Мартрал 20-нний 80 шин хьунтIиссия Дагъусттаннай цалчинсса химиялул элмурдал доктор, Аьрасатнал Технологиялул элмурдал академиялул член-корреспондент, ДР-лул элмурдал лайкь хьусса деятель, профессор, ДГУ-рал аьмсса химиялул кафедралул хъунама Ттаттаев Оьмар Аьлиллул арснан.

ХьхьичIмукъун кIанай
1993 шинал июнь зурул ахирданий на буттащал най буссияв Дагъусттаннал университетрал хIаятравух. Цакуну буттайн архнияту щилъяв оьвкуна. Жу лагма-ялтту буруглай бунува, гъан хьуну, буттайн хъямала агьуна чурххал лахъ акъасса, увцIу-кьувцIусса, чаннасса симандалий иминсса пишлищалсса адамина. Чара-цира тIий, аслу-суал буллай ия. Душ дуклан бакьин увкIшиву бувсукун, кумаг аьркин хьурча, чара бакъа цачIана гъанхьу куну, буттахьхьун цала визитка дуллуна.
Тинмай шайхту, на буттахь цIувххуссия га цури, куну. Оьмар Ттаттаеври учайхту, гихунмай га цу уссарив буслан личIисса аьркиншиву дакъая. ЦIанил буслай бия цимурца. Ганая ттун кIулссия чIивинияцIава. Школалий жухь ганая учительтурал чIявусса бусайва пахрулий.
Гай бачIвасса махъру бакъая Оьмар Аьлиловичлул ттул буттахь увкусса. Аьркин хьуссания кумаггу бантIиссия, чIяву-чIявусса цайминнан кунма. Дуклан бухлайни аьркин къавхьуна ттун Оьмар Аьлиловичлул кумаг. Гихунмай бюхъайва цимилгу аьркин хьун, агарда сагъну ливчIссания. Амма шиннагу чIарах дукканнин, 1994 шинал январь зурул 30-нний, оьрмулул ва творчествалул аргъираву дунияллия лавгуна цала бусса оьрму хъун хъана­хъисса ник тарбия дуллай ва элмулул къуллугърай гьан бувсса бюхттулсса аьлимчу, абадлий элмулул тарихраву личIан нясив хьуну.
Ттинин сагъну ивкIссания Оьмар Аьлилович дунияллул яла хьхьичIунми академиктурал сияхIраву хьхьичIххуттай икIанссия, тIун бикIай га кIулсса аьлимтал.
Та цал акъасса ххишала тачIав къаккавкссия ттун Оьмар Аьлилович. Таний цалчин бивсса асар дакIний ливчIунни хIакьинусса кьининингу.
Интдайдихьулул хьхьуну дунияллийн увксса Оьмар Ттаттаевлул бувтсса щалва оьрму лавгун бур инт кунма. МарцIсса, чанна­сса, яргсса. Инт куна, лавгссар оьр­мулувагу.

Оьрму ва элму
Ттаттаев Оьмар Аьлиллул арс увссар 1936 шинал Хъусращиял шяраву хъудугьул кулпатраву. 1954 шинал Ккуллал дянивмур даражалул школагу къуртал бувну, дуклан увхссар Дагъусттаннал ПаччахIлугърал университетрал естествознаниялул факультетрайн. Университет къуртал бувну махъ зий айивхьуссар Хъусращиял школалий химиялул ва биологиялул учительну. Зий дачIи шиннагу къаларгун, ивтссар завучну.
1960 шинал увххун ур Ростовуллал ПаччахIлугърал универ­ситетрачIасса аналитическая химиялул кафедралул аспирантуралувун. 1963 шинал химиялул элмурдал доктор, профессор К. Н. Багдасаровлул каялувшиврулу дурурччуссар кандидатнал диссертация. Вара шинал сентябрь зуруй зий айивхьуну ур Дагъусттаннал ПаччахIлугърал университетраву аьмсса химиялул кафедралий хъунама преподавательну.
