Апрельданул 29-нния майрал 1-ннийн дияннин жулла республикалий най дия IV фестиваль-форум «Кавказ – единая семья». Мунил сакиншинначитал бия АьФ-лул Культуралул министерство, ДР-лул Культуралул министерство, Республикалул Халкьуннал творчествалул къатта, МахIачкъала шагьрулул администрация ва Культуралул управление. ЧIарав бацIаву дунни Д.С. Лихачевлул цIанийсса культуралул ва тIабиаьтрал ирсирал Аьрасатнал НИИ-лул ва РАН ДНЦ-рал ХI. ЦIадассал цIанийсса Мазрал, литературалул ва искусствалул цIанийсса институтрал.

Бадрижамал Аьлиева
Ва хьунни Ухссавнил Ккав­кказуллал халкьуннал дусшиврул ва цашиврул байран. Фестивальданувух гьуртту хьунни Ухссавнил Ккавкказуллал регионнаясса коллективру: Къа­рачай-Чаргаснавасса студентътурал къавтIаврил ансамбль «Шохълукъ» ва Ухссавнил Аьса­тIин-Аланиянавасса «Иристон», Ставрополлал крайраясса фольклорданул ансамбль «Молодушки», Чачаннал респуб­ли­ка­лиясса вокалданул группа «Нюр», балайчитал – Ингушетиянавасса АьбдурахIман Беков ва Къабардин-Балкьарнавасса Марат Занкишиев.
Шанмагу гьантлий ва фестивальданул гьурттучитурал концертру ккаккан дунни МахIачкъалалий, Тарки, ЦIусса Хушет, Шамхал-Термен поселокирттай.
Апрельданул 29-нний – фестивальданул цалчин­сса кьини, хьунни фольклорданул парад. Фестивальданувух гьуртту хъанахъисса цинявппагу коллективру бахьтта най бия МахIачкъалаллал Хъун майданния Оьруснал театрданучIан. Гьарцагу цалва-цалва миллатрал лаххиярттаву, цалва миллат­рал музыкалул инструментругу бишлай, балайрдугу тIий. Микку коллективру ппив хьунни цалва-цалва майданнайх.
Фестивальданул лагрулий хьунни Аьрасатнал халкьуннал аслийсса культуралул центрдал выставкарду, халкьуннал канил пишардал мастер-классру. Дарбантлив хьунни конференция «Культурное наследие Северного Кавказа как ресурс межнационального согласия» цIанилусса.
Фестивальданул лагрулий Миллатрал библиотекалуву хьу­н­ни оьрчIал дирхьусса сура­тир­ттал выставкагу. Мунивух гьуртту хьунни МахIачкъала, Избербаш, Къизлар шагьрурдал, Къизлардал ва Дарбантуллал районнал искусствалул школарттал тарбиячитал.
Фестиваль щаллу хьунни май­рал 1-нний хьусса «Фес­ти­вальные картинки» цIа­нилусса хъуннасса концертрайну. Микку махъ лахълай, ДР-лул ХIукуматрал председательнал цалчинма хъиривчу Анатолий Карибовлул кIицI лавгунни ва фестиваль дуллай бушиву Республикалул БакIчинал баян бувсса Зунттал шинал лагрулий, республикалул халкьуннал культура дуруччаврих хIакьину хъуннасса къулагъас дуллай бушиву, 2013 шиная шиннай, Рамазан АьбдуллатIиповлул сипталийну, щаллу дуллай бушиву «Человеческий капитал» приоритет проект, цил лагрулийгу дуллалисса личIи-личIисса давур­ттив. Ухссавнил Ккавкказуллал гьарцагу региондалия бувкIсса коллективрал ккаккан бунни личIи-личIисса номерду, цавугу цалва-цалва кIанттул багьу-бизу, аьдатру, культура чIалачIи дуллалисса. Гьарцагу миллатрал – цалла-цалла янна-ка, кувннияр кув яргсса, ябацIансса. Гала-концертравух гьуртту хьунни рес­публикалул районнаясса фольклорданул коллективругу, миннувух лакралмигу.