Гьашинусса шинал, январь зурул 26-нний, ДР-лул ХIукуматрал гьаз бунни паччахIлугърал органнал власть­рал зуруй кIилва агьали кьамул буллансса хIукму. Ва чара бакъа биттур бан аьркин­сса хIукмулийн бувну, февраль зурул 13-нний, МахIачкъалалий ДР-лул ХIукуматрал председатель Аьбдуссамад ХIамидовлул кьамул бунни цаппара агьали.

ВаначIан увкIсса Мурат Чергесовлул бувсунни цала шяраву, Лувмур Жунгутайлив, спортзал бувшиву. Ва ур миннат буллай миву аьркин дансса инвентарь ласун кумаг бара тIий. Мурат Чергесовлул оьвкунни Аьбдуссамад ХIамидовлуйн спортзал тIитIлатIисса шадлугърай гьуртту хьун. Аьбдуссамад ХIамидовлул, ва ххаллилсса даву дурсса Чергесовлухь барчаллагьгу увкуну, вайннан пишкаш бунни лачIун буккайни бутай­сса кIива халича ва махъ буллунни гихунмайгу аьркинмур дузал дансса кумагру буллан.
«Югагрохолдинг» идаралул каялувчи МахIаммад Кьурбанов ур цала предприятие зун къаритлай, чIярусса дайшишрурду дуллалаврийн бувну, 80 зузала даву дакъа личIлай ушиву буслай. Аьбдуссамад ХIамидовлул цалчинва цалчин кIицI лавгунни мюрщисса ва хъунисса бизнес дачин дурсса агьали АьФ-лул Президент Владимир Путиннул ва ДР-лул Президент Рамазан АьбдуллатIиповлул хъунна­сса аякьалувунгу лавсун бушиву ва миннан цукунчIавсса органнал чулухасса дайшишрурду дуллансса ихтияр дакъашиву. Аь. ХIамидовлул махъ буллунни, шяраваллил хозяйствалул министр бакIчисса хасъсса комиссиягу сакин бувну, ва идаралий хIасул хьусса тагьарданул хъирив изансса.
ХIукуматрал Председа­тель­начIан бувкIунни Дагъусттаннал халкьуннал шаэр Аминат Аьбдулманапова, цилла 70 шинал юбилей дан чIарав ба­цIия­ра тIий. Аь. ХIамидовлул цала бакIрайн лавсунни юбилей лайкьсса даражалий тIайла дуккан.

Вара кьини агьали кьамул бунни ДР-лул ХIукуматрал ва Администрациялул бакIчинал каялувчи Исмяил Эфендиевлул.
МахIачкъалалий ялапар хъанахъисса Камил Жанарсланов увкIунни оьрчI садикрайн кьамул уван кумаг бара тIий.

Февраль зурул 13-нний агьа­ли кьамул бунни ДР-лул ХIу­куматрал ­ хъиривчу Рамазан ЖахIпаровлулгу.
Хъунзахъиял шяравасса АьлиасхIаб МахIаммадаминов увкIунни дазуйсса отрядраву къуллугъ буллалисса, прапорщикнал чиндалувусса цала арс МахIаммадаминнул даврил хIакъираву хIасул хьусса тагьардания бусан. «Ттул арснал бур 4 оьрчI, хъунма-хъунмур душ бур 4-мур классравун занази­сса, кулпат даву дакъа бур. Утти арс тIайла уклай ур Ахттиял шяравун, мунащарив кулпат кьабивтун гьан бюхълай бакъар», — увкунни ванал.
Рамазан ЖахIпаровлул махъ буллунни, Пограничный управлениялул хъунама, генерал-майор Игорь Шмоткиннущал маслихIат ккавккун, ва масаъала щаллу бан.