Элмулул давриву цIакьсса дахIавуртту диркIссар Ухссавнил Ккавкказнал предприятиярттащал. Оьмар Аьлиловичлул ахттар дурсса давуртту рирщуссар «Аналитическая химия», «Заводская лаборатория» журналлай. Оьмар Аьлиловичлул ахттар дурсса давурттал агьамсса кIану бугьлай бивкIссар билаятрал производство хьхьичIуннай шавривугу.
1966 шинал конкурсрал гьанулий Ттаттаев увчIуссар аьмсса химиялул кафедралул доцентну. Докторнал диссертация дурурччуну, 1973 шинал, оьрмулул 37 шинаву Оьмар Аьлилович хьуссар Дагъус­ттаннай цалчинсса химиялул элмурдал доктор.
1975 шинал конкурсрал гьанулий увчIуссар кафедралул профе­ссорну.
1975-80-ку шиннардий зий ивкIссар ДГУ-рал химиялул факультетрал деканну. 1972 шиная тIайла хьуну цува дунияллия гьаннин зий ивкIссар аьмсса химиялул кафедралул хъунаману.
Оьмар Ттаттаев ур 500 элмийсса даврил, мяйва луттирал ва студентътурансса мукьцIалунния ливчусса элмулул ва методикалул ххалдигьавурттал автор. Ганал давуртту рирщуну дур академиялул журналлай, конференциярттал материаллай.
Чялишну машгьур дуллай ивкIун ур элму. Гьарцагу шинал гьуртту шайсса ивкIун ур Москавлив элмулул ва техникалул информациялул центрданучIасса семинардай. Ччя-ччяни гьуртту шайсса ивкIун ур щалагу Союзрал ва халкьуннал дянивсса конференцияр­ттай, батIавурттай. ЧIявуну гьуртту шайсса ивкIун ур диссертацияртту дуруччаврил официальныйсса оппо­нентну.
Студентътурал элмийсса ах­ттар бавурттай каялувшиву дуллалаврихлу, Оьмар Ттаттаев лайкь хьуну ур СССР-данул ва РСФСР-данул КIулшиву дулаврил министерствалул чулухасса хIурматрал грамотарттан, СССР-данул ВДНХ-лул медаллан ва чIярусса цаймигу лишаннан.
Профессор Оьмар Ттаттаев уссия за кIулсса сакиншинначи, кафедралул элму ахттар дайсса кафедралул каялувчи, ВУЗ-ирдал, научно-исследовательский институтрал, республикалул предприятиярттал научно-исследовательская лабораториялул каялувчи.
Лавайсса даражалул аьлимтал зузисса Оьмар Ттаттаевлул каялувшиврулусса аьмсса химиялул кафедралул дурну дур республикалул 35 производствалул предприятиярттансса, винсовхозирттансса ва цаймигу организациярттансса личIи-личIисса щинал гидрохимиялул анализру.
Профессор Оьмар Ттаттаев чялишсса гьурттушинна дуллай ивкIссар университетрал ва республикалул жяматийсса оьрмулуву. 1981 шиная тихунай уссия ДГУ-рал парткомрал ва профкомрал вакилну, ВОИР-данул председательну, гьуртту шайссия Обкомрал коми­ссиярттал давриву.
Га уссия Ленинградуллал ва химиялул технологиярттал Хъунмур Советрал вакилну, СССР-данул элмурдал академиялул аналитическая химиялул элмийсса Совет­рал вакил, СССР-данул Рангсса муххал министерствалул Элмий­сса советрал вакил, ДАССР-данул СовминдалучIасса химиялул ва химиялул технологиярттал Координациялул советрал секциялул председатель, СССР-данул Элмурдал академиялул аналитическая химиялул Элмийсса советрал Ух­ссавнил Ккавкказналмур отделениялул председательнал заместительну. Агьамсса кIану бувгьуссар Оьмар Ттаттаевлул республикалул халкьуннал хозяйствалун кумаг бавриву, республикалул кIулшиву дулаву лахъ шавриву.
Дагъусттаннал элму хьхьи­чIу­н­най дан бувсса захIматрахлу Оьмар Ттаттаевлун дуллуну дур «ДАССР-данул элмулул лайкь хьу­сса деятель» тIисса цIа.
