Аьдатравун дагьсса куццуй, гьашинугу февраль зурул 15-нний МахIачкъалалив Интернационалистътурал паркраву хьунни Совет Аьрал Авгъаннава буккан бувсса кьинилун хас дурсса митинг.

Махъва-махъсса совет са­ллатI Авгъаннал аьрщарая бувккун гьашину 27 шин барт­лаглай дур.
Андриана Аьбдуллаева
Дагъусттанная Авгъаннаву аьрали бурж лахъан лавгун ур 4000 инсан. 141-ннал дяъвилул иширттаву жанну дуллуну дур, 769 дагъусттанчу дяъвилул цIараву ккаккан дурсса къучагъшиврухлу лайкь хьуну бур личIи-личIисса аьрали наградарттан. КIиннал Виричунал цIа ларсун дур.
Авгъаннал аьрщарай жанну дуллуми дакIнийн бичин ва зана хьуминнахь барчаллагьрал махъру учин митинграйн бувкIун бия Авгъанисттаннал ветерантурал координацион советрал председатель, генерал-майор Оьмар Муртузялиев, ДР-лул аьрали комиссар Дайтбек Мустапаев, МахIачкъала шагьрулул бакIчинал хъиривчу Закир Алхасов, ДР-лул Халкьуннал мажлисрал председательнал хъиривчу Сайпуллагь Исакьов, ДР-лул ЗахIматрал ва социал иширттал министр Хасбулат ХIажикишиев, МахIачкъала шагьрулул ярагъуннил гужирдал ревизионный комиссиялул председатель Нисрет Исмяилов.
Митинг тIитIлай, ихтилат бунни 4 шин Авгъаннаву дур­сса ва хъин-хъинсса давурттал сиптачину увксса генерал-майор Оьмар Муртузялиевлул.
— Авгъаннал аьрщарай интернационал бурж биттур буллай Дагъусттаннал жагьилтурал хъуннасса чувшиву кка­ккан дурссар. 40-мур армиялул каялувчитурачIа ляличIинува бусравну бивкIссар вихшала дишин бучIисса, цайнма тапшур бувмур дакI марцIну бартбигьайсса кьянкьасса дагъусттан оьрчIру. МуницIунма, вай бусравну бивкIссар кIанттул агьалинангу.
9 шинал лажиндарайсса данди бацIаву жунна ххирану дарцIуссар гьарицагу чулуха. Авгъаннавун увкIун, тиккусса тагьар чIалан дикIайхту, на гьаз бувссия тай халкьуннал дянив дакьаву дансса комиссия сакин баврил масъала. Хъунма хIал къалавгун, ттул дакIниймур бартлавгуна. Мунийну 40 азараксса инсаннал куннайн куннал битлатаву дацIан дурссар. ЧIявуминнал цIусса властьрал чул бувгьуна. Му сант ишла дурну, на жула аьрал Ватандалийн зана битаврия гъалгъа тIун ивкIра. Бия ттуцIун къабакьлакьиссагу, бусурманчунан талан ччай бакъар тIий ттуй аьй-бювкьурду дуллалиссагу. Ахиргу, жулва аьрал та билаят­рая буккан бансса пикри хьунни хIукуматралгу, аьралунналгу хъуниминнан.
Авгъан чIявусса кулпатирттал цIуцIи кIану хьунни. Та дяъвилул цIараву 141 дагъусттанчунал жан дуллунни, 80-хъул жагьилсса оьрмулуву чулахъ хьунни, 300-хъул Ватандалийн зана хьуну махъ дунияллия лавгунни. Уттигъанну вичIи дишав Респуб­ликалул БакIчинал Халкьуннал Мажлисрайнсса Рисалалух. Къащи хьунни му Рисалалуву интернационалистурал хIакъираву цичIав къаучаву.
ХIакьинугу билаятрайсса тагьар паракьатсса дакъар. Хъунмасса буруккин бутлатисса ма­съала бур хIакьину Дагъусттаннал жагьилтал Сириянавун, террористурал кьюкьраву талан най бушиву. Жува шаймур бан аьркин­ссар ми гъан-маччанайхчIин зана бан, — увкунни Оьмар Муртузялиевлул.
Ванал бувсунни чIярусса шиннардий бан, хьун тIий бивкIсса интернационалистурансса реабилитациялул центр буллай байбишинтIишиву, му Къаяккантлив бикIантIишиву ва му центрданул къатри дансса аьрщи личIи дуршиву Къаяккантуллал шяраваллил бакIчинал.
Авгъаннаву аьрали бурж лахълай бивкIминнал къучагъшиврия, хIакьинусса кьини миннан хьунадакьлакьисса захIматшивурттая бусласисса ихтилатру бунни Дайтбек Мус­тапаевлул, Закир Алхасовлул, Нисрет Исмяиловлул ва м.ц. Хасбулат ХIажикишиевлул бувсунни хIакьинусса кьини Да­гъусттаннай 2600 «авганец» ушиву, 500 инсан къатта-къушлил дузал бан багьлагьисса бушиву.
Ихтилатру къуртал хьуну махъ дуллунни аьрали наградартту.
Хъирив Авгъаннаву жанну дуллуминнан дацIан дурсса мармарчарил гьайкалданучIа дирхьунни тIутIив.