ХIакьину шяраваллил хозяйствалул бутIуву паччахIлугърал политикалул чул бишлай дур АПК-раву цIушиннарду даврийн ва инвестициярду кIункIу даврийн, цанчирча аьркинну дур шяраваллил хозяйствалуву технологиялул модернизация ва цIусса техникалул щаллу даву.

ХIасан Аьдилов
ЦIанасса ппурттуву хозяйстварттаву аьркинссаксса техника дакъахьурча, ганил производствалул хIасиллу лащинсса хъанай дур. Техника тIурча цинярда шиннардил мутталий зий духьувкун, кугьна хьуну дур, дакьин дансса даражалий лирчIун дакъар.
Ми гьарзатгу хIисавравун ларсун, цаппара хозяйствар­ттал, цалла кашилух бурувгун, ласлай дур ттизаманнул дискаторду, агрегатру, хъу дугьайсса ва хIаллил лакьайсса техника, миннал ишла дуллай бур федерал лизинграйну техника ласай­сса чIумал 25 процентрал кьюкьин давугу.
Амма 2015 шинал ва гьашину ларсъсса чан-кьансса техникалущал къабюхъанссар шяраваллил хозяйство дуккан дуван ттизаманнул технологиялул даражалийн. Масалдаран, гьашину 4 зурул мутталий республикалул хъузалтрал ларсун дур дурагу 23 шяраваллил хозяйствалул техника 27 млн. къуруширттан. Мунийн бувну, шяраваллил хозяйствалул техникалул ва технологиялул модернизация дуваншиврул, аьркинссар ДР-лул бюджетравату паччахIлугърал кумаг бан. ХIакьину чIявуми хъузалт ялугьлай бур республикалул бюджетрава кумаг бан­ссар тIий багьлул ххирасса техника ласун.