Мартрал 13-нний МахIачкъалаллал бакIчи Муса Мусаевлул ххал бунни шагьрулул цаппара кIичIиртту.
ХьхьичIа-хьхьичI бакIчи ивунни Ярагъскийл цIанийсса кIичIиравун. Шикку ванал амру бувунни тротуарданийн бухкIуллу, чурттурду буклакисса ттучаннал, кафердал, рестораннал заллухърунная цала идарарттал фасадру дакьин дан, халкь лагайсса кIанттурдая цалва чурттурду, рекламалул уларду дукьан. Муса Мусаевлул хъуннасса аьй-бювкьу дунни «Планета Детства» ттучандалул каялувчитурай. БакIчинал тIалав бунни вайнная гиккусса аьркин дакъасса техника дукьан ва бухсса скамейкарду бувкьун, цIусса бишин. Муса Мусаевлул мукунма амру бувунни тротуарданий бивхьусса цаппара ларекру букьан. Мукунна ванал къулагъасралун дагьунни Р. ХIамзатовлул цIанийсса кIичIиравусса скверданул тийгу-шийгу лархъсса рекламалул афишарду ва тIалав бувунни вай чан дуван. Мукунма Муса Мусаевлул ххал бувунни Манташевлул цIанийсса кIичIиравалу. Шикку вайннал итталун дагьунни строительствалул цIинцI дирчусса муркъи (свалка). БакIчинал амру бувунни ва кIану марцI бувну, мугьлат бакъа шикку оьрчIру тIуркIу тIунсса площадка буван. Хъирив вай бивунни ХIамзатовлул цIанийсса кIичIираву «Дом быталучIа», «Детский мир» ттучандалучIа ххуллу гьарта буллалисса, тротуарду дакьин дуллалисса кIанайн. Муса Мусаевлул хIукмулийну, чIал къавхьуну Апанни Къапиевлул гьайкал дирхьусса кIанай буван тIий бусса бур цIусса чурттурду.