ДР-лул ХIукуматрал председательнал цалчинма хъиривчу Анатолий Карибовлул, агьали кьамул буллай, кIицI лавгунни цинявннал мурадру закондалул ххуллий ххал бигьинтIишиву.
Хасавюртлив ялапар хъанахъисса Саида Пашаева бувкIун бия медициналул хIакъиравусса масъала щаллу баву анавар бу­ккан бара тIий миннат буллай. Ванил тIалавшиндарайн бувну, Анатолий Карибовлул га ссят, Республикалул ЦIуллу-сагъшиву дуруччаврил министр Танка Ибрагьимовлуйн оьвкуну, дузал бунни ва масъала.
БувкIун бия ваначIан Лава­щиял райондалиясса Зумруд Раджабова, МФЦ-лий зий бивкI­сса цила душ даврия букьан бунни тIий. Карибовлул вайннан маслихIат бунни ДР-лул ХIукуматрал сайтрайсса конкурсрай гьурттушинна дуван­сса. Му бакъассагу, Карибовлул оьвкунни халкьуннал промыслирдал ва туризмалул министрнал хъиривчу Виталий Демченкойн, Земфира Раджабовал душнин даву лякъин кумаг бара, чIарав бацIияра тIий. Ва масъалагу, хъунма хIал къалавгун, гиччава щаллу хьунни.
МахIачкъалалив ялапар хъанахъисса Асият Якьубовалмур масъала бия хъирив лаян аьркинсса. Мукьва оьрчIащал ва жагьилсса хъамитайпа бур подвал кунмасса къатлуву ялапар хъанай. 1996 шинал, нину-ппу дунияллия лавгун махъ, ва ла­хъан бувну бур Ленинский райондалийсса льготардай къатри дулайсса сияхIрайн. Гания шихунмай ва сияхI чун дирну дуссарив уттигу кIул бан хъанай ба­къар. Мунияту ва миннат буллай бур тIайламур бацIан бан цинма кумаг бара тIий. Карибовлул ванин маслихIат ккавккунни ва масъала судрайхчIин щаллу бан. Судрайн булун хьхьичI Карибовлул Асият тIайла бувккунни шагьрулул администрациялущал тIайласса маслихIат ккаккан.
«Республикалий гьарица щинал льготарду дусса инсантуран 250-270 къатта булайссар. Мунияту аьркинссар ми тIайлану закондалул ххуллий булаврил ялув кьянкьану бацIан», — увкунни Анатолий Карибовлул.

ДР-лул ХIукуматрал председательнал хъиривчу ХIасан ИдрисовлучIан увкIунни Къизилюртуллал райондалиясса ЦIусса ЧиркIейннал шярава­сса пенсионер, аьрщи арендалий ласаврил хIакъиравусса масъалалул ялув. ХIасан Идрисовлул Къизилюртуллал райондалул администрациялул бакIчинайн оьвкуну тIалав бунни ва масъала щаллу баву.
МахIачкъалалив ялапар хъанахъисса Аьйшат Саидова бувкIунни цивппа ялапар хъанахъисса дачардайн занансса транспорт хIасул даву тIалав буллай. Ва масъалагу ХIасан Идрисовлул лавсунни цала аякьалувун.
Ва кьини ХIасан Идрисовлул кьамул унни 10 инсан. Циняв­ппагу цачIанма бувкIсса агьалинал чулухасса мурадру ванал лавсунни цала аякьалувун.

ХIукуматрал председатель­нал хъиривчу, экономикалул министр Раюдин Юсу­повлучIан бувкIунни Къарабудахккантуллал райондалул Агач-аул поселокрал ва Буйнакскаллал райондалул Чанкурбей шяраваллал бакIчитал. Вайннал гьаз бунни щин дуцаврил ва шяраваллаву оьрчIал садикру баврил масъала.
— Социал объектру, хаснува школартту ва оьрчIал садру, баву му агьамсса масъалар. Му мурадрай жу диялсса арцу итадакьарду. Махъсса ппурттуву бувссар 50-нния ливчусса детсадру, амма жунма цинявннанмагу бувчIин аьркинни билаятрайгу, республикалийгу экономикалул тагьар бигьасса дакъашиву. Му масъалагу щаллу бан хьуншиву къакIулна махъ буллан ччай акъа­ра. Шяраваллаву социал объектру баврил масъалалийн жува кIура баенну, — увкунни Раюдин Юсуповлул.
Гьаз хьунни ЦIуссалакрал агьали цIусса миналийн бизан баврил масъалагу. Раюдин Юсуповлул кIицI лавгунни бястлихун багьсса гьарицагу масъала, цIунилгу хасъсса комиссиялул ххал бувну, щаллу бансса чаран лякъинтIишиву.
ВаначIан бувкIминнал мукунма гьаз бунни социал пособиярттал, давурттал дузал шаврил, грантру ва субсидияртту ласаврил хIакъиравусса масъалартту.
Раюдин Юсуповлущал хьунабакьин мукунма бувкIун бия Жагьилтурал ва жяматийсса организациярттал вакилтал. Миннал барчаллагь увкунни экономикалул министрнахь Дагъусттаннал экономика хьхьичIуннай дан бихьлахьисса захIматрахлу.
— Укунсса хьунабакьавур­ттай республикалул агьалинан кIул хъанахъиссар министерствалул дуллалисса давурттая. Ттун хIисав хьунни чIявуну инсантал цанния ца масъала щаллу баншиврул щичIан-чун гьанссарив къакIулну бикIайшиву. Жун ччай бур жула министерствалул биялдарайсса масъалартту гьаз хьусса чIумал инсантуран цала ихтиярду кIулну. Жу шаймур банну миннан кумаг бан. Агьалинал гьаз бувсса цинявппагу масъалартту сияхIрай бивхьуну, хIарачат банна ми ччясса чIумуй дузрайн буккан бан.
Имара Саидова