Итни кьини щалвагу билаятрай кIицI ларгунни Щинал кьини. Дунияллий хъунмур бутIа щинахь бухьурчагу, шиная шинайн чан хъанай дур щинал сурсатру.

Зулайхат Тахакьаева
«РусГидро» ОАО-лул социал проектирдаву бур щинал сурсатирттал луртан дансса ва ми дуруччаврил агьамшиврия жяматрахь буслансса проектругу. Ттининнин «РусГидро» ОАО-лул рахIму-цIимилул ва спонсоршиврул программалул лагрулуву Санкт-Петербурграйсса «ДЕТГИЗ» тIисса хъинну хьхьичIарасса оьрчIансса луттирду итабакьай­сса идаралул итабавкьуну бур дянивми ва лавайми классирттал дуклаки оьрчIансса щинаясса лу­ттирду: «Вода – необычное в привычном», «Путешествие капли воды» ва цаймигу. Ларгсса шинал ва идаралул итабавкьунни «От Мачты до Киля» тIисса Аьрасатнал порт хIасул шаврия ва щалва билаятрайсса портирдая бусласисса лу. Ва луттирал презентация хьунни итни кьини Дагъус­ттаннал Миллатирттал библиотекалуву. Мероприятие хас дурну дия Щинал кьинилун.
Муний гьуртту хьунни «Каспий» тIисса щинал журалул спортрал школалул директор Мухтар Оьмаров, дуклаки оьрчIру, «Алые паруса» тIисса жамирду байсса оьрчIал технический творчествалул центрданул хъунмур Саида Кьурбанова, ми­ккун заназисса дуклаки оьрчIру, ДР-лул КIулшиву дулаврил министерствалул зузалт.
«РусГидро» ОАО-лул Да­гъусттанналмур филиалданул СМИ-рдащалсса ва жяматращалсса дахIавурттал отделданул пишакар Елена Каланджиевал бувсунни Щаллагу дунияллул щинал кьини хIасул шаврия. Му учредить дурну дур ООН-далул генерал Ассамблеялул 1992 шинал. Муния шихуннай Щинал кьини кIицI лаглай бур аьрщарайсса инсаннал оьрмулуву щинал агьамшиврия буслансса мурадрай.
Дагъусттаннай Щинал кьини кIицI лагаврил агьамшиву лапра хъуннасса дур. Цанчирча му кьини савав хъанай дуну тIий хIачIайсса щин ишла даврил ялув инсантал пикри буллали бан. Дагъусттаннайсса электроэнергиялул 99 % итабакьлай бур хъунмурчIин щинал сурсатир­ттайну. Сулакь неххал хIавзирдаву бусса бур 7 гидроэлектростанциялул бартхьхьирирду: Чиркейннал, Чириюртуллал, Миатлиллал, Гъуниннал, Гергебиллал, Ирганайннал ва ХIацатуллал. Вай барт­хьхьирирдаву салкьи хьусса щин ишла дуллай бур, так энергетиктурал дакъасса, хъуру дагьан, балугъирттал промышленностьраву. Республикалул чIявуми шагьрурдал ва шяраваллал агьалинал хIачIайсса щин най дур Чиркейннал, Миатлиллал ва Чириюртуллал бартхьхьирирдая.
Гьашину Щинал кьинилул лагрулуву гидроэнергетиктурал бунни Щинал агьамшиврун хас бувсса художествалул давурттал конкурс, сакин бунни Жамирду байсса ОьрчIал технический творчествалул центрданувун заназисса ва «Каспий» школалул дуклаки оьрчIал дурсса давур­ттал выставка. Ми конкурсирдаву ххув хьусса оьрчIан дуллунни «РусГидро» ОАО-лул Дагъус­ттанналмур филиалданул чулухасса бахшишру.
«Экологиялуясса кIулшиву дулаврин кабакьу буллалисса дур «РусГидро» ОАО-лул «Чис­тая энергия» тIисса рахIму-цIимилул программагу. Мунил лагрулуву компания зий дур тIабиаьт дуруччаврин ва спорт хьхьичIуннай даврин хас був­сса социал проектру дузрайн бу­ккан буллай, бур хъун хъана­хъисса никираву инженернал ва гидроэнергетикнал пишалух гъира бутансса проектру. Вай проектру цивппагу бур компаниялул кадрардал потенциал хьхьичIунмай бансса программалун кабакьу буллалисса», — увкунни Елена Каланджиевал.