1992 шинал Оьмар Ттаттаев увчIуну ур Аьрасатнал Технологиялул элмурдал академиялул член-корреспондентну.
Оьмар Ттаттаевлул каялувшиврулу кандидатнал диссертация дурурччуну дур 28 аспирантнал. Миннавасса шама цIанакул зий усса ур Лаоснаву — Ка Салемсук, Сириянаву — Сувед Клод, Кампучиянаву – Сиет Жуй.

Кулпатрая
Оьмардул ва Зулайхатлул кулпатраву хьуна 4 оьрчI. Хъуна-хъунама арс Георгий, Мос­кавуллал университетрал химико-геологический факультет къуртал бувну махъ, зий уссия ДНЦ РАН-далий. ЦIанасса чIумал Георгий зий уссар Канаданаву. Хъиривма арснал Гелиордул къуртал бувссар Москавливсса институт тонкой химической промышленности. Аспирантурагу къуртал бувну, предзащитагу дурну, нитти-буттачIан МахIачкъалалив нанисса чIумал, Москавлив аэропортрай авариялухьхьун иривну дунияллия лавгссар. Шамилчинма арс Жамалуттин зий ур МахIачкъалалив. ЧIана-чIивима арс Арсен кулпатращал ялапар хъанай ур Моздокрай, цала организациягу тIиртIуну.

ДакIнийн бичавуртту
Арсен Рамазанов, химиялул элмурдал доктор, профессор, Дагъусттан Республикалул элмулул лайкь хьусса деятель, ДГУ-рал химиялул факультетрал декан:
— Оьмар Аьлиловичлущал на кIул хьуссара 1969 шинал. На дуклай уссияв 2-мур курсирай, Оьмар Аьлиловичлул ттухь дишайва аналитическая химиялул дарс. Ганал каялувшиврулу дурурччуссар дипломрал даву. На 5-мур курсираву дуклакисса чIумал архIал лавгссару Ростовуллал университетравун, конференциялийн (на студент, га ттул элмийсса каялувчи). Оьмар Аьлиловичлуя байбивхьуссар ттул элмулувунсса ххуллу. Университет къуртал бувну махъ ца шинай на зий уссияв ЦIуссалакрал школалий. Муния махъ, Москавуллал университетрал аспирантурагу къуртал бувну, кандидатнал диссертациягу дурурччуну, на зана хьура Дагъусттаннайн. Зий айивхьура Элмурдал академиялул Дагъусттаннал филиалдануву лабораториялул хъунаману. Оьмар Аьлилович университетраву кафедралул хъунаману зий ия. Мичча дайдирхьуна жул даврил уртакьшивугу. Ттул каялувшиврулу зий уссия, Москавуллал институт тонкой химии къуртал бувну махъ, аспирантуралуву ккалакки­сса Оьмар Аьли­ловичлул кIилчинма арс Гелиор. Буттал кIану бугьан­сса аьлим­чу хьунссия ганаягу, амма 24 шинал оьрмулуву апатI хьуну, дунияллия лавгуна.
1993 шинал, докторнал ди­ссертация дурурччуну махъ, Оьмар Аьли­ловичлул ттуйн оьвкуна цала каялувшиврулусса аналитическая химиялул кафедралий профессорну зун. На рязи хьуссияв кIирагу даврий зун, филиалданувугу, университетравугу. Оьмар Аьлиловичлун тIурча ччай бия на щаллуну факультетрал кафедралий зун увкIун. Нава дуклан увхния шийнай Оьмар Аьлилович дунияллия гьаннин жу ганащал уртакьну зий, дусталну буссияв. ЧIявусса архIал лавгссару жу Ростоврайн, Нальчик­райн конференциярттайн. Шиккурагу дайссия конференцияртту. Ганал хиял бикIайва хIаллицIух цалла даву ттуйн тапшур дан, цувама кафедралий профессорну зун.
