Вай гьантрай социал сетирдавусса Дагъусттаннал обществалувун яла чялав бувтсса ва авазасса хавар бавхIуну бур МахIачкъалаливсса мушакъатсса оьрчIру яхъанахъисса «Забота» интернатращал. Аваза цуппагу байбивхьуну бур ца­ппара гьантрал хьхьичI социал сетирдавун ва интернатраву муша­къатсса оьрчIай зулмурду буллай бусса бур тIисса хавар багьния шинмай.

Мукунна социал сетирдаву дирхьуну дур хIаммамраву чурхру шюшлашисса кIачIасса оьрчIал суратгу. «Забота» интернатраву буллай бивкIсса зулмурдая рес­публикалул телеканаллал репортажирттаву мукунма буслай бия хьхьичIва шикку яхъанай бивкIсса МахIаммад Аьбдуллаев ва Александр Буриченко. Вай цимурца цуксса тIайласса бурив ххал бан, вайва гьантрай «Забота» интернатравун бивну бур га цIана сакин бувсса, жяматий­сса вакилталгу гьурттусса, хъунмасса хIукуматрал комиссия. ЦIанакул най дуссар низам дуруччай къуллугърал бачин був­сса силистталул давурттив. Вай цимурцаннул хъирив лаяннин цалсса интернатрал хъунмур даврия букьан бувну бур.
Шикку хьусса ихтилатирттан ва интернатраву дурсса ял­тту буккаврин хасну вана вай гьантрай «Дагестан» РИА-лий хьунни, комиссиялул вакилталгу гьурттусса, хъунмасса пресс-конференция.
Шиккун бувкIун бия Да­гъусттаннал БакIчиначIасса кулпатрал, ниттихъал ва оьрчIал ихтиярду дуруччин жаваблув­сса Интизар Мамутаева, республикалул хъунмур педиатр Валентина Кострова, Жяматий­сса палаталул эксперт Лейла ХIамзатова ва интернатравусса мушакъатсса оьрчIал ппу Аслан Ширинов.
ХIакьинусса кьини «Забота» интернатраву яхъанай бу­сса бур захIматсса азарду дусса муша­къатсса 101 оьрчI. Миннува ялун бучIайсса нину-ппу бу­сса 28 оьрчI бусса бур, 21 оьрчI бу­сса бур шаний утту бивхьунмасса, бивзун, цала цивппа зана-кьулу бан къашайсса.
Интизар Мамутаевал бувсунни, республикалийсса оьрчIру яхъанахъисса хIукуматрал идарартту властьрал муданмасса къулагъасралу бушиву. Ванил чIурчIав дурунни, цан хавар бушиву гьарцагу идаралувусса тагьардания, мивусса къайгъурдая.
«Шинай кIилва на ххал бувара вай идарартту. Ца нюжмардул хьхьичI «Забота» интернатравун бивссар республикалул Жяматийсса палаталул вакилтурал комиссия. Миннан ми­кку цукунчIавсса диялдакъашивуртту хIисав хьуну дакъая», — бувсунни ванил.
Интернатрайн улун багьсса, 2007 шинал увсса цала мушакъатсса оьрчIая буслай, Аслан Шириновлул кIицI лавгунни, цув ччя-ччяни ияйшиву интернатрайн, арс шавай уцин ягу иян увайни, ва цукунчIавсса диялдакъашивуртту ттинин къахIисав хьушиву.
«Увния шинай ттул арс яхъанай уссар ва пансионатраву. Ва 9 шинни арс я гъалгъа къатIий, я чIу къабаллай. НервардацIун дархIусса азар дур арснал. На хъунмасса барчаллагь тIий ура укун захIматсса, байгьин-бугьан къашайсса азарду дусса, жул оьрчIах аякьа дуллалисса пансионатрал медперсоналданухь. Аллагьнал щинкIуй къакка­ккан баннав жу кунмасса нитти-буттал бухIлахIимур. БакIрал щаллу бакъасса, цала-цивппа бугьан къашайсса оьрчIру яхъанан аьркинссар укунсса журалул идарарттаву. Шикку зузисса пишакартуран бакъа къакIулссар вайннащал зунгу, чансса бухьурчагу, зат лахьхьин бангу, аьркинний медициналул кумаг бангу. Интернатраву батлай, зулмурду буллай бивкIссания шавай увцуну, шамилчинмур кьини арснал каруннай бувчIин къабуванссия тти махъунай иян увара куну. Ва аваза сававну, интернат лакьирча, укунсса оьрчIангу, хъирив жун, миннал нитти-буттангу, хъинну захIмат хьунссар укунмагу вайннал дардирдайсса оьр­му», — увкунни Аслан Шириновлул.
Соцразвитиялул ва захIматрал министерствалул пишакарнал кIицI лавгунни, захIматсса къашайшалт яхъанахъисса интернатирттаву, пансионатирттаву зузисса пишакартал хъинну захIматсса даву дуллалисса инсантуран ккаллийшиву.
Валентина Костровал бувсунни, 2007 шиная шинмай республикалул ЦIуллу-сагъшиву дуруччаврил министерствалул сакиншиннаралу гьар шинах «Забота» интернатравусса оьрчIал осмотр дувайшиву ва идара министерствалул ляличIисса къулагъасралу бушиву.
«Пансионат цIакь бувну бу­ссар Республикалул ОьрчIал клиникалул азарханалуцIун. Шикку зузисса лавайсса даражалул пишакартурал гьар шинах ххал дувайссар психика зия хьусса вай оьрчIал цIуллу-сагъшиврул тагьар. Вайксса шиннардий оьрчIал карточкарду ххал дуллай, ттун ттинин цалагу бакIрайн къадагьунни оьрчIайх рирщуну, щуну цIунцIияртту хьуну дур тIисса чичрурду. Шикку кьянкьану тасттикь буван хьунссар мукунсса ишру хIакинтурал кьюлтI къабувайшиву», — увкунни хъунмур педиатрнал.
Пресс-конференциялий гьаз бувунни укунсса идарарттаву видеокамерарду бишин аьркин­ссар ва укунсса журалул оьрчIру чан-кьансса зузи баврия зарал ба­къассар тIисса хаварду.
Лейла ХIамзатовал кIицI лавгунни, пансионатраву нанисса хъиривлаявурттая махъ вай ишру тасттикь къахьурча, танмихIрайн кIункIу ан аьркиншиву аваза бувт­сса гьарма.
«Цаппара шиннардил хьхьичI на нава буцав ттулва кулпатравун психикалул чан-кьансса муша­къатсса душ. Ттун ттунма кIулли цуксса захIмат бан аьркинссарив мукунсса оьрчIащал яхъанан, мунин зат лахьхьин бан. ЦукунчIав къабучIиссар, хъирив къалав­сса хавардайн бувну, цалсса аьй-бювкьурду дуллан», — увкунни ванил.
Соцсетирдаву «интернатрал хъунмур багьайсса танмихI къабувну личIантIиссар, Интизар Мамутаевал ссу буну тIий» тIисса хаварданун, оьрчIал жаваблувчинал бувсунни лявхъуния шинмай цил бувагу ца ссу бушиву ва директорнащал цукунчIавсса гъан-маччашиву дакъашиву.