма – Сулайман Маммаев. «Гьаман ганайy вихшала дирхьунни академиялул коллективрал хъирив нани­сса 5 шинал мутталий академиялий каялувшиву дуван. ХIакьину Аьрасатнал цIуллушиву дуруччаврил министрнал приказрайну ттуйн тапшур бувссар ккаккан уван цIусса ректор. Сулайман Маммаев – жагьилсса, чялишну зузисса, дуккаврил ишир­ттаву хъинну за кIулсса инсанни, цанчирча га чIярусса шиннардий зий ивкIссар кафедралул заведующийнугу, ДГМА-лул администрациялийгу. Га ур мукуна зузисса хIакингу, академиялул коллективрайн ва Хъунисриннал советрайнгу чул бишлашисса каялувчи. Ттул пикрилий, гьаман 2016 шиная шинмай ДГМА-луву дайдихьлахьи­ссар хьхьичIуннайшиврул цIусса чIун», — увкунни Тарасенкол.
Яла АьФ-лул цIуллушиву дуруччаврил министр Вероника Скворцовал бувккунни профессор Маммаев 2016 шинал апрельданул 11-нния тIайла хьуну ДГМА-лул ректорнал къуллугърай итаврил хIакъиравусса приказ.
Дагъусттаннал цIуллушиву дуруччаврил министр Пайзуллагь ХIабибуллаевлул барча увкунни профессор Маммаевлухь цIусса къуллугърай зий айишаву.
Маммаевлул барчаллагь увкунни Дагъусттаннал ЦIу­ллу­шиву дуруччаврил министерствалухь ва ДГМА-лул коллективрахь цайнна вихшала дишаврихлу ва бувсунни вузраву дан аьркинсса давурттал хIакъираву.