Барчаллагьрай ура кьадарданийн ттулва оьрмулуву Оьмар Аьли­лович хьунаавкьуну тIий, нава ганащал цачIу зий, гъансса дус­талну бивкIун тIий. Жул дусшиву муксса цIакьсса дияхха, Оьмардул цала чIивима арснан ттул цIа дирзуна. Ххарину ура Оьмар Аьлиловичлул даву гихуннай нара дуллай уну, хIатта нава цамур кафедралул (фармацевтикалул химиялул) хъунаману ухьурчагу. Гьарцагу чулуха ххаллилсса инсан ия. Оьмар Аьли­ловичлул чаннасса ва марцIсса аьпа абадлий яхьунтIиссар га кIулну ивкIциринначIа.
Сулайман АхIмадов, профе­ссор:
— Оьмар Аьлиловичлущал кIулну ттул хьуну дия мукьцIаллийсса шинну. Ростовуллал университетрал аспирантура къуртал бувну махъ, 1963 шинал Оьмар зий айивхьуна Дагъусттаннал ПаччахIлугърал университетраву химиялул ва биологиялул факультетрай. Та шинал на дуклай уссияв тава факультетрай. Пединститутраву зузисса чIумал Оьмар Аьлиловичлул ттун маслихIат бувна цала каялувшиврулу аспирантуралувун уххан. Тай шиннардий кафедралул хъунаману зий уссия Бежаев МахIаммад Сайпуллаевич. Ганал хьхьичIунну дук­лай бивкIсса жагьилтал аспирантуралувун тIалав байва, амма чIявуми аспирантътурал каялувчи Оьмар Аьлилович ия.
ЦачIу зузаву дакъассагу, жул дянив цIакьсса дусшиву дуссия. Ччя-ччяни цанначIан ца буххайссияв, ахттайнсса чIяруну цачIу дукай­ссия. Лакку билаятрай — Хъусрахь, ЦIущарнив ва Гьущав жу чIявуну шайвав. Оьмар ия тяхъасса, хъярч-махсара бусса, хъуниминнащалгу, мюрщиминнащалгу маз лякъин кIулсса, аьчухсса инсан. ЧIярусса шяраваллаву бия ганал дустал, цIа-бакI кIулсса. ХIакьинусса кьинигу ЦIущуллал арамтал дакIнийн бичлан бикIай Оьмар хIаласса ишру.
Ца базилух жу лавгссияв Ла­ккуйн. Жущал уссия Ххюлусмату­сса Абачараев Муса ва Гьущатусса АхIмадов Оьмари, аьпабиву. Жу Ххюлусмав дукьрахIангу хIачIарду, лахъи ларгсса, кьурчIи хьусса дия цирда. Амма Оьмардул чIярусса цIарду дуллай, дукьрахIанттия, ххари бувна жу бувхсса къатрал заллухъру. Муния махъ лавгру ЦIущарнив, чIун дия хьхьудяризавайсса. Оьмардун кIулсса Хъунмямма тIисса учительнал къатлул чIавахьулу бия тIивтIуну. Ганал мюрш чартту бишлай, шания заллухъру бизан бувну, хъамалушинна дуван бувна. Яла жу лавгру Гьущиял шяравун, жухва ялугьлагьи­сса гьалмахтурачIан.
Коньяк кIилийну ххира дур­сса шин дия (70-ку шинну). Университетрал парткомрал батIаврий ца ивкIун ур, коньяк ххира дуршиву баврив тIий, цIухлайча.
— Ттун мунил пикри бакъар, — куну бия Оьмардул.
— Циванни? — куну, цIув­ххукунгу:
— 2-3 коньякрал шуша ларсун бучIай заочниктал (таний арцул хаварду бувагу къабикIайссия), ттигу норма мура ританна, — увкуну бия.
Танийсса ректор Абиловлул цахьва:
— Оьмар, ина вилва хъярчру кьабити укунсса кIанттай, — увкукун:
— Хъярч буллай акъарахха, на буслай ура иш цукун бикIантIиссарив, — куну, цинявппа хъяхъи бувну бия.
Оьмар Аьлилович хъинну бюхттулну, бусравну уссия билаят­рал яла хьхьичIунми аьлимтураву. Оьмар дунияллия лавгунни жагьилну, 57 шинал оьрмулуву. Лавг­мур зана бан къашай, цIуллушиву дулуннав Оьмардул кулпатра­хьхьун, гъан-маччанахьхьун, щалагу Хъусращиял жяматрахьхьун.
