Шадлугърал митинг сакин дурну диркIссар ДР-лул БакIчи Рамазан АьбдуллатIиповлул тапшур бувну. Мероприятиялий гьуртту хьунни ДР-лул ХIукуматрал Председатель Аьбдуссамад ХIамидов, ганал 1-ма хъиривчу Анатолий Карибов, ДР-лул БакIчинал ва ХIукуматрал Администрациялул каялувчи Исмяил Эфендиев,
рес­публикалул министерстварттал ва ведомстварттал каялувчитал, мукунма Дагъусттаннал профсоюзирттал сакиншиннардал союзрал ва цаймигу жяматийсса организациярдал бакIчитал.
ДР-лул Жяматийсса палаталул член МахIаммад Кьурбановлул циняв тиккун бавтIминнал чулуха барчаллагь увкунни Дагъусттаннал БакIчинахь жяматийсса организациярдаща ва жагьилминнаща ялун личин бюхъансса тагьар щаллу даврихлу. «Жу, жагьил­сса никирал, хъуниминнал опытрайн чул бишлай, дузал банну цIусса, кьуват бусса билаят. Жува цачIу ца ххуллийх бачин аьркинссару жулва билаят тIутIайх бичаврил цIаний», — увкунни Кьурбановлул.
ДР-лул Халкьуннал Мажлисрал законодательствалул, Законшиврул ва паччахIлугъ сакин даврил комитетрал председательнал хъиривчу, «Единая Россия» партиялул политсоветрал член Нариман Асваровлул дакIнийн бувтунни АьФ-лул Президентнал увку­сса, билаятрай цIусса 25 млн. зузи кIанттурду хIадур бан аьркинссар тIисса махъру. Ганал мукъурттийн бувну, Дагъусттаннай цинярда шартIру дуссар зузалтрал пишарду хIадур буван.
Республикалул профсоюзир­ттал вакилтурал махъру лавхъунни «Нет – росту налогов и цен. Да – росту зарплат и пенсий», «Достойная зарплата!», «Без нормальной заработной платы нет нормальной покупательной способности населения!» ва цаймигу лозунгирттащал.
Миннущала архIал миннал бувсунни промышленностьрал, шяраваллил хозяйствалул ва цаймигу бутIраву экономикалул кка­ккияртту лахъ хьуну душиву. Ми хъанай дур ДР-лул приоритетсса проектру дузрайн дуккан даврил хIасиллу.
Митинграл хIасиллайну кьамул дунни Дагъусттаннал профсоюзирттал организациярдал союзрал резолюция, тикку бувсун бур Аьрасатнал Президент В. Путиннул кьатIаллил политикалул ххуллуцIунгу, ДР-лул БакIчи Рамазан АьбдуллатIиповлул дуллалисса давурттацIунгу кабакьлай бушиву.
Митинграя махъ хьунни «Кавказ – единая семья» тIисса форум-фестивальданул концерт.