Мартрал 17-нний Шеърилугърал театрдануву Дагъусттаннал паччахIлугърал педагогикалул университетрал живописьрал кафедралул хъунама, художник Аьбдулзагьир Мусаевлул суратирттал выставка хьунни.
З. АьбдурахIманова
Тамашачитурал хьхьичIун дуккан дурну дия художникнал личIи-личIисса шиннардий личIи-личIисса регионнайсса идарарттал чIирттай дирхьусса монументирдал суратру. Тамашалун дирхьусса давурттавух дия Къумукьнал театрданувусса гобеленнайсса, МахIачкъалаллал Свято-Успенский кафедралул килисалул ва Магасрайсса «Зал Славы» Ингушнал бакIчинал резиденциялул чIирттайсса монумент суратру.
Выставка тIитIлай, республикалул культуралул министрнал хъиривчу Елена Гьаруновал кIицI лавгунни цума-цагу художникнал чIумуя чIумуйн цалва тамашачитурал хьхьичIун дуккан дуллан аьркиншиву цала канила дурксса давурттив.
Выставкалул автор барча уллалисса ва ванал творчество халкьуннаву ххирану ва тIалавну душивриясса махъру лавхъуна ДР-лул Чичултрал союзрал хъунама МахIаммад АхIмадовлул, ДР-лул Художниктурал союзрал хъунама Кьурбанаьли МахIаммадовлул, искусствовед ва художникнал кулпат Наталья Мусаевал ва цайминнал.
Аьбдулзагьир Мусаевлул кIицI лавгунни, ччяния шинмайва цал мурад бивкIшиву хаснува вай давуртту тамашалун дуккан дувансса, цанчирча хъунисса идарарттал чIирттай дирхьусса суратру чIявусса инсантураща нажагь дакъа ккаккан къашайну тIий. Художникнал, масалдаран, бувсунни Магасрайсса бакIчинал резиденциялул чIирттай дирхьусса суратирттай ишла бувшиву ингушнал халкьуннал творчествалул сюжетру, миннал авадансса фольклорданувасса вирттаврал симанну. Ишла дурну дур гьарцагу ингушнан аьзизсса УрчIва къалалул ва мубараксса Тхаба-Ерды тIисса кIанттул ва Маитцели зунттул лишанну, тарихчитуран, археологтуран Ингушнаву ляркъусса артефактирдайсса накьичру ва ингушнал бусалдаравасса сюжетру.
Выставкалия махъ театрданул кIилчинмур зивулийсса хъунмур залдануву ванал творчествалул минахуртурал Аьбдулзагьир Мусаевлухьхьун личIи-личIисса суаллу буллалисса, цаннащал-ца дакIнийхтунусса ихтилатру бувсса хьунабакьаву хьунни. Художникнал бувсунни увшиву цува Хавасюртлив, кIулшивуртту ласаврих хъуннасса къулагъас диркIсса кулпатраву. Лахъисса ва бизарсса кIинтнил хьхьурдай чIахху-чIарахмигу, буцири уссур-ссугу бавтIун, ванал амудадал буккайсса бивкIун бур дунияллий машгьурсса классиктурал произведенияртту ва миннуву цанма яла ххирами бивкIшиву машрикьуллал чичултрал, шаэртурал асарду. Хьунабакьаврий художникнал бувсунни сурат дишин хьхьичI цавува хIасул шайсса асардая, муниха зун айишиннин дакIнил куртIниву сукку хъанай бикIайсса тIилисинная.