МахIаммадбаг ХIусайханов, физикалул ва математикалул элмурдал доктор, профессор:
— Оьмар Ттаттаев ия, Дагъус­ттаннай акъассагу, щалагу Ухссавнил Ккавкказнаву яла хьхьичIунми аьлим­туравасса ца. Оьмардуща бювхъуна жагьилсса оьрмулий Дагъусттаннай цалчин ласун химиялул элмурдал докторнал цIа. Га ия Да­гъусттаннал ПаччахIлугърал университетраву химиялул элму зузи даврил ва му лахьхьин даврил цIакьсса ттарцI. Оьмар Аьлиловичлул каялувшиврулу хIадур був­ссар чIявусса аьлимтал, миннавугу, хъунмурчIин, жулва лак.
Аьпабиву, ия хасиятрал ххуйсса, дусшиву дангу, дуруччингу кIулсса тяхъасса, гьарцагу чулуха итххявх­сса, шавхьсса инсан.
Оьмардун хъинну ххирая лакгу, лакку билаятгу. Га ия жула лакку зунттаву хъуна хьусса, цува лявхъу­сса кIанттая пахрулийсса, агьайкунсса лаккучу. ЧIявуя Оьмардул дустал, так ца лакраву бакъассагу, щалагу Дагъусттаннай, Аьрасатнаву.
Оьмардул бувтсса оьрму бур яргсса, цала тарбия бувминнан, цIанакулсса аьлимтуран, дустуран, цинявппагу цува кIулминнан эбрат­рансса.
Ухумааьли МахIаммадбагов, химиялул элмурдал доктор, профессор:
— Оьмар Аьлиловичлущал на кIул хьуссара 1968 шинал, га М. Ломоносовлул цIанийсса Москавуллал ПаччахIлугърал университетравун конференциялийн увкIсса чIумал. Таний на ияв химиялул факультетрал студент. Ганал ттуйн ххуйсса асар биян бувуна хъунасса аьлимчушиврий бакъассагу, дакI хъинсса инсаншиврийнугу.
1973 шиная 1978 шинайн бияннин ттун багьссар Оьмар Аьли­ловичлул каялувшиврулу зун ДГУ-рал аьмсса химиялул кафед­ралий. Таний бувчIуна ттун, хъунасса аьлимчу акъассагу, га ушиву ххаллилсса сакиншинначигу. Гьамин, Оьмар Аьлиловичлулли сакин бувсса дагъусттаннал химик-аналитиктурал школа.
На Чачан-Ингушнал ПаччахI­лугърал университетраву зузи­сса чIумал (1978-1993 шиннардий) жул дянивсса арарду ва дахIавуртту цIакь хьуна, жу гъан­сса дустал хьунав. Жу ччя-ччяни хьунабакьайссияв, цачIусса элмулул давурттаха зий бикIайссияв. АрхIал лагайссияв ччя-ччяни Совет Союзрал шагьрурдайн командировкардайн. Жува чун гьарчагу, гьарцагу кIанай хьунабакьайва Оьмар Аьлиловичлул чIявусса дустал. Га даингу ххарину кьамул айва, ганащал маслихIат ккаклан бикIайва.
Ччяни лавгунни Оьмар Аьлилович оьрмулува. Амма кутIасса оьр­мулий ганаща бювхъунни чIярусса давуртту дан. Оьмар Аьлилович ия цалва миллатрал цIанихсса арс, билаятрал цIанихсса гражданин, бюх­ттулсса аьлимчу, хъинсса инсан ва ххаллилсса дус.
