Декабрьданул 21-нний Лакрал театрданул Оьруснал театрданул Хъунмур залданул сахIналий ккаккан дунни «Интнил хьхьу» тIисса хъуннасса программа.
Бадрижамал Аьлиева
Ва концертрайн бавцIусса кIанттайнсса, яни «входной», билетругума бавххуну бия. Амма щябивкIсса кIанттурдайнми билетру лавсми инсантал цаппарасса къабувкIун, миннал кIанттурдай щябивкIуна «входной» билетру лавсми. Ми къабучIаврил багьанагу бухьунссия ва кьини цавай инсантал Интнилхьхьу дуван цалла-цалла шяраваллавун лагаву, цавайгу – цайми шадлугъирттайн лагаву, масалдаран, вара кьини дия 1-мур ЦIувкIуллал шяраваллил гьарца шинах дувайсса батIавугу.
Театрданул жанахIраву дия миллатирттал дуки-хIачIия (бартри, ккунукрал ххункIру, дукьрахIан ва м.ц.). Миннул тIин-тIааьн ххал буван ччимигу хъинну чIявусса бия.
СахIналий тIурча интнил концерт дайдирхьуна. Мунил дайдихьулий Лакрал театрданул чулухасса Барчаллагьрал чагъарду, ХIурматрал грамотартту дуллуна театрданул 80 шинал юбилейрайнсса хIадуршиннараву чIарах бавцIусса, ка-кумаг бувсса лакрал хъами-чиваркIуннан.
Концерт дачин дурну бия Саният Рамазанова ва Шамсуттин Къапланов.
Лакрал театрданул артистурал ккаккан дунни миллатрал аьдатру, багьу-бизу, культура. Концертрал хъамалну бия Минажат Ухмачева, Загьидат Муслимова, Карин Кьадинаев. Цилва тамашачитал чIявуну ххари къабувайсса, цуксса хIайпнугу, сахIналийн нажагь бакъа къабуккайсса Минажат Ухмачевал ххаллилсса чIунихрив жямат хъиннува мякьну бивкIун бия, хъатру ришлай, цимилагу буккан бунни ва балай учин.
Концерт, дукIу кунна, чIюлу дунни халкьуннал инструментирттал ансамбльданул: ХIасан-ХIусайн Дибиров, Адам Макьсудов, Мурад МахIадов ва Ися МахIадов.
Концертрал ахирданий хьунни Муса Оздоевлул постановкалийсса лакрал къавтIаврил премьера, презентация.
— Ва хьунни Муса Оздоевлул чулуха лакрал агьалинан Интнил байрандалийнсса бахшишну. Хъинну ххуйсса къавтIаву дур. Мукунна ххаллилсса къавтIаву дур «Къиссугу», ванияр 10 шинал хьхьичI Муса Хосботовичлул дирхьусса ва тамашачитуран ххира хьусса. ДакI дарцIуну бура ва къавтIавугу тамашачитуран ххираминнувасса цану хьуншиврийн, — тIий бур ва концерт дачин дурсса ДР-лул Халкьуннал артистка Саният Рамазанова.
