«Шяраваллил хозяйствалул аьрщив мюнпатну ишла дуллалаврил масъала чулийн буккан баву хIакьину хъанахъиссар Дагъусттаннай яла агьаммур задачану», — увкунни ДР-лул Халкьуннал Мажлисрал Аграрий политикалул комитетрал председатель Жяъпарбаг Щамххаловлул, аьрщарал законодательствалуву дахханашивуртту даврил хIакъираву бусласисса чIумал.
Документраву дахханашивуртту хIадур дуллай дур «Единая Россия» партиялул.
Щамххаловлул увкусса куццуй, цIуну дахханашивуртту даврийну аьрщив мюнпатну ишла даврил масъала бюхъайссар цамур даражалийн буккан бан.
«Шяраваллил хозяйствалул аьрщив машан ларсъсса инсантурая тIалавшинну дакъа тIий, га аьрщарай производствагу дачин къадуллай бухьувкун, миннаща бюхълай бур аьрщив цайминнан даххаврия мюнпат ласун», — увкунни Щамххаловлул.
Ганал мукъурттийн бувну, хIакьинусса кьини аьрщив ларсъсса заллухъруннал аьрщив цила багьайкун ишла дуллай бакъар, миннал ми аьрщив субарендалий дуллай бур. Аьрщарал закондалий ккаккан бувну бур паччахIлугърал чулухасса аьрщарал надзор дикIан аьркиншиву, аьрщив ишла даврил ялув бацIан аьркинну бушиву муниципалитетирттангу, жяматрангу.
Щамххаловлул увкусса куццуй, аьрщив ишла дуллалаврил анализ ва контроль буллан аьркинссар кIанттул цилакаялувшиврул органнал, амма чIяруми районнал цайнма багьайсса масъалартту щаллу буллай бакъар.
«Аьрщив мюнпатну ишла дулланшиврул, ттул пикрилий, аьркинни гужлан дуван юридийсса, административ ва гражданско-правовой жаваблувшиву аьрщив тIайлану ишла даврихлу. Аьрщарал законну лиян дуллалисса аьрщарал заллухъруннаща зехлан аьркинни аьрщив.
Мукун булларча, республикалий шяраваллил хозяйствалул аьрщив мюнпатну зузи дуллантIиссар, цайрасса жаваблувшиву чIалай», — увкунни комитетрал председательнал.
Лажин хIадур дурссар
ХI. Аьдиловлул