Валентина Владимирова, ДГУ-рал аналитическая химиялул кафед­ралул доцент:
— Тай архсса 60-ку шинну ца кьаралданий най дия Ростовуллал ПаччахIлугърал университетрал химиялул факультетрал аналитическая химиялул кафедралул зузалтрал ва лавайми курсирдаву дуклакисса студентътурал оьрмулуву. Цакуну жул гьарца кьинисса оьрмулувусса паракьатшиву дакъа хьуна – жучIан увкIуна цIусса инсан, ссигъасса Ккавкказнавасса аспирант. Жу, жагьилсса душру (хъунмурчIин, душру бия аналитикалул кафедралий пишакаршиву лахьлай), личIи-личIисса хIилларду ляхълан бикIайссияв кафедралул цIусса зузала ххал хьун, ганащал гъанну кIул хьун.
Га ия чурххал лахъ акъасса, илтIа-кIюласса жагьил, жуяр ссалчIав личIи акъасса. Амма ва ялттувасса асар бивкIун бия. Ганал дахьва ихтилат байбишайхтува, жун бувчIуна жула хьхьичI ушиву, жунма так лу­ттирдая, кинордаву ва радиолувух хъинну нажагьну баяйсса, караматсса макьаннайну кIулсса ккавкказнал халкьуннал вакил.
Га жагьилнал дия жун тачIав хьунакъадакьайсса фамилия — Тта_ттаев ва караматсса цIа, жун луттирдая кIулсса МахIаммад, АхIмад, Ибрагьим дакъача, Оьмар. Най бунува хьхьичI бацIайва яргсса баргъ ва Каспий хьхьири. Амма вай бия так ялттувасса асарду. Оьмардух аьркинну бия вичIи дишин. Жунгу ххирая вичIи дихьлан архсса Дагъусттанная, тикку ялапар хъанахъисса караматсса халкьунная, чIиви оьрчIал дакIру дусса кьянкьа-кьурчIисса арамтурая ва марцIсса, личIлулсса зунттал хъанния ганал бусласисса хавардах.
Оьмар ия захIмат ххирасса. Жун га чIявуну ххал шайва элмийсса биб­лиотекалуву, химиялул лабораториялуву экспериментру буллай, цала элмийсса каялувчи Константин Багдасаровлущал ихтилатрай. Ганаву бия лагь къашайсса элмулухсса ва даврихсса гъира, гьавас, халкьунначIансса дакI хъиншиву, тяхъасса хасият, ххаллилсса организаторнал бюхъу. Вай хасият­ру Оьмар Аьлиловичлул ядуруна цалва бусса оьрмулий. Яргну бувтуна цалва кутIасса оьрмугу. ЧIявуя Оьмардуя лахьхьинмур, кьамул банмур. Амма ччяни лавгунни жул дянива.
Хамисат АхIмадова, ДГУ-рал аналитическая химиялул кафедралул доцент:
— Оьмар Аьлилович ия щалагу Ухссавнил Ккавкказнаву химиялул элму хьхьичIуннай давриву агьам­сса кIану бувгьусса хъунасса аьлимчу, ххаллилсса элмулул сакиншинначи, жяматийсса деятель.
Багьа бищун къашайсса даву дурссар Оьмар Аьлиловичлул рес­публикалул кьатIувгу хьхьичIунсса Дагъусттаннал химиктурал элмулул школа сакин бан.
1973 шинал Оьмар Аьлилович хьуссар Дагъусттаннай цалчинма химиялул элмурдал доктор.
Тания шихунай, цува аьпалу­хьхьун гьаннин каялувшиву дуллай уссия ДГУ-раву яла хъунмурну ккаллисса аьмсса химиялул кафедралий (махъ ва кафедралул гьанулий сакин бувссар шанма кафедра). Кафедралий тIивтIуссар Ухссавнил Ккавкказнаву ца яла хьхьичIунсса аспирантура.
Нава талихI бусса инсаннан ккалли бара, Оьмар Аьлиловичлущал зий бивкIун тIий, хьхьичI аспиранткану, яла ганал каялувшиврулусса кафедралул зузалану.
