Мартрал 22-нний МахIачкъалаллал бакIчи Муса Мусаев хьунаавкьунни Ленинский райондалийсса ЦIусса Хушетрал жяматращал. Шиккун ванащал бувкIун бия Ленинский райондалул жаваблувсса къуллугъчитал ва шагьрулул собраниялул депутатътал.

З. АьбдурахIманова
Жяматращал хьунаакьин хьхьичI бакIчинал ххал бувунни поселокрал Культуралул къатта, дунни цаппара аьй-бювкьурду. КIицI лавгунни къатлул ялтту бувщуну, духIиндарайн буцин аьркинну бушиву, мукунма амру бувунни «Горзеленхозрал» каялувчинайн багьайссаксса халкь гьан бан «Никто не забыт, ничто не забыто» тIисса мемориал-гьайкалданучIа хIаятраву тIутIив дургьуну, ва кIану низамрайн буцин.
Поселокрайсса № 6 школалул директор Саибат Оьмаровал бувсунни цалла оьрчIащал дуллали­сса давурттая, ми тарбия бавриву дувайсса мероприятиярттая ва спортрал аралуву оьрчIал дуллалисса ккаккиярттая.
Хъирив Культуралул къатлуву Муса Мусаевлул жяматрал хьхьичI бувсунни цивппа ши­ккун бучIаврил мурадрая ва халкьуннал гьаз бувсса масъалар­тту щаллу бан цал хъунмур даву душиву.
Жяматрал бакIчинахьхьун буллалисса суаллу бия ЖКХ-лул хIаллихшиннардия тIайла хьуну, ххуллурдал, транспортрал, аьрщирду дачIаврил масъаларттайн бияннинсса.
БакIчинал кIицI лавгунни, шагьрулул 14-рагу поселокрал чIявуми масъалартту цан хъинну ххуйну кIулшиву ва ми щаллу бан цакьнива махъ буллуну бивкIхьурча, цал махъ бацIангу бантIишиву. Ванал мукунна чIурчIав дурунни, вайми поселокирттах бурувгун, ЦIусса Хушетран къулайшиву душиву МахIачкъалаллачIан гъанну бушаву. Мукунма кIицI лавгунни Хушетрай, машинартту чанну бухьукун, хъуншагьрулий кунма­сса машинарттал «пробкарду» ба­къашиву ва хъинну ххуйсса Культуралул къатта бушиву. Жяматрал кIичIирттавух заллу-зал акъа­сса ризкьи занай бур тIисса аьрзардан бакIчинал увкунни, ризкьилул масъала жяматраща цащава цала дяниву маслихIат ккав­ккун щаллу бан бюхъайшиву.
«На мудангу хIадурссара зул масъалартту щаллу бавриву гьуртту хьун, амма ми щаллу шавриву зулмур гьурттушиннагу чара бакъа аьркинссар. Зун зунма хъунмасса гъира бикIан аьркинссар зува яхъанахъисса кIичIиравалугу марцI бувну, ми­кку мурхьругу бугьансса. Тавакъю буллай ура мартрал 26-нний хьунтIисса щала шагьрулун аьм­сса субботникрайн бувккун, зулла поселокрай марцI-чапалшиву дуван», — увкунни ванал.
БакIчинал бувсунни шагьрулувусса циняв кIичIирттал ла­хъишиву 890 км. душиву, ми бакьин буван 70 млн. арцул итабавкьуну бушиву. Уттигъанну ХIукуматрал Председательнащал хьусса хьунабакьаврий маслихIат ккавкшиву МахIачкъалаллал ва Каспийскаллал дянивсса бухмур ххуллу бакьин буллай байбишин.
Хушетрайсса масъаларттая буслай, поселокрал бакIчи Нуруттин Аьбдуллаевлул кIицI лавгунни, поселок сакин дуршиву ларгмур ттуршукулул 40-ку шиннардий. 1957 шинал шиккун бизан бувну бур ЦIумадиял райондалийсса Хушет тIисса шярава­сса халкь. Муния махъ дирзун дур ЦIусса Хушет тIисса цIа.
ХIакьинусса кьини шикку ялапар хъанай усса ур 13 азара инсан, мигу 13 миллатрал халкь. Давурттал дузалну усса ур 2750 инсан ва сияхIрайн ларсун ду­сса дур 2500 хозяйство. Хушет­рал школалий дуклай усса ур 3 сменалий заназисса 2100 дуклаки оьрчI. Цуппа школа 1227 дук­лаки оьрчIан бувсса бивкIнугу. 180 чIивитIу заназисса детсадравунсса оьрчIал кьюкьлуву бу­сса бур бавцIуну 700 оьрчI. Бур Культуралул къатта, кIива мизит ва мадраса. Поселокрай­сса 52 кIичIираваллива бувагу 2 кIичIиравух асфальт бавкьуну бусса бур, мигу бакьин бан багьлагьисса.
Поселокрал ца яла агьаммур бусса бур аьрщарал участокру заллухъруннай чичаврил масъала ва халкь бигьалаган, чIун гьан дансса кIанттурду бакъашиву.
Жяматраясса рязибакъашивуртту дия хъунмурчIин ччя-ччяни къатраву ттукI лешлашаврил, щин къадуллалаврил, канализациялул щинну гьансса бургъурду бух шаврил масъаларттацIун бавхIусса. Мукунма детсад, школа, спортзал бакъашивруцIун бавхIусса.