Оьмар Аьлиловичлуя бусларча чIявусса бур бусансса. Лагмацириннан га ия гьарцагу давриву эбрат­рансса, инсантал ляличIину ххирасса, щин-бухьурчагу бюхъайсса хъинбала бан ччисса, дакI хъун да­къасса инсан. Ганаща бюхъайва халкьуннащал зун, цумацагу инсаннах вичIи дишин, кумаг бан, студентнан бикIу, преподавательнан бикIу, архIал зузиминнан бикIу, цIа дургьуну увкIсса укунасса инсаннан бикIу. Ганаща бюхъайва цумацагу зузала цалла дуллалимуния рязину, ххарину, укъавххун зунсса тагьар коллективраву хIасул дан. Гьарми ца хъатIуйн кунма бучIайссия даврийнгу.
ЩиячIавнияр цаярамур тIалав­шинна хъуннасса дикIайва ганал. Га цайминнаха къалавхьхьусса ия, дисциплиналул цIакьсса, захIмат ххирасса. ХIатта Оьмар Аьлилович усса кIанай цу-ухьурчагу ххуйну зун икIайва.
АрхIал зузиминначIагу, кIул­циринначIагу Оьмар Аьлиловичлул хIурмат лавайсса бия. Ганайн чIявуну оьвтIун бикIайва цайми элмийсса центрдая личIи-личIисса конференциярттай, семинардай, батIавурттай гьуртту хьун. Элмулуха зузаву акъассагу, Оьмар Аьлилович ия инсантурах аякьа дусса, дуллалимуниву баччибакъулшиву къадурну, инсантуран цащава бан бюхъаймур бувайсса, къабюхъаймургу бан хIарачат буллалисса аслансса дакIнил заллу.
Оьмар Аьлиловичлул байсса ихтилатгу, учайсса махъгу бикIайва инсаннан бюххансса, дакIний личIансса. Ххаришиврийгу, къумашиврийгу чIарав ацIайва.
Хъинну ххирая Оьмардун цалва кулпат, нину-ппу, аякьалий икIайва гъан-маччацириннах. Хаснува ххирая, аьпабивун, цалва арсру. Ганан цалва оьрчIру ххирая кьянкьасса буттал ччаврийну бакъача, ттюнгъасса ниттил ччаврийну.
Цуксса хIайпнугу, инсаннал оьрмулуву шай дакI гъюжу ду­ккан дансса ишругу. Мукунсса иш хьуна Оьмардул оьрмулувугу, ганал кIилчинма арс Гелиор авария хьуну ивкIуна. Гелиордул бивкIу бухIан захIматну бия жун цинявн­нанмагу. Цанчирча га ия, ца нитти-буттан акъассагу, жун цинявннанагу пахру бан лайкьсса жагьил. Ва хъин дан къашайсса къювулул лахIан увуна Оьмар Аьлиловичгу. ХIатта цува тяхъану ухьурчагу, жун бувчIлай бия Оьмардул къюву цуксса захIматсса дуссарив. Амма цуксса кIусса духьурчагу цалламур къюву, махъра-махъсса кьининийнгу цайминналсса буллайна икIайва, элмулуха зийна ия.
Гьашину 22 шин хъанай дур Оьмар Аьлилович жущал акъа. Амма жун, ганал учениктуран, жува дунияллий буссаксса тачIав хъамакъаитантIиссар. Цала оьрму хас бувсса ганал даву лайкьну дачин дуллай буссар ганайн даин барчаллагьрайсса варистал. Жува буссаксса жу Оьмар Аьлиловичлул аьпа ябантIиссар лайкьну ва марцIну.
Нина Аьлиева, неорганическая химиялул кафедралул доцент:
— Оьмар Аьлилович даингу жущал уссар. Цанчирча ганал цIаницIун бавхIуну бур жул факультетрал кафедрардал даву хьхьичIуннай шаврил тарих ва ши­ккусса зузалтрал пишакаршиврул даража лахъ шаву.
Га ия тачIав цалла дуллалимуния, элмулия укъаххайсса инсан. Даврихсса ва лагма-ялттуцириннахсса ганал ччавугу духкъалагайсса дия. Арснал бивкIулул къювугу цавура кьюлтIа тIий, та цанна захIматсса чIумалгума хIарачат буллай ия перестройкалул щатIухьхьун факультет бириян къабитан.
Химиялул элмурдал доктор, профессор Оьмар Ттаттаев ДГУ-рал химиялул факультетрал кафед­ралул хъунаману ва деканну зузи­сса чIун ВУЗ-рал тарихраву щаллу­сса эпоха хъанай бур. Оьмар Аьлиловичлул каялувшиврулусса аспирантътурал диссертациярду дурур­ччуссар Москавлив, Ростоврай, Новочеркасскалий, Свердловскалий, Одессалий, Бакуй. Чув-бухьурчагу, диссертация дуручлай, МГУ-раву курсирдай личIи-личIисса конференциярдай ягу укунмасса хьунабакьавурттай жу даин ххуйну кьамул байвав Оьмар Аьлиловичлул ученикталшиврий.
ХIакьину Оьмар Аьлиловичлул даву дуллай буссар ганал тарбиячитал. Миннавасса чIявуминнал дурурччунни докторнал ва кандидатнал диссертацияртту. Вихшала дишин ччай бур Оьмар Ттаттаевлул цIа ва ганал аьпа марцIну ябан­ссар жучIава зузисса ва жул ялун бучIантIисса жагьилсса пишакартурал, тIисса.
Сарижат Ттаттаева, ДГУ-рал аналитикалул химиялул кафедралул доцент, Оьмардул уссил щар:
— Оьмар Аьлиловичлул лагма мудангу дикIайва паракьатшиву. Ганал дакIнил хъиншиву, гъилишиву гьарцаннан асар шайва. Оьмардувусса гьавас, шавкь дияйва цайминнайнгу ва ганал чIарав цумацагу хIадурну икIайва «гьунар» бан.
Га хъинсса ия укунма­сса ххуллийх наниминнащалгума. Оьмар­дул дакIнил марцIшиврул, хIалим­шиврул цумацагу кIункIу айва ганащал дакI дачIин.
Оьмар ия архIал зузиминнан хъунама уссу, каялувшиннаралуминнан – ппу, студентътуран – хъинсса буттауссу. ЦучIаввагу акъа­хьунссия Оьмардун къаххирасса. Муксса аякьа, къулагъас дуллай икIайва лагма-ялттунах, цайминнал буруккинттаха, цаламур хъамабивтун. Инсаннаву дикIайсса гьарцагу ххуйми хасиятру язи дургьуну, Оьмар­дун тIабиаьтрал дакIнил бутIа гьартасса буллуну бия. Ччяни лавгунни дунияллия.
Га кунмами Заннангу аьркинну бикIайхьунссар.
Зулайхат Ттаттаева, Оьмардул кулпат:
— Ттулва оьрмулуву яла ххуймур ва ххаримур чIун дия Оьмаргу сагъсса, оьрчIругу мюрщисса чIун. 33 шин хьуну дия жул цачIу. Жул дянив хьуна 4 арс. КIилчинма арс Москавлив университетгу къуртал бувну, МахIачкъалалив институт­раву зий уссия, аспирантуралувугу дуклай. Москавлия шавай най, аэропортрайн нани ххуллий авариялухьхьун иривну, оьрмулул 24 шинал оьрмулуву ивкIуна. 9-мур майрал кьини увччуссар. КIира шинава арсналмур къювулул ялун цамургу дируна. Оьрмулул 52 шинаву чIивима уссугу дунияллия лавгуна. ЗахIматну бия Оьмардун арснал ва уссил бивкIурду лялиян бан. Амма цуксса кIусса къюву дакIниву духьурчагу, лагма-ялттунащал тяхъанува икIайва, дустурал бувцIунма къаттагу бикIайссия. Кумаг аьркинну увкIнангу цащава шаймур байва. Цала чурххал хIал чан хъанай бунува, даврихух лавгна икIайва. Увххун ура, инжитну ура къаучайва тачIав. Уссу ивкIуну ца шин шайхту цувагу жагьилнува лавгуна дунияллия, ттунгу, оьрчIангу яла аьркинмур чIумал. БачIва хьунни Оьмардул дустурал бувцIунма бикIайсса къатта, бявкъунни ужагъ. Лавгунни, цалва чагъарду, грамотартту, луттирдал чIюйрду, титуллугу ттун кьариртун.
Зулайхат Тахакьаева